NAHUMU 3 - Bibliyeeda Ghaydit

¹ Dashageada mujiineeda foojeanda, nyiit ng'uyeega sean ea ging'ooyda buuneeda– ak ea mamuudeana giireeta buuneeda bea haleanjeeda!

² Nyeashta mughoowooda, ea nyeashta geeshanga, ea faraasajeega angiir mutukwajeega!

³ Siida ding'da faraasi ninyareas, ak gooyuuk ng'uta ea ng'uta dadamwan, aba lugweega sibwar, sea mughuusheanda muscheeka, fuga meewa mamuudeana– ak gwaruusa muscheeka!

⁴ Ea giteena seang'ayda hiseadayeanduumeadaanyi sean hiseada, bwada alooheeda beeneetkweanduumeeda, ak gwasawan eemoojiga aba hiseadayeanduumeadaanyi, ea buuneeda aba beeneetkweanduumeadaanyi.

⁵ Ng'ula, aniini Neanyareekseey, gwarugu NG'UTAMIIDA bea lugweega, ak gayghoamwaalda hanang'weendigeagwa ak ghwayiin gheamamuunatkeagwa; ak gaydanung' gang'ula eemoojiga dawiishnataang'u ak ghwadaah sugoodiga baspaseegaagu.

⁶ Ak gaydahisaneey haleanjeeda munyas nea geafooleegwa ak gaydanung' eeng'uleey, nea geebareeweey reari.

⁷ Nea fuga sean ng'uleey gaygwanung'useey heeda nea gwayi, Ninawi sinung'usa heeda; gaygagiisasa ng'eaha niny? gayghabwayda ng'eaha niny?

⁸ Ang'iing'i guwoosi miy ea ng'ala Debesi ghayi apteada aba ghuuta eenda Nayli, nea gwaneaweesa beega, ak igeamboadaanyi ea basooda, nea beega ea ghamardaanyi?

⁹ Gushi uurdaanyi gil, sea Misri, ak ea manda giideenda; nea Butu ea Libya ea weedangaaschi.

¹⁰ Ak eara gwasa geayaat, ak gawa jeeda soomjeandumeeda; diibigaaschi manang'i geabwaashaada aba hijiwas dardeayda naweadinga; nea fuga nyaawa sisiniisa mureeda geeng'alealeesa, nea fugaaschi sean hees geerada aba munyaloalajeega.

¹¹ Ak eara ang'iing'i gayboogida, ak gajeefunyi; ak gaygasa heeda jea fuysiina geaw aba heeda weajoocheanda.

¹² Muhealuutkaaschi sean gawuurji shaboogheeta mideawa dayeega madeeda hees bea shaboogheeta– ama siituumduum goobitpisa ghuuta siida jea ghwaak.

¹³ Ng'ula, lugoadaang'u niwuurji gadeemga. Dooshinga ng'eanyiidaang'u ghoabwara ghuusi aba heeda weajoodigaagu; ak ea niyaak beasta gidaghuudajeegeagwa.

¹⁴ Ramwa beega aba gideaba gajeeneaweeseey, amajeega ghamardeang'wa; una sina sheang'weeda, ak gisini duwayda, ak gisini gida jea sinana mwatafwaari!

¹⁵ Ak gwanda beasta jea ghwaaknyi, gayghwalachnyi ng'uta. Gayghwaaktaneey gilaknyi deashamga. Oasaang'ayiita deashamga, asaang'ayiita dakajeega!

¹⁶ Nisaang'ayiit fugaagu ageakshi ea gaburdeawa miinga humng'eeda. Deashamnyeanda iissa ghoayaaw meang'eagaaschi ak ghang'eata gawa.

¹⁷ Fugaagu hees gawuurji dakajeega, ng'oorshoodiga gawuurji shamooghuutka deashamga abitpisa uhuuda hilooga aba eaweeda gooroogeeda– ama dagu daknooda, ghang'eat ng'eata gaweay; ak ea manda siida nal heeda mida.

¹⁸ Agooga jeagiischoodiga goolili, Ea sugoocheanda Ashuru; fugaagu hees gwalil. Fugaagu nidarsa iheenga giijeega ak ea manda siida jea ghabwada geat.

¹⁹ Manda siida jea ghabwayda sawanadeadaang'u, deaneadeadaang'u mayghahaap. Fuga sean iiy iitaang'u ghabwar geatinga nyaawa aba badaydaang'u. Ak gwanda siida niidaraam ng'weanindaang'u measheala?