RITEAYDA 23 - Bibliyeeda Ghaydit

Doobiiwnata ea alooheeda

¹ “Adirukwiidi ng'asheega ng'uyeega, ak adibareanyeewi siida muy seara, gayhuuwa muushoocheanda ng'uyeega.

² Adiyaadi geeshta eemeeda weay gwasin ng'asheega munyas, ghana amaseawa eemeeda weay gamuuwu ng'asheega ng'uyeega, aba gheeda girgweageeda, aba gideaba gaygahuta doobiiwnata siida,

³ adisissi siida bwarbwar shiitmeeda aba girgweageadaanyi.

⁴ “Inyas giroonyeewi digeeda roat bea weajoocheandaang'u, adeelsiina seabwa.

⁵ Inyas gidaahi digeeda siida sinyi nea niibeada ea sareenda, eara ea migassi adiidu gisuudi, weada ghang'eat.

⁶ “Adihuti gitoobiiwsa siidaang'u bwarbwar aba jeeda girgweageadaanyi.

⁷ Ang'aamwana geaw ng'asheega ng'uyeega adibwari fuga mandeawana giidiinyeanda ea gea doobiiweadi aba gideaba maydageandeawa munyinda siida muy.

⁸ Adiing'waanyi lapiyeeda seawshooda, aba gideaba seawshooda gayghwanung' gang'oowiidi gheanyanga fuga ang'wearu ak ghwadatas girgweageeda fuga doobiiweadi.

⁹ “Adooghabwaschi rabascheanda, agooga ghoanali giduurji guroorooda rabascheanda, aba gideaba ghayi eara agooga goowooschi rabasta aba ng'eanyiida Misri.

Gweanyeew ispwa ea eawooji ispwa

¹⁰ “Bwara ng'eanyi gweanyeew lah, nea gilaji boagaagu,

¹¹ ak gweaydeaba ispwa gaynung'waada madamnyeandaang'u gwalil, ak abeeda ghwanyas fugaagu barbari gichea ghwaak; ak abeeda gidabit gayghwaak sea diyeanga jarooda. Ak gaysindunu eara aba madamnyeandaang'u bea sabiibu ea madamnyeandaang'u bea saytuunajeega.

¹² “Gaysina gadiyoojigaagu eawooji lah, ak eaweedeaba ispwa gayfuufa, eara heeydaang'u ea digeadaang'u gaygafuuf, ak eara orjeeda soomjeandaang'u was gatmooda ea rabascheanda gaygafuuf.

¹³ Oang'waanya muuchi ng'asheesu seaniin earukuneegwean, adooruku gheawunga aseecheeka suuk, adeeyiing'isa eara ghuutaang'u.

Ghweelmooji samwagu hees

¹⁴ “Gaysinnean ghweelmeeda niba samwagu aba jeeda gweayda.

¹⁵ Gaysina ghweelmeeda mukaateeyda meamwatawiida, gawuurji gidearukuteaydi, gajaga mukaateeyda meamwatawiida eawooji ispwa, gajeesin damanda hit bea sheetamwan ghana ghawghaw, aba gideaba damanda ghayi oorinani ng'eanyiida Misri. Ea manda siida jea ghwahidu madeedeanyu nea manda geatinda gil.

¹⁶ Gajasina ghweelmeeda lajita booga, was haghweega madeeda bea madamnyeandaang'u, was gea ihisti aba jeeda madamnyeanda. Gajasina ghweelmeeda siiwaam booga bea muudeanooda gweayda, siiwaam leabu madamnyeanda ea haghweega gadiyeadaang'u.

¹⁷ Fugaagu was headiga gaygaweay madeeda NG'UTAMIIDA was ASEETA niba samwagu aba jeeda gweayda.

¹⁸ “Adiidu gisabi geadi foojeanda lukghumeedeanyu sea mukaateeyda simwatawiit, ghana nagheeda ghweelmeedeanyu adagoobiida heeda ea ghoah sakteayda.

¹⁹ “Gea madeeda was haghweega madeeda bea madamnyeandaang'u gajeani jeeda gheeda NG'UTAMIIDA was ASEATAANG'U. “Adiiwaali dayeenda mbooyda sea eanooga ghaamwat.

Neajeesiinda ea gichea eabeada

²⁰ “Ng'ula gaydeajeagu malaykajeanda goosheedeaweey madeadaang'u, gafurnyi aba naweeda, ak ghwaanyi ea ghoahiitaneey heeda easinneey.

²¹ Oaleaydiit ak ghoayiinyi ghuutaanyi, adiidu ghoaheawi ng'asheagaaschi, aba gideaba maygwasamsa riing'eedeang'wa aba gideaba gheawungeasu gwanda jeadaanyi.

²² “Nea iileeysiit ghuutaanyi aba huumwa, ak gisini ng'asheega sean eargu, abeeda gaydoaw weajoocheanda weajoodigaagu nea geawooschi siida jea gwasawan gea sawanyi.

²³ “Iyasheedeawaneey malaykajeandeanyu ak gawa madeadaang'u, ea ghoahiitaneey ng'eanyiida eemeeda Amori, ea Hiti, ea Berisi, ea Ganaani, ea Hifi, ea Yebusi ak gaydaghuuta eemoojisu,

²⁴ adiihiing'si geaw aseecheeka nyaawa, nea adibaday saawa, nea adiyaadi geeshta ng'asheega nyaawa, ak gaynung' goosha saawa, nea gihirjeaweadi daranajeega nyaawa.

²⁵ Ak gajabata NG'UTAMIIDA was ASEETEANG'WA, ak gaydagoonyi badiischooda ea hamitaang'u ea beega, nea geageandeawi geeyooda jeedeang'wa

²⁶ Ak ea maygwanda gatmooda jea gwajakta jeeda ghana dea was soonooda aba jeeda ng'eanyiidaang'u, ak gaydaasaang'ayiit askwearjoojigaagu.

²⁷ Gaydeajeagu gharbeedeanyu gawa madeadaang'u, ak gaydanung' ghang'ut muuwda fuga sean jea ghapka ng'ucheeda, ak gaydanung' ghwayam geat weajoodigaagu sean gabiikta.

²⁸ Ak gaydeajeagu gheareemanga ghapka madeadaang'u, ak gayghahoan eemeeda Hifi, ea Ganaani ea Hiti, aba madeadaang'u.

²⁹ Fiisu maydahoan aba madeadaang'u aba jeemba gwanyagi ea ghoah ng'eanyiida dareapcheeda ak gayghamway diyeanga dareabeeta ng'eanyiisean ak goodeawiinyi.

³⁰ Gaydahoan saawa gilimwanang' mwanang' aba madeadaang'u, ea nyasa fuga deayeat ak gihearani ng'eanyiida.

³¹ Ak gaydayiin moonghoadaang'u ghang'eada basooda Shaamu ea gawa basooda Filisti, ak ghang'eada dareapcheeda ea gawa eenda Furati, ak gaydayiin fuga mida jeeda ng'eanyiida geatingaagu, ak gayhoana saawa ghang'amwa madeadaang'u.

³² Adisini neajeeda sea saawa, ghana aseecheeka nyaawa.

³³ Adagoobiida ng'eanyiidaang'u, gajiidu geanung' sinnean riing'eeda, aba gideaba inyas gibadayi aseecheeka nyaawa, ng'asheanji abeeda gayghoah ghaseeda aba headaang'u.”