RITEAYDA 25 - Bibliyeeda Ghaydit

Haleanjeeda ghadooweeda bea maheemajeanda ghaydit

¹ Gwayeesha NG'UTAMIIDA Musa,

² “Eeshiina fuga Israeli, daba siisi eanean haleanjeeda sisabwa geadi bea ghadooweeda, nea gaba siisi guh gidagasa jeadaanyi, abeeda ghoang'waanyi haleanjeeda sisabwa geadi bea ghadooweeda aba badaydeanyu.

³ Ak haleanjeeda sisapa geadi bea ghadooweeda jea ang'waanya leabu heeda nyaawa suh: dahaabu, ea shiliingajeega ea lagheanga oomng'i

⁴ ea gulbeeda gasa gwatuudu, ea dea gasa ghwahareariit, ea dea areara ea hang'weaka bumbuni miyaasiin ea hang'weaka sisna buudeega nooga,

⁵ ea eaghwada lagweendiga, siyeasha oormeeda areara ea eagweega nooga, ea ghweendooda rabeangheeda,

⁶ nagheeda gheaboonyanga, ea deanguurga jea eekuuyi nagheedida bea eeshteaydean ea hideeda ng'andit,

⁷ ea lagheanga hang'oonyi sheayeat siguura garneliya, ea lagheanga suuk hang'oonyi sheayeat mida uhuuda shageedida bea daghatean.

⁸ Ak abeeda gwasinnean heeda ghaydit ak gaydeabiida bugusta nyaawa.

⁹ Gaynung' gawuurji gidaahiimdaaydi ak gisindunu haleanjeeda sean bea maheemajeanda nih gichea sinda sean.

Sandakwajeanda Neajeeda

¹⁰ “Ak gaygwasin maleambooda haw sisna rabeangheeda, nea geawundaanyi gajea geatin iyeenya gil ea gidagween iyeenya, murdajeega gaygaba geatinagi gil ea gidagween iyeenya, geawundaanyi gal humng'eeda gajea geatinagi gil ea gidagween iyeenya.

¹¹ Ak gidukuti aba dahaabooda miyaasiin dukuta jih ea bwadaw, ak gineaweesi ghealooda dahaabu meatkwajeega sean.

¹² Sina gharin ang'wan bea dahaabu ak gishuubi geeshangaaschi asang'wan, gharin iyeenya iina meatkweadaanyi ak gharin iyeenya giyiini meatkweeda niirja.

¹³ Ak gisini geedi iyeenya bea rabeangheeda, ak gidukuti aba dahaabu.

¹⁴ Ak giibuuti geedigiga jeeda ghunoojigiga mida meatkwajeega sandakwajeanda jea ghwasareana saawa sandakwajeanda.

¹⁵ Geedusu majeegeanda gaygoobiita jeedeaba ghunoojisu bea sandakwajeandean.

¹⁶ Ak gajiina jeedeaba sandakwajeanji ng'asheega jea dagoonyi jea damuuwuuneey.

¹⁷ Ak gaysina hoorgeeda baydeayda bea dahaabooda miyaas, geawundaanyi gaygaba geatin iyeenya ea gidagween iyeenya, murdajeega gaygaba geatinagi ea gidagween iyeenya.

¹⁸ Sina geeruubaji iyeenya bea dahaabu, ak gisini dea gadiyeeda gidayda aba meadajeega sean bea huuydeanda hoorgeeda baydeayda.

¹⁹ Sina geeruubajeanjagi ak giyiini huuydeanda meatkweenagi, ak niirja giyiin huuydeanda meatkweeda niirja bea hoorgeeda baydeayda, ak gidabal ea gilagi gil sea hoorgeeda baydeayda.

²⁰ Ak geeruubajeesu gayghamiinda meang'eega ak gwadukuta hoorgeeda baydeayda aba meang'eega nyaawa, nea gheamamuunatka nyaawa gaygoofursiinyi, gheamamuunatka geeruubajeesu gaygoofuursa hoorgeeda baydeayda.

²¹ Ak gajiina hoorgeeda baydeayda uhuuda sandakwajeanda ak giyiin jeeda sandakwajeanda ng'asheega muuwuunooda jea dagoonyi.

