MALAKI 2 - Bibliyeeda Ghaydit

¹ “Ak ghamneawa, Ea ashoohoodiga, asi nih diigheandeang'wa.

² Iimoaleaydani iit, ak ea meayiini jeesinga gurooruunatkeagwa ak ghoaghaambiit gheawungeasu, aba girugu NG'UTAMIIDA bea lugweega, abeeda gaydanung' ghwahidu mooshteayda badahuukeagwa ak gaydamwaashta ghawoodeang'wa; nea aba huumwa ea nigeawiit damwaashta saawa, aba gideaba mii ayiina ng'asheesu gurooruunatkeagwa.

³ Ng'ula, gaydala jeacheengeagwa ak gaydayeasha gheamamuunatkeagwa heelga, heelga haleanjeedeang'wa oaghadoawandi, ak gaydaang'aamwaneegwa madeedeanyu.

⁴ Abeeda gajanala gideaba diigheanji geagoonyi, ak abeeda gamajeegiit neajeedeanyu aba heeda Lawi, nih gwarugu NG'UTAMIIDA bea lugweega.

⁵ Neajeedeanyu sea niny neajeeda manda muudeanooda ea hoyyoo, ak ghaadawji saawa niny, ak abeeda ghaabeali; ak ghoawalan aniini, ak ghamiinaada nea ghabwat gheawungeasu.

⁶ Ghuutaanyi gwanda diigheanda huumwa, ak ea manda ng'asheanda muy nirina ghuutaanyi. Iissa geadeayeewi aba hoyyoo ea doobiiwnata, ak ghwayam fuga saang'a ea ghwanung'waada ng'asheega munyas.

⁷ Aba gideaba ghuuta ashoohoocheanda gagasa gwarugu ng'asheega fughareeda, ak gagasa buuneeda giinealshooda aba ghuutaanyi, aba gideaba niny giijasoocheanda NG'UTAMIIDA bea lugweega.

⁸ Ak ea noasajaadawi naweeda; ak ea noanung' ghwaschoarda fuga saang'a aba deaweedajeegeagwa; ak ea naabwari darari neajeeda Lawi, gwarugu NG'UTAMIIDA bea lugweega,

⁹ ak ghaanung' eefooleegwa nea geesawaneegwa aba madeeda buuneesean, gawuurji gidameang'waaydani ng'asheegeasu ak ghoahiimu shiitmeeda aba jeeda deaweedajeegeagwa.”

Nyoota doobiiwnata buuneeda aba heeda ASEETA

¹⁰ Neada aseasa eesa sean ea meebeahi ghwaanagi? Neada ea masineasa ASEETA asakaleala? Abeeda ghwasaan inyas meendeawani masaweega aba hichpa nuudiini, ak goofooli neajeeda ghweanigaasa?

¹¹ Abeeda fuga Yuda nijakta mureeda, ak gwasin ng'asheanda muy aba jeeda Israeli ea jeeda Yerusalemu; aba gideaba Yuda niibwara darari heeda ghaydit bea NG'UTAMIIDA, was heeda bwariiy, ak ghaghi huda bada aseecheeka eemoojiga.

¹² Gagasa ghwasach NG'UTAMIIDA aba jeeda maheemajeega Yakobo, aba gideaba siida wassean sina ng'asheesu ghana gamuuwu ghana ghwasha, ghana gweadu haleanjeeda ghadooweeda heeda NG'UTAMIIDA bea lugweega!

¹³ Ak goobiikti asina ng'asheanji. Goodukuteawi dabeaka heeda wagiida hean NG'UTAMIIDA, aba shooka ea giiseaneega aba gideaba mudu gagasa haleanjeeda ghadooweeda ghana ghamwas bariinyeega haleanjeeda geatingeagwa.

¹⁴ Ak ghoanyaashti gideaba, “Ghwasaan inyas mamwasa?” Gweagu gideaba NG'UTAMIIDA muushoocheanda neajeeda gil aba dageascheadaang'u ea dea gatmooda gheareemaneanduumeadaang'u, amadu ea mudu sisiina mureeda, earapeadi was dea indeawi was gatmoadaang'u bea neajeeda.

¹⁵ Neada ea masineegwa ASEETA ahuwa siyagi ak gagooneasa guroorooda ea eaweega? Ak gabaysiina naaha niny? Gagasa ahuwa haleanjeeda ASEETA bea ghadooweeda. Asi ashageada, adagwanda siida masisiina mureeda gatmooda gheareemaneanduumeadaanyi.

¹⁶ “Aba gideaba aniini ghaasichi nung'ooda, gwarugu NG'UTAMIIDA was ASEETA Israeli, ak ea meagassi iimida jeedeang'wa siida sima gatmoadaanyi ng'asheega munyas, gwarugu NG'UTAMIIDA bea lugweega. Asi ashageada geat ak ea adagabayseegwa mureeda.”

Eaweeda girgweaksiinda nineekiit

¹⁷ Ang'iing'i niibuuri NG'UTAMIIDA aba ng'asheagaagu. Ak gooyeenyi, “Neada aseasa geepuurdiin niny?” Iisiyeenyi, “Siida sina ng'asheega munyas aamiy aba madeeda gheanyanga NG'UTAMIIDA, ak ghabwariiy.” Ghana ghoanyaashta gideaba, “Gwanda yeenu ASEETA doabiiwaat?”