RITEAYDA 30 - Bibliyeeda Ghaydit

Heeda wagiida sighwarda geeta ng'andit

¹ “Gaysina heeda wagiida jea eegwariideaysa geeta ng'andit, nea gaysinana rabeangheeda.

² Geawundaanyi gaygaba geatinagi, eara murdajeega gaygaba geatinagi, gaygooyang'deay meadajeega sean, geawunda gal humng'eeda gaygaba geatin iyeenya ak gujakaaschi gaygooyang'deay sea hoorgeeda wagiida.

³ Ak gaydukuta aba dahaabooda miyaas, uhuudaanyi ea murdajeega ea gujakaaschi, ak gineaweesi murdajeega shiipka dahaabu.

⁴ Sina gharin iyeenya bea dahaabu, ak giyiini hing'eadayda gisheajeagaaschi asiyeenya, ak gisisi meadajeega sean, ak gayghoah heeda jea eayiin geediga jea easareana.

⁵ Ak gideasi geediga rabeangheeda ak gidukuti aba dahaabu.

⁶ Ak giyiini madeeda hang'dida bea beashooda mida murdeeda sandakwajeanda muuwuunooda, mida madeeda hoorgeeda baydeayda mida uhuuda muuwuunooda, was heeda jea eeroonyeesiina.

⁷ Inyeesa sakteayda Haruni gayghaghwarda geeta ng'andit aba uhuuda ak eara gheaboonyanga gayghoashaaranda, ak ghaghwarda.

⁸ Haruni iighwar beascheeka shing'ada, gayghoayeat, ak ghoah shearooda ng'andit aba madeeda NG'UTAMIIDA ea ghoah jeacheengeagwa.

⁹ Adeasabi geadi haleanjeeda miighaydidi bea shearooda ng'andit ghana gea sighwarda, ghana booga, ak ea majadalealsiina uhuudaanyi gidasileeha.

¹⁰ Ak gaygwasin Haruni giiduupcheeda gilakweay nibwagi aba uhuuda gujakaaschi, aba foojeanda haleanjeeda sisapa geadi aba riing'eeda bea giiduupcheeda ak gaygwasin giiduupcheeda nibwagi aba gilakweay ea ghoah jeacheengeagwa sean, ea ghaydit muuchi aba heeda NG'UTAMIIDA.”

Gujaweeda maheemajeanda NG'UTAMIIDA

¹¹ Ghwalamda NG'UTAMIIDA ak gwayeesha Musa,

¹² “Inyas giyiidayi fuga Israeli ak ginyasi mooneeda nyaawa, hean gaygaba nih adaw NG'UTAMIIDA leadeeda aba badayda gurooroadaanyi inyas giyiidayi saawa, aba gideaba adaghoang'waay geeyooda aba bugusta nyaawa damanda iyiiti saawa.

¹³ Gilinyoo ea siyiida gayghoadayda haleanjeeni: sumunajeanda bea shiliingajeanda ghaydit (shiliingajeanjagi gaba geerahaji diktam), sumunajeanda gawuurji haleanjeeda sisapa geadi bea NG'UTAMIIDA.

¹⁴ Gilinyoo ea sih gil siyiida ghang'eada gweanyeew diktam ea ghwanaawda, gayghoadaw NG'UTAMIIDA haleanjeeda sisapa geadi.

¹⁵ Meanang'oocheanda mayghoadayda geanaawda ak eara siida bwarbwar ea mayghoadayda gea ng'ay, aba jeedeaba sumunajeanji, iyadaw NG'UTAMIIDA haleanjeeda sabwa geadi jea gwasin giiduupcheeda aba heanyaawa.

¹⁶ Ak gajang'waanya lapiyeeda giiduupcheeda bea fuga Israeli, ak gajadiiwa aba gadiyeeda maheemajeanda siroondooscheesa, ak ghoah giipkeata aba fuga Israeli aba madeeda NG'UTAMIIDA, ak gwasin giiduupcheeda aba heanyaawa.”

