RITEAYDA 15 - Bibliyeeda Ghaydit

Sarmeeda Musa

¹ Ng'ata gwasarmasa Musa sea fuga Israeli NG'UTAMIIDA, nea geeyi, “Gaydasarmasa NG'UTAMIIDA, aba gideaba ea ghaambiidaat muuchi, nea faraasajeega ea siida ding'da gwahisa jeeda basooda.

² NG'UTAMIIDA uurdeanyu gil ea sarmeedeanyu, ak ea niiw lealeanoodeanyu; nih ASEETEANYU ak gaydaduumsa, niny was ASEETA bwaabwa, ak gaydaaghaambiit niny.

³ NG'UTAMIIDA siida ng'ucheeda, NG'UTAMIIDA gheawungaaschi.

⁴ “Gwajaksa mutukwajeega Farao ea shirikareadaanyi jeeda basooda, ak fugaaschi hees siloat ea niibita jeeda basooda Shaamu.

⁵ Ak ea nidukuta saawa basooda haw, ak ea niibita uuta beega gawuurji lagheaneeda.

⁶ Ea NG'UTAMIIDA geatindaang'u bea dugwa gwandeawa giigheambiita ea uurda, Ea NG'UTAMIIDA geatindaang'u bea dugwa nijoar weajoodiga.

⁷ Aba hawundaang'u ea nijoari weajoodigaagu; giyeasi nyarastaang'u, ak ghwaakta saawa mbarariida.

⁸ Aba jeameeda sareadaang'u giischeeng'u beega, ak ghamiinaada laweajajeega gagal humng'eeda nea gawuurji dulgwajeanda; ak ghoanoas beega saang'a bugusta basooda.

⁹ Ak gwayi weajoocheanda, ‘Gaydaat geeshta, ak gaydageanda, ak gaydalaja haleanjeeda, ak gaygoolang'uudan saawa. Gaydamwaghaada ng'uteanyu, ak gaydanung' gwanyara saawa aba geatindeanyu.’

¹⁰ Ghaghuudu jeameadaang'u ak ghwanung' gwadukuta basooda, ghoabitaayda lagheaneeda jeeda beega saang'a.

¹¹ “Ea NG'UTAMIIDA, gawuurjeeweey ng'eaha aba bugusta aseecheeka? Daamdaamwaat aba gilinyoo gadiya nea gwasin ng'asheega deamdeameadi.

¹² Niihaakti geatindaang'u bea dugwa ak ghwanukghuta ng'eanyiida saawa.

¹³ “Niidoabiiwi aba bariinyeagaagu bea huumwa fuga ghayi ilealu, ak giihaaghwiidi saawa uurdaang'u.

¹⁴ Hean nea gwayiing'shi fuga eemoojiga gaboodani, niing'waay lajooda gea mida ng'eanyiida Filisti.

¹⁵ Ak ghamneawa sugoodiga ng'eanyiida Edomu ea nihamng'eanyi, nea fuga hees bea Moabu saawa ea niboodani, ak eara fuga sean bea Ganaani ea nidariida.

¹⁶ Niibisa muuwda ea giyoonda, aba uurda geatindaang'u ak gwayi saw gawuurji lagheaneeda, ea ghoaghaaw fugaagu, Ea NG'UTAMIIDA ea ghoaghaaw fugaagu ghayi ishaahi

¹⁷ Ak gajeani saawa gah, ak gajadiing'da saawa uhuuda giijeadaang'u, heeda isissi geaw was giibindaang'u Ea NG'UTAMIIDA, hooweani iimajeegi aba geatingaaguun Ea NG'UTAMIIDA.

¹⁸ NG'UTAMIIDA gaygoombaliischi damanda manda muudeanooda.”

Sarmeeda Miriyamu

¹⁹ Aba gideaba faraasajeega Farao ea mutukwajeagaaschi ea fugaaschi ding'da faraasajeega hean nea gaweay jeeda basooda, ng'ata ghwanung' NG'UTAMIIDA gabiiksiinyi beega, nea fuga Israeli gaweay aba bugusta basooda nea gwasik heeda ghajaam.

²⁰ Ghang'eat Miriyamueeda was sibaneeda bea geenyea Haruni, hean gawa nea ghwaada geat bundiida, hean ghaat geeshta gadeemga sean nea gaba siisi mideawa bundiida, gaweay nea ghang'was.

²¹ Hean gwasarmasa Miriyamu saawa nea gwayi, “Asarmasiina NG'UTAMIIDA, aba gideaba ea ghaambiidaat muuchi, gwajaksa faraasajeega ea fuga ding'da faraasajeega jeeda basooda.”

Beega ng'weani

²² Hean ghoadoabiiw Musa fuga Israeli gaweay mwadi nea ghang'eada basooda Shaamu, ea ghwahita jeeda dareapcheeda Shuri, ak gaweay eawooji samwagu aba jeeda dareapcheeda nea meanyasa beega.

²³ Iidu nea geehita hiji siguura Meara, ea mudeali beega Meara aba gideaba ea ng'wean, hean ghoah gisibaysiina eeguura gheawungaaschi Meara.

²⁴ Hean gooniiksa buuneeda Musa nea geeyeesha, “Gajealeaha naaha?”

²⁵ Hean gooyeawusa Musa NG'UTAMIIDA, ak goohiimsa NG'UTAMIIDA Musa geeta, ak gageanu ghoabuuta jeedeaba beegiga, hean gwanyeaniidi beega, ak ghoadaw NG'UTAMIIDA diigheanda, nea goorgweaksa nea ghoanaal,

²⁶ nea gwayeesha, “Inyas giileeysiit ghuuta NG'UTAMIIDA was ASEATAANG'U, ak gisini ng'asheega doobiiweadi aba madeeda gheanyangaaschi, nea giileeysiit giirukuneey, nea giing'waanyi diigheanyeekaaschi sean, abeeda maydanung' ghoang'waanyi geeyooda wassean ghayi aang'udi fuga Misri aba gideaba aniini geawooschi NG'UTAMIIDA aheapeey.”

²⁷ Hean geahita hiji siguura Elimu, hiji mida gheanyang'spa eeni damaniyeenya bea beega ea miilay laadam ea damanamughuush, ak gawus aba hoowa mida beegean.