Lukka 11 - Bibliyeeda Ghaydit

Yesu ghoanaal buuneeda mooshta ASEETA

¹ Eaweecha ghamwaash Yesu ASEETA, ama ahiit goobearsa giinealaneanagi bea jeeda ginealangaaschi nea gwayeesha, “Ng'utamiida, anaaleasa mooshta ASEETA gawuurji gida anaalda Yohana ginealangaaschi.”

² Gwayeesha saawa, “Iyoamwaashchi ASEETA gooyeenyi, “Ghweandeanya gheawungaagu nung' eakghaambiida. Nung' ghwahidu sugoocheanduumeadaang'u.

³ Gooneasa daghwardeanya galeagasean;

⁴ samseasa riing'eegaasa, gawuurji gidasisamiisiindi siida mideawa siileedeanya; ak ea Adiigealeasa jeeda simsimda.”

⁵ Gwayeesha saawa, “Gajea ng'eaha aba jeedeang'wa mideawa siituupchi, jea gaweesa bugusta eaweeda ak gwayeesha, ‘Siida eaduupcheewi, nung' daalaajaneey mukaataji samwagu;

⁶ aba gideaba nihissean Siida eaduupcheewi ak ea meandeawani gichea dayiin madeadaanyi’;

⁷ ak gaygwayeesha siidida mida gahiin, ‘Adiideawiichean, sijapchi gidaghuuta ak ea silili sea diibigeasu, mwammuusi dang'eat dagoonyi gil’?

⁸ Geayeeshiineegwa, mayghang'eat ghoadaw gil earapeadi duupchiin ak gayghang'eat ghoadayda haleanjeeda sean gasa siisi aba gideaba mabuurnana giidiktiksiinda musooda.

⁹ Ak geayeeshiineegwa, amusiischeena ak Gajeegooneegwa; agassa, ak gajadaaha; agulgula gidaghuuta, ak gajeejeaseegwa.

¹⁰ Aba gideaba siida wassean musiischi gajeataw, nea siida gaseadayi gayghwadaah, nea siida gulgul gidaghuuta gajeejeasa.

¹¹ Gajea ana ghwaani, aba jeedeang'wa ama mus orjeedaanyi ghweayeanda, ghoadaw ichibooda;

¹² ghana iimus burung'nyeanda jea ghoadaw udagilba?

¹³ Agooga fuga munyas, iyoanaldunu gichea oatawda diibigeagwa haleanjeeda miyaas, abeeda Ghweandeang'wa mida humng'eeda mwanala muuchi ghoadawda Guroorooda Ghaydit fugiga musa ninyiin!”

Yesu ea Beelsebuli

¹⁴ Hean gooruuta meangeenda manda ghuuta; damanda riteawa meangeenda, deagheata gabalool siidida manda ghuutean, ak ghahamng'eanyi buuneeda.

¹⁵ Hean gwayi buuneeda mwaatkwa, “Gooruuta meangeenda aba uurda Beelsebuli, meangeenda diita hawiin;”

¹⁶ nea Mwaatkwa, gwasimsim, nea geegasa ghoahiimda gwadeagooda leabu humng'eeda.

¹⁷ Nal gidabaloola jeesinga nyaawa, gwayeesha saawa, “Iing'uchi sugoocheanduumeemba ng'eanyiinagi abeeda sugoocheanduumeeni ea maygahuuweada, nea gheeda dardaawaat gayghoabeada.

¹⁸ Ak eara Shataani iibalaksa ak gang'uchi geaw, abeeda sugoocheanduumeadaanyi gaygamajeegiitaan? Ak goorukutaaydiin gideaba aniini gearuuti meangeenda aba uurda Beelsebuli?

¹⁹ Ama iyearuuti meangeenda aba uurda Beelsebuli, diibigeagwa gooruutiideawa ng'eaha? Aba sareani gaygoorgweakseegwa fugeagwa.

²⁰ Ama iyearuuti meangeenda aba uurda ASEETA abeeda ghoanali gideaba sugoocheanduumeeda ASEETA nihisseegwa.

