Lukka 15 - Bibliyeeda Ghaydit

Gisilleanda roat

¹ Eaweecha gaweesa fuga ang'oonyi gwaadi ea fuga riing'eega gooleeysiit niny.

² Hean ghoaniikghi Farisaayajeega ea ng'oorshoodiga nea gwayi, “Siisi gaguursa fuga riing'eega ak goombuutooschi.”

³ Hean gwarukusa galeega nea gwayeesha,

⁴ “Nih gajea anasihi aba jeedeang'wa mideawa gisil bughala, ama roat agi ea maygwanung'usa heeda giika was seedam ea damashageashiin, ak gawa dareabeeta gagasa diita roadiin ea ghwanyas?

⁵ Amadu nea ghwanyas, ghwayiin gheataanyi nea gahoosan.

⁶ Amadu nea ghwahita gheanyi gaguursa fuga duupchi ea fuga ascheayi ak gwayeesha, ‘Ahoosana sea aniini aba gideaba naanyaschi gisilleandeanyu roat.’

⁷ Asi gwasunu, ak geayeeshiineegwa, gaygwanda hooseaneega muuchi aba humng'eeda aba badayda siyagi mideawa riing'eeda ak gwaduukuuna, maygawuurji fugiga was seedam ea damashageash doobiiweadi magassa duukuunoodean.

Shiliingajeanda roat

⁸ “Nih gajea ana gatmu, mideawa shiliingaji damanamughuush, ama roat akaleala ea maygoorabeat gheaboonyaneeda, ak goobuus gheeda ak gagasiischi muuchi ea ghwanyasi?

⁹ Amadu nea ghwanyas gaguursa fuga duupchi ea giischeewdaanyi ak gwayeesha, ‘Eehoosana eesa sean aba gideaba naanyaschi shiliingajeandida gwachi roadiin.’

¹⁰ Asi gwasunu, ak geayeeshiineegwa, gaygahoosan malaykajeega ASEETA aba badayda siida asagi mideawa riing'eeda iiduukuuna.”

Orjeeda roat

¹¹ Hean gwayeesha, “Ghayi gwanda siisi mideawa orju iyeenya;

¹² gwayeesha daamwanang' ghwaan, ‘Bwaabwa, gwalnean haleanjeeda miisean.’ Ng'ata gagwalsa duwaawi haleanjeeda nyaawa.

¹³ Ama miighang'ata eawoojisu saang'a ghang'eat orjeeda mwanang' ghwashaayda haleanjeadaanyi sean ak gawa bareanyeeka ea gawa ng'eanyiida sheagi, hita ghwasaksakta haleanjeadaanyi.

¹⁴ Geeyi bwak ama niduulu haleanjeadaanyi sean ghang'eat geejeeda haw aba ng'eanyiita, ak eara niny gaba fuga gasa gichea ghwaak.

¹⁵ Iidu gawa gadiyeeda aba hichpa siyagi bea ng'eanyiita, ak ghwanung' siidida gawa madamnyeandaanyi ghoarear ukurmajeega.

¹⁶ Iidu Gagasa ghwaak hamita ak ukurmajeega ak ea manda siisi adaw gil.

¹⁷ Jeeng'u aba Jeadaanyi gwayi, ‘Gwadeanaan soomjooga agiischi aba ghaheanya, ea ghwalach hamichoojiga nea aniini gayghabwaran jalooda aba hiji!

¹⁸ Gaydang'eat dawa heeda ghweandeanyu ak geayeeshi niny, “Bwaabwa neadiiysi humng'eeda ea madeadaang'u;

¹⁹ ak ea mamiisean gideaba gajeeguureewean baleandaang'u, nung' dawuurji fiisu was soomjoogeaba gheang'uun.”’

²⁰ Ghang'eat ak gabiikta heeda ghwaan. Hean nea gudu ea dildeaweat ghoang'wearda ghwaan ama dea ghabwayda ak ghafwach ghwadeapta nea ghwasam gheata.

²¹ Hean gwayeesha Orjeedida niny, ‘Bwaabwa aniini neadiiysi humng'eeda ea madeadaang'u, mamiisean gideaba gajeeguureewean orjeedang'u.’

²² Ghwalamda ghwaan ak gwayeesha soomjoagaaschi, ‘Alamwaja ayeani hang'dida miyiin ak gookwealsi, nea gooshuupchi mooneeda ghuniida nea gooleapsi eara geeka;

²³ ak gooyeadu meaydida riishaadiin ak goonuuschi, eayaaga nea geehoosanyi;

²⁴ aba gideaba orjeeni iteanyuun ghayi nimi, ak ghamneawa ea niduudu; ghayi niroat ak ghamneawa ea sinyas.’ Ak geebiisa eang'eat hooseaneega.

²⁵ “Abeeda orjeedaanyi haw gwanda madamnyeanda, damani duu gwandeawa naweeda nea niriiksa gheedean ghwayiiy ghuuta sarmeeda ea deangheeda.

²⁶ Gaguursa soomjeanda ak ghoanyaashta nea gwayeesha, Gwandaani hiji?

²⁷ Geeyeesha niny, ‘Nibiigu orjeeda geamadu ak ea ninuus gweanu meayda riishaat aba gideaba nibiigu nea gudeamajeek.’

²⁸ Ghwanyareas orjeedida hawiin, ak ghaheawa gawa ghoah. Iidu gwarita ghwaan jarooda ak gamearmearani niny ghwaan ghoah,

²⁹ ak ghwasha nea gwayeesha ghwaan, ‘Daaha, aniini naaweacheey gweanyeeka saang'a, nea moang'wa danung'waada huumeandaang'u; nea miigoonean eara dayeenda ak geahoosanyi sea fuga eaduupcheewi.

³⁰ Ghamneawa nea ghwahidu orjeeni itaang'uun duulu haleanjeadaang'u sea gadeemga hiseadean ginuuksi meayda riishaat!’

³¹ Gwayeesha niny, ‘Orjeedeanyu, ang'iing'i geendeaydooschi galeagasean ak haleanjeeda eandeawi sean ea gaagu.

³² Ak gicha iisihoosan ghwahit geeng'weela aba gideaba orjeeni bea geamaduun ghayi nimi, ak ghamneawa ea niduudu, ghayi niroat, ak ea sinyas.’”