Lukka 19 - Bibliyeeda Ghaydit

Yesu ea Sakayo

¹ Ghwahita mujiineeda Yeriko, ghang'ata nea ghwalach bugusta.

² Abeeda gwanda jeedeaba mujiineani siisi siguura Sakayo, siisi ea haweewa fuga ang'oonyi gwaadi ak ea meanang'ocheanda.

³ Siisi abeeda goola gagaseadayi deakta Yesu gideaba siida uurjiini, ak ghwaraay ghwadaah aba seang'ayda eemeeda, aba gideaba niny ea nuwaas.

⁴ Ak iidu ghafwach gawa mwadi, ak gwading'da uhuuda meagheayeanda ghwadaah, aba gideaba gaygwasku naweedida.

⁵ Hita Yesu deascheeda mida goong'weersa uhuuda geeta ak gwayeesha, “Sakayo lamwaja rarang'aana, aba gideaba gamiisean deabiida gheang'u askweareani.”

⁶ Ghwalamwach ghwararang'aan ak ghwadeapta nea gahoosan.

⁷ Iidu nea ghwadaah ng'asheanji ghoaniikgh sean nea gwayi, “Nuwa ghoah rabascheanda aba gheeda siida riing'eeda.”

⁸ Ghang'eat Sakayo ghamiinaada ak gwayeesha, “Ng'ula, Ng'utamiida, gaydalach bugusta haleanjeedeanyu ak ghaadawji fuga barbari, ak iimida siida naareachi gida aba fughareeda, gaydeadeelsa niba aang'waan.”

⁹ Gwayeesha Yesu niny, “Askweareani lealeanooda nihidu gheawi aba gideaba eara niny orjeeda Abrahamu.

¹⁰ Aba gideaba Orjeeda siida ghwahidu gagasa nea gwalealu diita roadiin.”

Gida sigala shiliingajeanda sisna dahaabu

¹¹ Iidu nea ghwayiiy ng'asheesu, hean gwarukuta aba galeega, aba gideaba nineekiisa Yerusalemu, aba gideaba saawa ghaghay gil sugoocheanduumeeda ASEETA gaygabean ghwadaajiit.

¹² Gwayeesha, “Ghayi gwanda siisi haw siiwal gheang'da, weah bareanyeeka ng'eanyiida sheagi eataw uurda sugoocheanduumeeda, ak gabiigu.

¹³ Hean gaguursa fih damanamughuush aba jeeda soomjoagaaschi, gaba nih adaw lapiyaji bughala ak gwayeesha, ‘Agadiyeata ea dabiigu.’

¹⁴ Ak siisi ghwasit fuga ng'eang'da nyaawa ak geecheaksa buuneeda eeyeesha, ‘Aseasa meegasi siisi ghoahaaghwaneasa.’

¹⁵ Iidu nea gabiigu siidida nea ninyas uurda sugoocheanduumeadaanyi ghwanung' eeguursa soomjoogiga ghayi adaw lapiyaan ghoanaal niba siisi nyas gea deanaan aba gadiyeadaanyi.

¹⁶ Ghwahidu dea madeeda headaanyi ak gwayeesha, ‘Ng'utamiida, lapiyeadaang'u apughala niji suuk bughala.’

¹⁷ Gwayeesha niny, ‘Ghoahiit guwoosi soomjeanda miy! Aba gideaba guwoosi doabiiwaat aba ng'asheanda mwanang' gajambala mujiinaji damanamughuush.’

¹⁸ Ghwahidu Soomjeandeaba iyeenya ak gwayeesha, ‘Ng'utamiida, lapiyeadaang'u aharadam ea damanamughuush niji suuk haradam ea damanamughuush.’

¹⁹ Gwayeesha nih, ‘Ang'iing'i ambala mujiinaji muut.’

²⁰ Ng'ata ghwahidu nuut ak gwayeesha, ‘Ng'utamiida, sukwaanji lapiyeadaang'u atamanamughuush ghayi igooni, geadiiwsi jeeda weasta;

²¹ ghaawaleey, aba gideaba guwoosi siida ng'waan iissa gigeandi gida miidaang'u ak gilaji gea mihistani.’

²² Gwayeesha niny, ‘Gaydeargweaksiinaneey ng'asheanda ghuutaang'u, soomjeanda muy! Ginali gideaba geawooschi hang'waay geageandi gida mii deanyu, ak ghaalaji gea meahistani?

²³ Ak ghwasaan anda miigadiyeata lapiyeedeanyu gwaji suuk, ama aahidu geageandi sean ea gea ahaada?’

