RITEAYDA 38 - Bibliyeeda Ghaydit

Sinooda heeda wagiida bea haleanjeeda sisabwa geadi bea ghadooweeda sighwarda

¹ Hean gwasin eara heeda wagiida bea haleanjeeda sisabwa geadi bea ghadooweeda sighwarda bea rabeangheeda, geawundaanyi gaba geatin muut, ak murdajeagaaschi gaba geatin muut, ak gooyang'deay meadajeega sean, geawunda gal humng'eeda gaba geatin samwagu.

² Ak gwasin gujaka aba meadajeagaaschi asang'wan ak gujakaaschi gwaleabu hijagi, ak gwadukuta aba lagheanga oomng'i.

³ Ng'ata gwasin dabita sean bea heeda wagiida, was dahuundiga, ea mageemboojiga ea buurjeeka, ea ng'arapchoojiga ea gharinyeanda sigaweaniida dabidi seaniin gwasina lagheanga oomng'i.

⁴ Ak gwasissa heeda wagiida gheareedanga lagheanga oomng'i, ak ghwayiin hing'eadayda hilgweandida gwaneaweesa meadajeega sean.

⁵ Hean gwasin gharin ang'wan ak ghwayiin meadajeega asang'wan bea gheareedanga lagheanga oomng'i ghoah heeda jea eayiin geediga jea easareana,

⁶ ak gwasin geediga aba beehiida rabeangheeda, ak gwadukuta aba lagheanga oomng'i.

⁷ Ak gooshuup geedigiga jeeda ghunoojiga mida murdeeda heeda wagiida, ghoah gichea easareana saawa, ak gwasin dea buruk aba beehajeega.

Sinooda giihearmooda lagheanga oomng'i

⁸ Iidu gwasin giihearmooda lagheanga oomng'i ea hoorgeadaanyi bea lagheanga oomng'i, ea gea daliili nyasa heeda gadeemga gadiydooschi aba gidaghuuta maheemajeanda siroondooscheesa.

Seamooda maheemajeanda mida madeeda NG'UTAMIIDA

⁹ Ak gwasin seamooda; nea aba wiilooda ng'eanyiida sirakta, gwanda hang'da sighasta aba seamooda bea seawuutka ea bumbuni nea miy, ak gaba geatin bughala,

¹⁰ daranajeagaaschi ea diktam ak hoorgajeagaaschi ea diktam, bea lagheanga oomng'i; ak gifungajeega daranajeega ea ng'ooruutka geesina gharinga sisina lapiya.

¹¹ Ak wiilooda ng'eanyiida siitoas gaba geatin bughala, ak daranajeagaaschi ea diktam, eara hoorgajeagaaschi ea diktam,

¹² meatkweeda biyeara gwanda hang'da sighasta nea gaba geatin haradam ea damanamughuush, daranajeagaaschi ea damanamughuush, ak hoorgajeagaaschi ea damanamughuush, gifungajeega daranajeega ea ng'ooruutkaaschi gaba gharinga sisina lapiya.

¹³ Nea ghuuta maheemajeanda ghayeawa gaba geatin haradam ea damanamughuush.

¹⁴ Hang'da sighasta bea meatkweenagi bea gidaghuuta, gaba geatin damanamuut, mideawa daranaji samwagu ea hoorgaji samwagu.

¹⁵ Ak gwasunu eara meatkweeda niirja; aba geatin ea geatindida neekeewa gidaghuuta seamoodean gwanda hang'da bea geatin damanamuut, mideawa daranaji samwagu ea hoorgaji samwagu.

¹⁶ Hang'weaka sean neaweesa seamooda ea bumbuni nea miyaas.

¹⁷ Ak hoorgajeega daranajeega gaba lagheanga oomng'i nea gifungajeega daranajeega ea ng'ooruutkaaschi gaba gharinga sisina lapiya, ak iheenga seengaaschi eara ada gaba gharinga sisina lapiya, ak daranajeega sean bea seamooda geeng'oora aba gharinga sisiina lapiya.

