Lukka 23 - Bibliyeeda Ghaydit

Yesu aba madeeda Bilato

¹ Ghang'eatng'eat fugiga sean bea girgweageedean ak ghwaat madeeda Bilato.

² Geang'eat giihaakteayda nea geeyi, “Geadaayi siisi nea ghoaschoarda eemeedeanya, aba gideaba ghoaghuumwaneesa ea meatawi Gaysari gwaadi nea gwayeena niny Gristoyda was sugoocheanda gil.”

³ Ghoanyaash Bilato nea gwayeesha, “Asi ang'iing'i guwoosi sugoocheanda Yahudi?” Ghwasha niny ak gwayeesha, “Gidirukuteaydi ang'iing'i gil.”

⁴ Gwayeesha Bilato Ashoohoodiga hees, ea eemeeda, Mwaadaahi ng'asheanji muy aba badaydeaba siisi.”

⁵ Goodiiktiiksa muuchi nea gwayeeniisa, “Siisi ghoang'waal buuneeda aba giinealshoadaanyi aba ng'eanyiida Yahudi sean, ghang'eada Galilaya ea ghwahidu hiji.”

Yesu geayaat madeeda Herode

⁶ Iiy Bilato ng'asheesu ghoanyaashta siisi ea gaba ng'eanyiida Galilaya.

⁷ Nyas iita gideaba gwanda ng'eanyiida sugoocheanda siyi Herode, ghwaat heeda Herode aba gideaba damandida gwanda Yerusalemu.

⁸ Gahoosan Herode muuchi iidaah Yesu, aba gideaba ghayi nigeawiit gagaseadayi deaktaanyi, aba gideaba ghayi ninyas iitaanyi nea gagasa ghwadaah gwadeagooda jea gwasin.

⁹ Ghoanyaash ng'asheega saang'a; ak ea mwasha.

¹⁰ Ghang'eatng'eat ashoohoodiga hees ea ng'oorshoodiga ak ghoahaakta muuchi aba uurda.

¹¹ Gafool Herode sea shirikareadaanyi ak gwajuuga, ak geekwealsa hang'i mideawa oormeeni miy ak geatealda heeda Bilato.

¹² Ghang'eada damandida gwaduupchi Herode ea Bilato, aba gideaba ghayi aba mwadi gwanda furjeeda dageascheeda nyaawa.

Yesu geergweaksiina miyeeda

¹³ Iidu gaguursa Bilato ashoohoodiga hees sea fuga ahaaghwa ng'eanyiida ea buuneeda,

¹⁴ ak gwayeesha saawa, “Siisi gooyeadu heedeanyu nea gooyeenyi nischoarda buuneeda. Iidu nea geasikteawi ng'asheanji aba madeedeang'wa, ea mwaadaahi aba headaanyi giidiinyeanda was sean oahaaktaawi;

¹⁵ nea eara Herode goodeelneasa siisi aba gideaba mandeawana giidiinyeanda miisa miyeeda;

¹⁶ aba sareani gaydanung' eabwar ak geasiksi gawa.”

¹⁷ [Aba gideaba iissa gammiisa gideaba gaygootissa siyagi mida ghealooniga aba damanda ghweelmeeda.]

¹⁸ Hean goojuur sean nea gwayi, “Geanda siisi ak gisiksi Baraba”–

¹⁹ nea niny ea siida sijaksa ghealooniga aba gideaba ghwanung' ghaghoakghoayda eemeeda mujiini ea gideaba gwanuus siida.

²⁰ Gabiikta Bilato goobalool saawa nea gagasa gwasiksa Yesu;

²¹ goojuur nea gwayeesha, Angoora, Angoora niny!”

²² Gwayeesha gicha deaba samwagu, “Nea giidiinyeandeaba siisi ea naaha gil?” Mwaadaahi ng'asheanji jea eenuusa, asi gaydabwar ak geasiksi gawa.

²³ Goojuur muuchi aba uurda nea gagasa eengoor. Ea gwajooriischi giijuureanda nyaawa.

²⁴ Goorgweaksiinda Bilato gidagasiida buuneeda.

²⁵ Gwasiksa siidida ghayi sijaksa ghealooniga nung' ghaghoakghoayda buuneedean, ea gideaba ninuus siidean, was dea gasa saawa; ak ghoadayda Yesu aba gidagasiida saawa.

Yesu geengoor

²⁶ Iidu nea geayaat, geeroonyi Simoneeda ng'eanyiida Girene, nea abeeda gwaleabu neayeeda, ak geang'waay ak geanung' ghwasar beehiidida nea ghwaat Yesu geeshta.

²⁷ Ak ghwaat geeshta eemeetuw, ea gadeemga aat geeshta nea gagutu heareega nea gooyeawda.

²⁸ Gwayamsa geaw Yesu ak gwayeesha, “Haweega Yerusalemu, adooyeawdaneani, ooyeawda geat ea diibigeagwa.