Gweeriida lagheanga oomng'i

¹⁷ Ghwalamda NG'UTAMIIDA ak gwayeesha Musa,

¹⁸ “Sina gweeriida lagheanga oomng'i, bea giihuushooda nea hoorgeadaanyi gaygaba lagheanga oomng'i, ak giyiini bugusta maheemajeanda siroondooscheesa, ea heeda wagiida, ak giyiini beega jeeda,

¹⁹ ak gaygoohuuna Haruni ea orjoagaaschi geatinga nyaawa ea geeshanga nyaawa.

²⁰ Iiweay jeeda maheemajeanda siroondooscheesa, ghana ibuwa heeda wagiida gagadiiy, nea ghaghwarda haleanjeeda sisabwa geadi bea ghadooweeda aba beasta bea NG'UTAMIIDA, gaygoohuushi aba gideaba adagameewa.

²¹ Gaygoohuun geatinga nyaawa ea geeshanga nyaawa, aba gideaba adagameewa; ak gayghoah diigheanda manda muudeanooda aba saawa, ghang'eada niny ea ghoah jeacheangaaschi ea gagul seaygoojigaaschi.”

Nagheeda giimearda

²² Ghwalamda NG'UTAMIIDA ak gwayeesha Musa,

²³ “Geani nagheeda ng'andit miy ea geeta ng'andit ea shiliingaji bughalaji muut ea geedi siguura dalasini ng'andit muuchi nung' googweena iyeenya nea bughalaji iyeenya gil ea haradam ea damanamughuush, ea mushearajeega ng'andidi bughalaji iyeenya ea haradam ea damanamughuush,

²⁴ ea gili siguura gida bughalaji muut, bea shiliingajeanda ghaydit, ea nagheeda saytuunajeega gweeraji muut,

²⁵ ak gisini ghoah nagheeda ghaydit bea giimearda aguuyeewana nagheeda ea geeta ng'andit ak ghoah nagheeda ghaydit bea giimearda.

²⁶ Ak gajamwaara maheemajeanda siroondooscheesa, ea sandakwajeanda muuwuunooda,

²⁷ ea measa ea haleanjeadaanyi sean ea heeda siyiina gheaboonyaneeda ea haleanjeadaanyi sean ea heeda wagiida sing'andiitiida,

²⁸ ea heeda wagiida bea haleanjeeda sisabwa geadi bea ghadooweeda sighwarda, ea haleanjeadaanyi sean ea gweeriida ea hoorgeadaanyi,

²⁹ ak gajamiini saawa, ak gayghaghaydiit muuchi, ak gilinyoo ghwasat saawa gayghaghaydiit.

³⁰ Ak gajamwaara Haruni ea orjoagaaschi, ak gajamiini saawa, ak gaygagadiyeesean ghoah ashoohoodiga.

³¹ Ak gajeeshiina fuga Israeli, ‘Nih gayghoah nih nagheedeanyu ghaydit ea gagul seaygoojigaagu.

³² Majeetalealsa saseeda siida, ak ea adoosinyi suuk gea uurji suh, aba gideaba ea ghaydidi ak gammiisa ea ghaydidi aba heedeang'wa.

³³ Siida was sean jea googuuyi nagheeda uurji nih, ghana siida was sean jea ghwayiin nagheeda uhuuda rabascheanda siisi abeeda gayghwalajaada fugaaschi.’”

Geeta ng'andit

³⁴ Ghwalamda NG'UTAMIIDA ak gwayeesha Musa, “Geani geediga ng'andidi miyaasiin was deanguurga, ea buureata ea sakghwiilo, was haleanjeeda ng'andidi miyaas, ea hideeda ng'andit, (haleanjeeni seaniin gagasa gwadeenyi),

³⁵ guusiina ghwashaaranda gawuurji gearnoocheanda gidammu gwasinda ak ghwayiin balang'da, ak ghamiidu nea ghaghaydiit,

³⁶ ak gaygula suh ng'ay madeeda sandakwajeanda muuwuunooda bea jeeda maheemajeanda siroondooscheesa was heeda jea eeroonyeesiina, ak gayghaghaydiit aba heedeang'wa.

³⁷ Ak geeta ng'andit jea sina majasisiina geat geeta ng'andit uurji suh, aba gideaba ea ghaydit aba NG'UTAMIIDA.

³⁸ Siida was sean jea gwasin dea uurji nih ak gwajoon siisi abeeda gayghwalajaada fugaaschi.”