RITEAYDA 37 - Bibliyeeda Ghaydit

Sinooda sandakwajeanda Neajeeda

¹ Ng'ata gwasin Besaleli sandakwajeanda beehiida rabeangheeda, nea geawundaanyi gaba geatin iyeenya ea gisilach bugusta nibiyeenya, murdajeega gaba geatinagi ea gisilach gilimwanang', ak geawunda gal humng'eeda gaba geatinagi ea gilimwanang'.

² Ak gwadukuta aba dahaabooda miyaasiin jih ea bwadaw, ak gooneaweesa meadajeega sean dahaabu.

³ Hean gwasissa gharin ang'wan bea dahaabu meadajeega sean asang'wan gharin iyeenya meatkweenagi ea gharin iyeenya meatkweeda niirja.

⁴ Ak gwasin geediga jea easareana bea rabeangheeda, ak gwadukuteawa saawa dahaabu,

⁵ ng'ata gooshuup geediga jea easareana sandakwajeanda mida murdajeega sandakwajeanda.

⁶ Ak gwasin hoorgeeda baydeayda bea dahaabooda miyaas, geawundaanyi gaba geatin iyeenya ea gilimwanang', nea murdajeega gaba geatinagi ea gilimwanang'.

⁷ Ak gwasin geeruubaji iyeenya bea dahaabu, bea gadiyeeda gidayda ak gwasissa saawa murdajeega asiyeenya bea hoorgeeda baydeayda,

⁸ geeruubajeanjagi gwanda meatkweenagi geeruubajeanda niirja gwanda meatkweeda niirja, gwasin geeruubajeesu asiyeenyean hoorgeanagi ea hoorgeeda baydeayda murdajeagaaschi duwaawi.

⁹ Ak geeruubajeegiga goodiing'da meang'eega nyaawa humng'eeda, ak gwadukuta hoorgeeda baydeayda aba meang'eega nyaawa nea goofuursiinyi gheamamuunatka nyaawa, ak gheamamuunatka geeruubajeega googeal heeda hoorgeeda baydeayda.

Sinooda measeeda mukaatajeega sighadoawana ASEETA

¹⁰ Ng'ata gwasin measa aba beehiida rabeangheeda, geawundaanyi gaba geatin iyeenya, murdajeega gaba geatinagi, nea geawundaanyi gal humng'eeda gaba geatinagi ea gilimwanang',

¹¹ ak gwadukuta aba dahaabooda miyaas, ak gooneaweesa dahaabu meadajeega sean.

¹² Hean gwasin beehiida haw ak gooneaweesa beehiida bwarak meadajeega sean, ak gooneaweesa beehiidida dahaabu.

¹³ Ng'ata gwasin gharin ang'wan bea dahaabu ak ghwayiin meadajeega asang'wan bea geeshangaaschi asang'waniin.

¹⁴ Ghunoojigiga ea neekeewa beehiidida, ghoah heeda jea eayiin geeta jea easareana measa.

¹⁵ Ak gwasin geediga jea easareana measa aba beehiida rabeangheeda, ak gwadukuta aba dahaabu.

¹⁶ Ak dabitida mida uhuuda measean, was gweerajeagaaschi, ea dabita siyiina haleanjeeda sing'andita ea gweerajeagaaschi ea gikoombajeegaaschi jea goodalealiida ak gwasina sean dahaabu.

Sinooda heeda siyiina gheaboonyaneeda

¹⁷ Gwasin heeda siyiina gheaboonyaneeda aba dahaabooda miyaas. Hoorgeadaanyi ea geeta siyiina gheaboonyaneeda gadiyeeda gearnoocheanda gil, gikoombajeegaaschi, ea iheenga nyaawa, ea deakghweadaanyi gaba gilagi sean.

¹⁸ Ak gaba dameal lah bea nih rinna murdeadaanyi, dameal samwagu bea heeda siyiina gheaboonyaneeda, gwanda meatkweenagi ak dameal samwagu bea heeda siyiina gheaboonyaneeda gwanda meatkweeda niirja,

¹⁹ Nea aba damealga alah gwandeawa deakghwaji samwagu miyaasiin uurji gea neambooriida mideawa shageeniga ea seenga.

²⁰ Ak heeda siyiina gheaboonyaneeda gwanda bayookcheew ang'wan sisinda neambooriida ea seengaaschi ea deakghweeda,

²¹ ak uhuuda damealeanjagi mida hing'eadayda gea asiyeenya gaba damealgiga alah gal humng'eedean.

²² Iheenga nyaawa ea damealga nyaawa gwaleabu hijagi, ak gidasean gaba gadiyeeda gearnoocheanda dahaabooda miyaas.

²³ Ng'ata gwasin gheaboonyangaaschi asispwa ea gharinyeandida jea eang'waanyaan ea gweerajeagaaschi bea dahaabu.

²⁴ Ak gwasin dabitaanyi sean bea dalaanta aba dahaabooda miyaas.

Sinooda heeda wagiida bea haleanjeeda siing'andiita sighwarda

²⁵ Hean gwasin heeda wagiida siing'andiita aba beehiida rabeangheeda, geawundaanyi gaba geatinagi, murdajeagaaschi gaba geatinagi, ghwanung' gooyang'deay meadajeega sean, geawunda gal humng'eeda gaba geatin iyeenya, gujakaaschi gaba gilagi.

²⁶ Ak gwadukuta aba dahaabooda miyaas, gooneaweesa uhuuda ea murdajeega sean, ea gujakaaschi, ak gwasin hilgweanda aba dahaabu ak gooneaweesa,

²⁷ ak gwasin gharin iyeenya bea dahaabu aba hing'eadayda hilgweandaanyi bea murdajeagaaschi asiyeenya ghoah heeda jea eayiin geediga jea easareana.

²⁸ Ng'ata gwasin geediga rabeangheeda, ak gwadukuta aba dahaabu.

Sinooda nagheeda giimearda ea geeta siing'andiita

²⁹ Ak gwasin eara nagheeda ghaydit bea giimearda ea geeta siing'andiita miy, siikuuyi buureata.