²⁹ Asi ang'ula, gayghwahidu eawoojiga jea gwayeena, ‘Ghang'wana gea was soonung'weega, ea jeesinga moang'wa gwaji, ea gidinga miyeereer!’

³⁰ Hean gaygwayeesha giijeega, ‘Oopeedeayseasa’; ea heayeeniga, ‘Afunyeasa.’

³¹ Aba gideaba iisisissa ng'asheesu geeta shabwaat, gaygawuurjiin aba geeta ghajaam?”

³² Hean geayaat eara fih iyeenya adiiy eenuusuudayi niny.

³³ Iidu nea sihita hiji siguura Geapkeeda Uhuuda, geengoorsa uhuuda beehiida, sea fugiga adiiyiin, dea manda geatinda dugwa niirja gwanda geatinda ghaadaam.

³⁴ Ak gwayi Yesu, “Bwaabwa, eaniyean samsiina fiisu; aba gideaba mwanala gissin.” Hean geelaja hang'weakaaschi ak geeng'alealeesa.

³⁵ Ghamiinaada buuneeda nea geeng'ula, nea fugiga ahaaghwa ng'eanyiidean gang'ula nea gwashika nea gwayeena, “Gwalealu suurja, asi dalealna geaw, iiwas Gristoyda ASEETA loat niny!”

³⁶ Eara fuga shirikara gwashika ak gaweesa ak ghoadaw beesu ng'weani,

³⁷ nea geeyeeniisa, “Iiwoosi sugoocheanda fuga Yahudi, gilealu geaw!”

³⁸ Gwanda ng'ooruutka uhuuda beehiidaanyi sing'waar, “Nih sugoocheanda Yahudi gil.”

³⁹ Gwayeesha siyagi adiiy gwachi siingooruudayi sea niny, “Ang'iing'i muwoosi Gristohi? Asi lealni geaw ak gilealneasa eara aseasa!”

⁴⁰ Hean goowoowsa niirja nea gwayeesha, “Ang'iing'i miiwali eara ASEETA, nea eara ang'iing'i gindi jeedeaba girgweaksiini?

⁴¹ Nih gamiiseasa aseasa, aba gideaba geanyaschi giimeardeanya aba gisisinyi, nea siisi ea miigwasin gidamuy wassean.”

⁴² Ng'ata gwayeesha, “Yesu apkaadaan iihiti jeeda sugoocheanduumeadaang'u.”

⁴³ Ak gwayeesha, “Aba huumwa geayeeshiineey askweareani, gajeendeayeesiina nyeamus.”

Miyeeda Yesu

⁴⁴ Geeyi bwak ama gul aseeteaba lah gwaduk ng'eanyiisean misaneeda ea gaba aseeta shageash,

⁴⁵ iidu nea gagarbiit aseeta; hean ghang'at bugusta hang'dida sibwaasha jeeda gheeda sibata ASEETEAN nibiyeenya.

⁴⁶ Ng'ata gooyeawda Yesu nea goojuur muuchi nea gwayi, “Bwaabwa, naayiinyi guroroodeanyu geatingaagu!” Ahiit balooli ghoabita.

⁴⁷ Daah shirikarajeanda haw gwaduumsheesa ASEETA nea gwayi, “Aba huumwa siisi ea doabiiwaat!”

⁴⁸ Daah eemeeda gwachi bwatgeat aba hoowa nea ghwadaah ng'asheanjiin, gabiikta gealga nyaawa nea gagiisan.

⁴⁹ Nea fuga sean duupchi ea gadeemga ghayi adeana aba ng'eanyiida Galilaya, ghamiinaada nea sheagi nea ghwadaah ng'asheesu.

Bunyita Yesu

⁵⁰ Aba damandida gwanda siisi siguura Yosefu was siida mujiineeda Yahudi siguura Arimataya. Niny abeeda gaba gweargwa girgweageeda nea ng'eeni, ak gabiissa ea doabiiwaat,

⁵¹ nea niny ea mamwasa gidagasa saawa ea gissin, nea abeeda goomuuku sugoocheanduumeeda ASEETA.

⁵² Ghang'eat siisi ak gawa ea gawa heeda Bilato ama hita gamus musta Yesu.

⁵³ Ng'ata goorareang'u ak gookwealsa hang'da miy ak ghwayiin jeemba bung'eeni mida jeemba lagheana ghayi miyeebung'sa sih.

⁵⁴ Nea eaweecheanji ea eaweeda sing'aap gil jea ghwahina sabaatohi.

⁵⁵ Nea Gadeemga ghayi adeana niny leabu ng'eanyiida Galilaya ghwaat geeshta ghwadaah bung'eeda ea gissibuyda;

⁵⁶ hean iidu gabiikta ghoah ak gwasin nagheeda ea geediga ng'andidi. Ak gafuuf eaweeda Sabaato gwahinda gidanyaashta diigheanda.