RITEAYDA 21 - Bibliyeeda Ghaydit

Gidamiisa soomjooga

¹ “Asi ghamneawa suh deaweedajeega jea iina madeenyaawa.

² Inyas gishahi soomjeanda fuga Ebraniya, abeeda gaygagadiiy gweanyeew lah, ak gweaydeaba ispwa gisiksi goobal geaw nea mwaada gil.

³ Iihidu nea gabwageaw gaygawa nea gabwa geaw, iihidu nea nigeeshi, abeeda gatmoadaanyi gaygawa nea goodeayi gatmoadaanyi.

⁴ Inyas gwanyaksa siidaanyi haw gatmooda ak gwajiilsa niny baloojiga ghana haweega abeeda gatmooda ea diibiga gaygaba siida haw ak niny gaygawa nea gabwageaw.

⁵ Ak inyas gwayi soomjeandida, ‘Aniini ghaabwariinyi siideanyu haw, ea gatmoodeanyu, ea diibigeasu, ak ea maydawa nea geabali geaw,’

⁶ hean iing'ata gaygweadu siidaanyi haw heeda ASEETA, ak gaygweadu ea ghwahidu gidaghuuta ghana gidingeenda gidaghuuta, ak gayghwasaaw siidaanyi haw iitaanyi aba sheawuuda ak gaygagadiyeesa niny gweanyeeka sean.

⁷ “Siida iishaayda hudaanyi ghoah soomjeanda abeeda ea mayghabeada gidabadiiniida soomjooga was headiga.

⁸ Ak iimeahoosana siidaanyi haw was dea anyeari niny aba badaydaanyi, abeeda gayghamwas eetin, ak niny ea mandeawana uurda jea ghwashaayda gawa heeda fuga was rabasta, aba gideaba gwasin ng'asheega mwadoabiiwa.

⁹ Inyas gagasa gideaba gayghaghi orjeedaanyi, abeeda gaygwahinda gidamiisa hudaanyi.

¹⁰ Siida inyas ghaghi gatmu nuut ea adaghwasuuy gichea ghwaak gatmooda haw, ea hang'weaka, ghana beata heeda.

¹¹ Ak iimasissiina gatmooda haleanjeeni asamwaguuni, abeeda gaygawa gatmoodida nea ng'eedeeda ea mwajeataw gil.

Deaweedajeega fuga bara buuneeda

¹² “Siida inyas ghabwar siida ea ghami, eara niny gajeenuus.

¹³ Nea iimanapa ng'uyeega ak ghoamuughu niny ak ghwanung' ASEETA goobeedeaysa geatindaanyi, abeeda gaydaahiimu heechea gamng'awsa.

¹⁴ Nea siida iiweesa niirja aba milmilanda nea gagasa gwanuus abeeda siisi ageandeawana heeda wagiideanyu, ak geenuus.

¹⁵ “Siida bwar ghwaan ghana ghaamwat gammiisa eenuus.

¹⁶ “Siida inyas gwajagwat siida ak gawa ghwashaayda ghana eanyasa geatingaaschi, abeeda siisi gajeenuus.

¹⁷ “Siida inyas ghamwaashta ghwaan ghana ghaamwat abeeda siisi gajeenuus.

¹⁸ “Iijal fih iyeenya ak gwasawan niirja siida aba lagheaneeda ghana gagul aba gundiidaanyi ak ea mwami siida geeghus gideaba gawa muunda,

¹⁹ ak iidu iing'eat gicha ak gawa jarooda nea ghang'uda ng'eanyi bileangidaanyi, abeeda siidida fudiin gajeesiksa ak geeghus gideaba gayghawalda damandida roat bea siidean, ak gayghoarear ea ghahaap muuchi.

²⁰ “Siida iibwar soomjeandaanyi, was ng'eedeeda ghana gatmooda, aba bileangida ak gameewsa soomjeanda geatindaanyi, abeeda siisi gajeayaaga ghoorjooda.

²¹ Nea soomjeanda iimwami eaweeda madeeda ghana eaweedeaba iyeenya, ea maygudeergweaksa, aba gideaba soomjeanda niiwa daanyi aba lapiyeadaanyi.

²² “Inyas gabearji headi iyeenya, ak gwasawan akaleala gatmooda was bungaroocheanda ea gwajakta jeeda ak abeeda ea manda sawanadeeda nuut bassa siisi sawaniin, gajeayaaga ghoorjooda, jea gwarugu siyeedeaba gatmooni ea fuga laja girgweaguutka.

²³ Ama inyas gweadu geeshta sawanadeeda abeeda gajeakghiisa eaweega eaweega suurja,

²⁴ gheang'da ea gheang'da, geeshadeeda ea geeshadeeda, geatinda ea geatinda, geeshta ea geeshta,

²⁵ ghwardeayda ea ghwardeayda, deaneadeeda ea deaneadeeda, bileangida ea bileangida.

²⁶ “Siida inyas ghwalas gheang'da soomjeandaanyi, was ng'eedeeda ghana gatmooda, ak gwasawan, abeeda gaygwasiksa soomjeanda gawa aba badayda gheang'daanyi.

²⁷ Ghana iiloata geeshadeeda soomjeandaanyi was ng'eedeeda ghana gatmooda, abeeda gaygwasiksa soomjeanda gawa aba badayda geeshadeadaanyi.

Deaweedajeega fuga bea haleanjeeda

²⁸ “Heeyda inyas ghang'uda gujaweeda siida was ng'eedeeda ghana gatmooda ak gameewa duwaawi, abeeda heeyda gajeefta lagheanga ea ghami, ak banyeagaaschi ea majeayaak, ak siida bea heeyda ea majeergweaksa.

²⁹ Ak heewi ghayi iibean gang'utu, ak ea sirukusa seabwa ng'asheanji, ak ea maduupeena gil, ak iidu gwanuus siida was ng'eedeeda ghana ea gatmooda, abeeda heewi gajeefta lagheanga ea ghami, ak eara siida bea heewiin gajeenuus.

³⁰ Iideepa eaghwalda leadeeda aba badaydaanyi, abeeda gayghoadayda aba badayda giitinooda eaweagaaschi aba gida wassean siyiin badaydaanyi.

³¹ Heeyda inyas ghang'uda gujaweeda orjeeda ghana huda, ak gwasawan, geatinda jea eabwat aba deaweeda diida gil.

³² Nea iing'ut soomjeanda was ng'eedeeda ghana gatmooda, abeeda seabwa gayghoadaw siida haw bea soomjeanda shiliingaji diktam ea damanamughuush, ak heeyda gajeefta lagheanga ea ghami.

³³ “Siida inyas ghwanung'waada shoomanda ghoabwara ghuut ghana ghaghurghur shoomanda ak ea madukuta, ak ghoabita jeeda heeyda ghana digeeda,

³⁴ siida bea shoomanda gayghoadoabiiw gayghoadaw siida bea heeyda ghana digeeda lapiya, ak heeydida meahiin gajeadaanyi gil.

³⁵ “Inyas gabearji heewbwa siyagi ea ghami niirja, abeeda gajeeshaayda diida duu gwandean, ak geelaja lapiya ak heeydida meahiin gajeelaja.

³⁶ Ghana iisinal gideaba heeyda ghayi gabean gang'utu, nea seabwa ea maduupeena gil, abeeda gayghawalda heeyda hoorgeeda heeyda, ak heeyda meah gajeadaanyi gil.