¹⁸ Ak hang'dida bea beashooda mida ghuuta seamoodean gadiyeeda gearnoocheanda gil, nea gaba oormeeda gasa gwatuudu, ea dea oomu, ea dea areara, ea dea bumbun miy ak geawundaanyi gaba geatin diktam nea murdajeagaaschi gaba geatin muut ak gooyang'deay sea hang'weakiga bea seamoodean.

¹⁹ Ak daranajeagaaschi ea ang'wan eara hoorgajeagaaschi ea ang'wan bea lagheanga oomng'i gifungajeagaaschi gaba gharinga sisiina lapiya ak iheenga nyaawa ea ng'ooruutka gaba gharinga sisiina lapiya.

²⁰ Nea guhuunatka sean bea maheemajeanda ea gea neaweesa seamooda, gaba dahaabu.

Haleanjeeda sigadiyeata aba jeeda maheemajeanda mida madeeda NG'UTAMIIDA

²¹ Suh haleanjeeda sisin gil bea maheemajeanda, was maheemajeanda muuwuunooda, suh gil gawuurji gidarukuteayda Musa aba gadiyeeda fuga Lawi nea ghoadoabiiw Itamari was orjeeda Haruni was ashoohoocheanda.

²² Besaleli orjeeda Uri, was orjeeda Huri, bea eemeeda Yuda, gwasin haleanjeeda sean rukusa NG'UTAMIIDA Musa,

²³ ak niny gil ea Oholiyabu was orjeeda Ahisamaki, bea eemeeda Dani, was gearnoocheanda ng'oorshooda gil ea nabiischooda hang'weaka oormeeda gasa gwatuudu ea gea oomng'i ea gea areeri, ea gea bumbuni miyaas.

²⁴ Dahaabooda sean sigadiyeata aba gadiyeeda, aba gadiyoojiga sean bea heeda ghaydit, ea dahaabu bea haleanjeeda sisabwa geadi bea ghadooweeda, ea dalaantaji diktam gil ea shageash ea shiliingaji bughalaji ispwa ea diktam ea damanamughuush bea shiliingajeega heeda ghaydit.

²⁵ Ak lapiyeeda fuga bwat geat siyiida ea dalaantaji bughala ea sagalamnyeanjagi ea bughalaji ispwa ea laadam ea damanamuut was lapiyeeda heeda ghaydit:

²⁶ beegiga was uhuuda (nea sumunajeanda gil, was shiliingajeanda heeda ghaydit), aba gilinyoo eeyiida ng'eada gweanyeew diktam ea ghwanaawda, ea sagalamnyooji lah ea samwagu ea bughalaji muut haradam ea damanamughuush.

²⁷ Dalaantajeegiga apughala bea lapiyaan geesissa hoorgajeega heeda ghaydit, ea hoorgajeega heeda hang'da beashooda, hoorgaji bughala aba dalaantajeesu apughalaan nea dalaantajeanjagi gaba hoorgeanagi.

²⁸ Ea lapiyeeni was bughalaji ispwa ea laadam ea damanamuudiin, gwasin iidiga daranajeega, ak gwadukuta iheenga ak gwasissa ng'ooruutka.

²⁹ Ak lagheanga oomng'i siyeadu gaba dalaantaji laadam ea damanamughuush ea lapiyaji sagalamnyooji iyeenya ea bughalaji ang'wan;

³⁰ ak gwasina lagheang'su oomng'iin hoorgajeega gidaghuuta maheemajeanda siroondooscheesa, ea lagheanga oomng'i bea heeda wagiida ea gharinyeanda oomu mideawa seawuutka ea haleanjeeda sean bea heeda wagiida,

³¹ ea hoorgajeega neaweesa seamooda, ea hoorgajeega mida gidaghuuta seamooda, ea guhuunatka sean bea maheemajeanda, ea guhuunatka sean neaweesa seamooda.