²⁴ Hean gwayeesha fugiga miinaada aba hooweaniin, ‘Oareada lapiyeeni mideawean ak ghoatawji siidida mideawa bughalaan.’

²⁵ (Geeyeesha niny, ‘Ng'utamiida, gwandeawa lapiyaji bughala!’)

²⁶ ‘Geayeeshiineegwa, Aba gideaba siisi agar gil gajeeheasa, nea siidida meagara giliin, eara gidida mwanang' mideawean gajeareat.

²⁷ Ak fugiga was weajoodigeasu magassa gideaba gaydaahaaghwa saawaan, ayeani hiji ak goonuuseadi aba madeedeanyu.’”

Hiteayda Yerusalemu ak geadeaptaawa hooseaneega

²⁸ Iidu nea ghoahiit ng'asheesu, goosheedeawa saawa, ak ghwascheang'da gawa Yerusalemu.

²⁹ Hean neekiisa Betfage ea Betaniya, nea neeki Giijeeda Saytuunajeega, goojeakta fih iyeenya aba jeeda ginealangaaschi,

³⁰ nea gwayeesha, “Aweayeena gharang'dida mida mwadiin iyoahiti gajanyasana hoowa gureenda digeeda nea radaat nea eara giinealda ea miyeanaal, gootinyi ak gooyeadu hiji.

³¹ Iideepa ghoanyaasheagwa sih gideaba, ‘Ghwasaan anda gootinyi?’ Gooyeeshi, ‘Gagasa Ng'utamiida.’”

³² Gaweay fugiga siicheaktean, amahita hoowa ghwadaakta gidagwachi rukusiinda saawa.

³³ Damandida siitina gureendean, gwayeesha fiibwa, “Ghwasaan anda gootiinyi gureenda?”

³⁴ Geeyeesha, “Gagasa Ng'utamiida.”

³⁵ Gearjaanda ea ghwahita heeda Yesu, geegeanu hang'weaka eayiin badayda gureenda amahit geanung' gwading'da Yesu badayda ak goopteadawa.

³⁶ Damandida beawaan, gageanu buuneeda ak ghoabwarghaan hang'weaka nyaawa aba naweeda.

³⁷ Iidu nea gwaneekiisa rarang'eadayda Giijeeda Saytuunajeega, gang'weela fuga saang'a was ginealangaaschi nea gwaduumsheesa ASEETA aba ghuuta haw aba gadiyoojiga hees sean sidaah,

³⁸ nea geeyi, “Ning'usha ASEETA sugoocheanda wuna gheawunga Ng'utamiida! Niiw hoyyoo aba humng'eeda ea giigheambiita aba hoowa bea humng'eedean.”

³⁹ Gwayeesha Farisaayajeesu ng'ay mida jeedeaba eemeedida, “Giinealshoocheanda, reekusiina giinealangaagu.”

⁴⁰ Ghwasha nea gwayeesha, “Geayeeshiineegwa, inyas ghwasiinda saawa, gaygoojuur lagheanga.”

Yesu gagutu heareega aba badayda Yerusalemu

⁴¹ Iidu nea gwaneekiit mujiini ak ghwadaah gooyeawusa,

⁴² nea gwayi, “Gideabali gwachi eara ang'iing'i ginali eaweecheanji miisa hoyyoohiin! Ak ghamneawa ea siiwiimwa gheanyangaagu.

⁴³ Aba gideaba gayghwahidu eaweeda jea gooneaweeseey weajoodigaagu, gajeeneaweeseey ak geebeasheesinaneey meatkwajeega sean,

⁴⁴ ak gaygwajakseeyi ang'iing'i ea diibigaagu ng'eanyi nea ea mwajeanung'usa lagheana uhuumba nuut aba jeedeang'wa aba gideaba mii jeeng'ni damanda jea eebareasiinaneegwa.”

Yesu gawa jeeda gheeda sibata ASEETA

⁴⁵ Hean gawa jeeda gheeda sibata ASEETA ak gooruuta fugiga shaayda haleanjeedean,

⁴⁶ ak gwayeesha saawa, “Geang'waar gideaba, ‘Gheawi iteanyuun gayghoah heechea gamoora buuneeda ASEETA ghawooda’; ak ghoanung' ghoah gwaleeda jea gafunya geat mareanghooga.”

⁴⁷ Inyeesa goonealshi galeagasean aba jeeda gheeda sibata ASEETA. Nea ashoohoodiga hees ea ng'oorshoodiga ea fuga hees was ashoohoodiga buuneeda ghamwaal gichea gwanuusta niny;

⁴⁸ ak ea meanyasa gichea eesin aba gideaba geeleeysiit buuneesean.