SAKARIYA 10 - Bibliyeeda Ghaydit

Ng'utamiida gwarugu neajeeda ghuhooda

¹ Amwaasha NG'UTAMIIDA roopta, aba damani bea muweedean, NG'UTAMIIDA gwasina shamooghuutka, ak gaygagooneegwa shiishiiyda roopta, nea gaba siisi siitaw nyeega.

² Aba gideaba sanaamajeega gabaloola haleanjeeda mwadaagha; nea fuga bara lagheanga ghwadaah ng'uyeega, ak gweadu giirgweatka ng'uyeega, nea ghwanung' ghahawda buuneeda mwadaagha, aba seareeni gaweay nea gawuurji gisilga sisawan mandeawana jeagiischoocheanda.

³ “Nyarasteanyu gwanda badayda jeagiischoodiga, ak gaydawa dalas uhuudeaba saawa, aba gideaba NG'UTAMIIDA bea lugweega ning'ula hawandaanyi, nea gheeh Yuda gil, ak gayghwanung' gawuurji faraasajeagaaschi miyaasiin bea ng'ucheeda.

⁴ Bugusta nyaawa gaygwarina fuga jea goombaliischi, ea gea mida madeedeaba suurja, ea shirikarajeega, ea gea jea goombal fugeasu.

⁵ Ak saawa gaygawuurji fuga meanyi, aleapsa ng'eanyi weajoodiga nyaawa aba jeeda sheang'weeda naweeda ng'ucheeda, ak gaygang'uchi aba gideaba gwandeayi sea NG'UTAMIIDA, nea giika ding'da faraasajeegean gajeenung' gwahirbiban.

⁶ “Gaydanung' ghwanyas uurda fuga Yuda, ak gaydalealu fuga gheeh Yosefu, ak gaydaadealda, aba gideaba ghaabwaydi ak gaygawuurji gili miidajakta, aba gideaba aniini geawooschi NG'UTAMIIDA was ASEETA nyaawa, ak gaydealeeysiit saawa.

⁷ Fuga Efraimu gayghwanyas uurjeenga, nea gahoosan jeesinga nyaawa gawuurji fuga leabu leeshooda difaayi; ak gayghwadaah diibiga nyaawa ng'asheesu, ak gahoosan, nea gahoosasa jeesinga nyaawa NG'UTAMIIDA.

⁸ “Gaydeajuursa saawa, nea ghaabwadi geat, aba gideaba nealealu, ak gayghoahaada gawuurji gidaghayi bea mwadi.

⁹ Ak gaydaadaarda saawa gaweay jeeda eemoojiga, ak gayghoapkaadan nea gwanda darooraka sheagi; ak gaygoobiida hoowa sea diibiga nyaawa ak iidu gabiigu.

¹⁰ Ak gaydeadeelu ghoah ghang'eada ng'eanyiida Misri, gaydabwadageat saawa ak gearuuteawi jeeda ng'eanyiida fuga Ashuru, ak ghaanung' gaweay ng'eanyiida Gileyadi ea Lebanoni, ak ghwanyiit ng'eanyiisean buuneeda ea ghoareat heechea goobiida.

¹¹ Nea niny abeeda gaygwasik jeeda basooda Misri nea laweajajeega basooda gajealas, nea beega sean sheagi jih bea eenda Nayli gayghwajaam. Ak gajeenung' ghwahiing'aan ghwarjeeda fuga Ashuru nea goosha uurda fuga Misri.

¹² Ak gaydanung' ghwanyas uurda aba heeda NG'UTAMIIDA, ak gaygaweelweel gaweay heechea gaweay aba gheawungaaschi,” gwarugu NG'UTAMIIDA.