RITEAYDA 40 - Bibliyeeda Ghaydit

Miindeayda ea giitinda maheemajeanda mida madeeda NG'UTAMIIDA

¹ Gwayeesha NG'UTAMIIDA Musa,

² “Eaweeda madeeda bea sheeda madeeda gaymiinda maheemajeanda was maheemajeanda siroondooscheesa.

³ Ak gajiina jeeda sandakwajeanda muuwuunooda, ak gaydukuta sandakwajeanda aba hang'da beashooda.

⁴ Ng'ata gajeani meesa, ak giyiini haleanjeadaanyi badayda nea gisisini muuchi, ak gajeani gah heeda siyiina gheaboonyaneeda, ak gighwari gheaboonyangaaschi.

⁵ Ak gayguusiina heeda wagiida bea dahaabu geeta siing'andiita aba madeeda sandakwajeanda muuwuunooda, ak giyiini hang'da beashooda ghuuta maheemajeanda.

⁶ Ak gaysina heeda wagiida bea haleanjeeda sisabwa geadi bea ghadooweeda sighwarda aba madeeda gidaghuuta maheemajeanda siroondooscheesa,

⁷ ng'ata gajiina harakta dageascheeda maheemajeanda siroondooscheesa ea heeda wagiida, ak giyiini beega jeeda.

⁸ Ak gimiindi ghamarda seamooda gwaneaweesa meadajeega sean, ak giyiini hang'da beashooda gidaghuuta seamooda.

⁹ Ng'ata gigeanu nagheeda giimearda, ak gimwaari maheemajeanda, ea gili wassean mida jeeda, ak giighaydiidi ea haleanjeeda sean, ak gayghaghaydiit.

¹⁰ Ak gajamwaara eara heeda wagiida bea haleanjeeda sisabwa geadi bea ghadooweeda sighwarda ea haleanjeeda sean, ak giighaydiidi heeda wagiida, ak heeda wagiida gayghaghaydiit muuchi.

¹¹ Ak gajamwaara eara harakta ea hoorgeadaanyi ak giighaydiidi.

¹² Ng'ata giyeadu Haruni ea orjoagaaschi gidaghuuta maheemajeanda siroondooscheesa, ak giihuuni saawa aba beega.

¹³ Ak gishuubi Haruni hang'weaka ghaydidi, ak gimwaari niny, ak giighaydiidi niny, ak gaygagadiyeesean ghoah ashoohoocheanda.

¹⁴ Ak giyeadu eara orjoagaaschi ak gishuubi saawa gootajeega,

¹⁵ ak gimwaari saawa, gawuurji gidimwaardi ghwaan, ak gaygagadiyeesean gawuurji ashoohoodiga: ak gimwaari nagheeda ak gayghoah ashoohoocheanda ea gagul seaygoojiga nyaawa.”

¹⁶ Hean gwasin Musa ng'asheega sean rukusa NG'UTAMIIDA hean gwasinda gidida.

¹⁷ Hean sheeda madeeda bea gweaydeaba iyeenya, was eaweeda madeeda bea sheeda, geenung' ghamiinaada maheemajeanda.

¹⁸ Hean ghamiinda Musa maheemajeanda, ak ghwayiin hoorgajeagaaschi, ak ghamiinda beehajeagaaschi, ak ghwayiin guhuunatkaaschi, ak ghamiinda daranajeagaaschi,

¹⁹ ak gagis maheemajeanda goowiida aba badayda gheeda, ak ghwayiin badaydaanyi gidaghuuta maheemajeanda gawuurji gidarukusiinda NG'UTAMIIDA Musa.

²⁰ Ng'ata gageanu muuwuunooda ak ghwayiin jeeda sandakwajeanda, ak ghwayiin geediga jea easareana badayda sandakwajeanda, ak ghwayiin hoorgeeda baydeayda badayda sandakwajeanda,

²¹ ak gweadu sandakwajeanda jeeda maheemajeanda, ak gwadukuta aba hang'da beashooda, ak gwadukuta sandakwajeanda muuwuunooda, gawuurji gidarukusiinda NG'UTAMIIDA Musa.

²² Ak ghwayiin measa jeeda maheemajeanda siroondooscheesa, bea wiilooda ng'eanyiida siitoas bea meatkweeda maheemajeanda, bea bwadaw aba heeda hang'da beashooda,

²³ hean ghwayiin badayda mukaate nea ghoadoabiiw aba madeeda NG'UTAMIIDA, gawuurji gidarukusiinda NG'UTAMIIDA Musa.

²⁴ Ng'ata ghwayiin heeda siyiina gheaboonyaneeda jeeda maheemajeanda siroondooscheesa, nea gafursiinyi sea measa bea meatkweeda wiilooda ng'eanyiida sirakta bea maheemajeanda,

²⁵ ak ghaghwar beascheeka aba madeeda NG'UTAMIIDA, gawuurji gidarukusiinda NG'UTAMIIDA Musa.

²⁶ Ak ghwayiin heeda wagiida dahaabu jeeda maheemajeanda siroondooscheesa bea madeeda hang'da beashooda,

²⁷ ak ghaghwarda geeta siing'andiita aba badayda, gawuurji gidarukusiinda NG'UTAMIIDA Musa.

²⁸ Hean ghwayiin hang'da beashooda ghuuta maheemajeanda.

²⁹ Ak gwasin heeda wagiida bea haleanjeeda sisabwa geadi bea ghadooweeda sighwarda aba gidaghuuta maheemajeanda siroondooscheesa, ak ghwayiin badayda haleanjeeda sisabwa geadi bea ghadooweeda sighwarda ea booga sisabwa geadi, gawuurji gidarukusiinda NG'UTAMIIDA Musa.

³⁰ Ak ghwayiin harakta dageascheeda maheemajeanda siroondooscheesa ea heeda wagiida, ak ghwayiin jeeda beega giihuushooda,

³¹ gaygoohuuna Musa ea Haruni ea orjoagaaschi geatinga nyaawa ea geeshanga nyaawa,

³² iiweay jeeda maheemajeanda siroondooscheesa, ak gwaneekiisa heeda wagiida geehuushi gawuurji gidarukusiinda NG'UTAMIIDA Musa.

³³ Ak ghamiinda ghamarda gwaneaweesa maheemajeanda ea heeda wagiida, ak ghwayiin hang'da beashooda gidaghuuta seamooda. Hean ghoahiit Musa gadiyeeda.

Shamooghooda gwadukuta maheemajeanda mida madeeda NG'UTAMIIDA

³⁴ Hean gwadukuta shamooghooda maheemajeanda siroondooscheesa, ak ghwanyiit giigheambiita NG'UTAMIIDA maheemajeanda.

³⁵ Ak Musa ea mudughoamu gawa jeeda maheemajeanda siroondooscheesa, aba gideaba gwanda badaydida shamooghooda, ak ghwanyiit giigheambiita NG'UTAMIIDA maheemajeanda.

³⁶ Iidu nea geetiing'da shamooghooda ghabeawa heeda maheemajeanda hean gwasaw fuga Israeli gaweay bareanyeeka nyaawa,

³⁷ nea iimeetiing'da shamooghooda, ea maygaweay bareanyeeka ea eaghus gwadiyeada gicha shamooghooda.

³⁸ Aba gideaba shamooghoodida bea NG'UTAMIIDEAN, goobiita badayda maheemajeanda askweari; ak eawa gwanda jeadaanyi beasta, aba madeeda fuga Israeli sean aba bareanyeeka nyaawa.