RITEAYDA 19 - Bibliyeeda Ghaydit

Fuga Israeli aba giijeeda Sinayi

¹ Nea geeng'usha sheedeaba samwagu bea damanda rina fuga Israeli ng'eanyiida Misri, eaweedida ghwahita dareapcheeda Sinayi.

² Saawa abeeda ghang'eada Refidimu ama siihiiidu dareapcheeda Sinayi geewus aba jeeda dareapcheeda, ak gawus fuga Israeli aba madeeda giijeeda.

³ Hean gwadiyeada Musa gawa uhuuda giijeeda heeda ASEETA, ak gaguursa NG'UTAMIIDA Musa aba uhuuda giijeeda nea gwayeesha, “Rukusiina fuga gheeh Yakobo, nea giyeeshi eara fuga Israeli.

⁴ Noadaayi gideasimi fuga Misri ea gida aasareandaneegwa gawuurji gidasareeniida rabearda diibigaaschi aba meang'eega, ak geayeaneegwa heedeanyu.

⁵ Asi ghamneawa inyas gooleeysean iit ak ghoamwaschi ng'asheegeasu, nea ghoang'waanyi neajeedeanyu, abeeda gajawoosa fugeasu miyaasiin aba bugusta buuneesean aba gideaba ng'eanyiisean deanyu,

⁶ ak gajahuuwa aba heedeanyu sugoocheanduumeeda ashoohoodiga, ea eemeeda ghaydit. Suh ng'asheega jea rukusiina diibiga Israeli gil.”

⁷ Hean gawa Musa ak gaguursa gweargwa Israeli, ak gwarukusa aba madeeda nyaawa ng'asheega sean rukusa NG'UTAMIIDA niny.

⁸ Ak ghwasha buuneesean nea gwayeesha, “Gajeesina ng'asheega sean rugu NG'UTAMIIDA.” Hean ghwaat Musa iita ng'asheega buuneeda heeda NG'UTAMIIDA.

⁹ Ghwalamda NG'UTAMIIDA ak gwayeesha Musa, “Gaydahidu headaang'u nea geandi jeeda shamooghooda, ak gwayiing'shi buuneeda damanda eabaloolaneeyi, ak ghamwasnyi damanda manda muudeanooda.” Ng'ata gwarukwiisa Musa NG'UTAMIIDA.

¹⁰ Ak gwayeesha NG'UTAMIIDA Musa, “Una heeda buuneeda ak ginung' ghoamiidu geat ghamneawa ea numuji, nea goohuun eara hang'weaka nyaawa,

¹¹ nea ghaghamwat geat eaweedeaba samwagu aba gideaba eaweedeaba samwagu gayghwararang'aana NG'UTAMIIDA uhuuda giijeeda Sinayi, ea ghwahidu madeeda buuneesean.

¹² Ak gisisi moonghooda buuneeda nea giyeeshi, ‘Adiidu gooding'di uhuuda giijeeda nea adiidu ghoasachi eara moonghoadaanyi, ak siida wassean sat giijeeda gajeanung' ghami,

¹³ nea manda siida jea ghwasat niny, aba gideaba gajeefta lagheanga, ghana eang'uda ng'uta, gilinyoo ea diyeayda gil ghanea siida gil iisat giijeeda gayghami.’ Inyas ghwayiiy buuneeda ghuuta durumbeati abeeda dadiyeana buuneeda ghapka uhuuda giijeeda.”

¹⁴ Hean ghwararang'aana Musa uhuuda giijeeda ak gawa heeda buuneeda, ak ghwanung' ghoamiidu geat buuneeda, nea goohuun hang'weaka nyaawa.

¹⁵ Ak ghwalamda Musa ak gwayeesha buuneeda, “Aghamwada geat eaweedeaba samwagu, nea aduwi heeda gatmooda.”

¹⁶ Hean sakteayda bea eaweeteaba samwagu ghwahidu giighweandandeeda ea dadamandeeda, ea dung'usta haw aba uhuuda giijeeda, ea nyeashta haw bea durumbeati ea ghabeal buuneesean mida jeeda maheemajeanda.

¹⁷ Ng'ata gooruuna Musa buuneeda jeeda maheemajeanda ak ghwaat gwaroonyi ASEETA, ak ghamiinaada aba geeshta giijeeda.

¹⁸ Ak gwarina giijeeda sean bea Sinayi aroosta, aba gideaba ghwararang'aana NG'UTAMIIDA jeeda beasta, ak gwadiyeada aroostida nea gawuurji aroosta beasta duwayda geeyi bwak ea ghaboadan giijeesean.

¹⁹ Iidu nea niraanya nyeashta durumbeati goobalool Musa ASEETA, ak ghwasha ASEETA aba jeeda gighweendandeeda.

²⁰ Ak ghwararang'aana NG'UTAMIIDA uhuuda giijeeda Sinayi, was uhuuda giijeeda heeda geaw, ak gaguursa NG'UTAMIIDA Musa gawa uhuuda giijeeda heeda geaw, ak gawa Musa gwadiyeada.

²¹ Ghwalamda NG'UTAMIIDA ak gwayeesha Musa, “Una rarang'aada ak gireekusi buuneeda, gideaba adiidu gwasin naweeda ak ghapka heeda NG'UTAMIIDA, ak goosha gea saang'a aba jeenyaawa.

²² Eara ashoohoodiga damiina geat damanda mii ghapkaana heeda NG'UTAMIIDA, aba gideaba adiidu geanyareeksi saawa.”

²³ Ghwalamda Musa ak gwayeesha NG'UTAMIIDA, “Buuneeda mayghapka uhuuda giijeeda Sinayi, aba gideaba ghayi giyeeshiineasa, ‘Asina moonghooda aba murdeeda giijeeda ak ghoakghaydiichi.’”

²⁴ Ak gwayeesha NG'UTAMIIDA niny, “Una rarang'aada ak gischeeng'u nea giideani Haruni nea ashoohoodiga ea buuneeda ea adagwascheeng'u ghapka heeda NG'UTAMIIDA, aba gideaba adiidu geanyareeksi saawa.”

²⁵ Hean ghwararang'aada Musa gawa heeda buuneeda ak gwarukusa saawa ng'asheegiga.