²² Gajeeroonyeena aba hoowa sea ang'iing'i ak gaydeabaloolnyi nea geandi uhuuda hoorgeeda baydeayda, aba bugusta Geeruubajeesu asiyeenya mida badayda sandakwajeanda muuwuunoodean gaydeabaloolnyi aba ng'asheega sean jea dagoonyi was digheanyeeka fuga Israeli.

Measeeda mukaatajeega sighadoawana ASEETA

²³ “Sina measeeda beehiida rabeangheeda geawundaanyi gaygaba geatin iyeenya, murdajeega gaygaba geatinagi, geawundaanyi gal humng'eeda gajea geatinagi gil ea gidagween iyeenya.

²⁴ Ak gidukuti aba dahaabooda miyaasiin ak gineaweesi ghealooda dahaabu meatkwajeega sean.

²⁵ Ak gajaneaweesiina meadajeega sean beehiida ayang'da mooneeda geatinda murdajeega, ak gineaweesi beehiidida ghealooda dahaabu jea ghoah beehajeega gidaghuuta.

²⁶ Ak gisini gharin ang'wan bea dahaabu, ak giyiini ghunoojigiga gujakaaschi asang'wan bea geeshangaaschi asang'wan.

²⁷ Iina ghunoojigiga murdeeda beehiidida bea measaan ak gajeeshuup geediga jea easareana measa.

²⁸ Ak gisini geediga was rabeanghajeega jea easareana measa, ak gidukuti aba dahaabu.

²⁹ Ak gisini giihearmajeagaaschi ea ganakwajeega jea eayiin geediga ng'andidi ea gikoombajeega ea gweerajeagaaschi jea eetalealiideawa haleanjeeni, ak gisini aba dahaabooda miyaas.

³⁰ Ak gajiina mukaateeyda giihiimnooda badayda measa bea madeedeanyu galeagasean.

Heeda siyiina gheaboonyaneeda

³¹ “Ak gaysina hoorgeeda gheaboonyaneeda sisna dahaabooda miyaas. Nea heeda hiing'aada ea darearjeanda hoorgeeda gheaboonyaneeda gajeataay; nea gikoombajeegaaschi, ea daghaniipkaaschi, ea deakghweadaanyi gaygwarina hijagi;

³² abeeda gaygwanda dameal lah riteawa murdajeagaaschi, dameal samwagu bea hoorgeeda gheaboonyanga mida murdajeagaaschi gwarina meatkweanagi nea dameal samwagu gwarina murdeeda hoorgeeda gheaboonyaga aba meatkweeda niirja;

³³ nea bayookcheew samwagu sisinda deakghweeda almondi, nea gaba nih mideawa daghaniipka ea deakghweeda, aba damealeandaanyi, ea bayookcheew samwagu sisinda deakghweeda almondi, nea gaba nih mideawa daghaniipka ea deakghweeda, aba uhuuda damealeanda nuut ak ea damealga alah rinna hoorgeeda gheaboong'nyeanda,

³⁴ nea uhuuda gheaboonyaneeda gwanda bayookcheew ang'wan sisinda almondi, nea manang'i mananuunat geeng'ooriida deakghweeda,

³⁵ nea manamba agi gaygwanda hing'eadayda damealeanjagi, ak gaba nih mida hiing'eadayba giliwas damwaalaan aba damealga alah rinna murdajeega hoorgeeda gheaboonyanga.

³⁶ Nea daghaniipkaaschi ea damealgaaschi gajea gilagi gil ak sean gajea gilagi aba gadiyeeda gidayda bea dahaabooda miyaas.

³⁷ Ak gaysisiina gheaboonyan ispwa ak gajeamiinda ak gayghaghwarda ghwayeat aba heeda was madeadaanyi.

³⁸ Nea ng'ushaptaanyi ea gweerajeagaaschi gajeesna dahaabooda miyaas.

³⁹ Ak gajeesin aba dalaanteeda dahaabooda miyaas, ea dabita sean.

⁴⁰ Asi ng'ula haleanjeeda sean sinda gidaahiimdaaydi aba uhuuda giijeeda.