²¹ Gheeda ng'eedeeda hoauur, biissa gwandeawa dabita, iifur gheanyi, haleanjeadaanyi sean gaygaba hoyyoo;

²² ak geaghus iiweesa siida burdeawa uurda ak ghabwar ea ghwajoar, abeeda gayghoareat dabitaanyi sean bea ng'ucheeda, ak gwalakiisa fugaaschi.

²³ Siida meandeayeewani washteanyu gil, nea dea meaweamuudayeewani goodeariida.

Biiknooda meang'nyeandeenda muy

²⁴ Meang'nyeandeenda iiriteawa siida gwaneaydooschi aba ng'eanyiida manda beega gagaseada heechea gafuufa; raay gwayi, ‘Gaydabiiksa gheenyu ealeabu.’

²⁵ Iihita ghwadaah nea siipuus ak ea siitaamdaam.

²⁶ Iidaaktunu gayghamwaghaada meangeenda ispwa munyaseewa niny muuchi, ak gaweay goobiida jeedida; ak giibindeaba siidida gajea muy ea ghwanaawa diita ghayi bea mwadiin.”

Hooseaneega huumwa

²⁷ Damandida duu gabaloolean, ghwajaat ghuut gatmu aba jeedeaba eemeedida nea gwayeesha, “Ghang'wana jeeda jiilneey ea gidinga ireeri!”

²⁸ Hean gwayeesha, “Ghang'wana fugiga iiy ng'asheega ASEETA nea ghoang'waayiin!”

Gasooda ng'asheega deamdeameadi

²⁹ Iidu nea nibassa geat eemeetuw, gwayeesha, “Jeacheeng'su jeacheenga munyas gil; gaseadayi gwadeagooda ak ea manda gwadeagooda, jea eehiimsa geaghus gwadeagooda ghayi bea Yona.

³⁰ Gida ghayi waseata Yona gwadeagooda aba heeda fuga Ninawi, ea gichea ghoawaata Orjeeda Siida gil aba jeacheeng'su.

³¹ Gatmooda was sugoocheanda leabu Wiilooda ng'eanyiida biyeara gayghwahidu eaweeda jea eergweaksiina fugeaba jeacheeng'su ak gaygoorgweaksa; niny gwaleabu heesheagi ak ghwaan gooleeysiit weaghuumeeda Sulemani, nea hiji ging'ulayi, gwanda dea haweewa Sulemani.

³² Gay ghapka fuga Ninawi eaweeda girgweaksiindeaba jeacheeng'su ak gaygoorgweaksa; nea gwaduukuuna ng'asheega iiyiiy ng'asheega rukwiisa Yona, nea ging'ulayi, aba hiji gwanda dea haweewa Yona.

Gheaboong'nyeanda saseeda

³³ “Manda siida jea ghoayeat gheaboong'nyeanda ak ghwayiin heeda funyaat ghana gwadukuteawa dahuuda, iissa geayiin uhuuda ghamarda ak abeeda fuga buwa gah gayghwadaah weeshinda.

³⁴ Gheaboong'nyeanda saseeda gheang'da; gheang'daang'u iimiy abeeda eara saseadaang'u gaygwanda heedeesh; ama masnu, abeeda saseadaang'u gwanda jeeda misaneeda.

³⁵ Asi amilmiliita adiidu ghoah weeshinda mida jeadaang'u misaneeda.

³⁶ Asi saseadaang'u sean iimida weeshinda nea manda hiji misana, gaygaweeshiit saseadaang'u sean, gawuurji gilabwaanyi gheaboong'nyeanda aba weeshindaanyi.”

Yesu ghoahaakta Farisaayajeega ea diinagoodiga

³⁷ Damani duu gabaloolean, gaguursa siyagi was Farisaayo ghwahidu gheanyi gweagiischi, gawa ak gweagiischi.

³⁸ Ghahamng'eanyi Farisaayajeandida iidaah gweagiischi nea miigoohuun geadi.

³⁹ Gwayeesha Ng'utamiida niny, “Agooga Farisaayajeega iissa goohuunyi badayda gikoombe ea dea gweeriida, nea jeesingeagwa ghwanyiit mareanghuumeeda ea munyinda.

⁴⁰ Fuga dasheahi! Dea sin gea jarooda mii dea sin eara geaba jihi?

⁴¹ Asi oatawa haleanjeeda sisapa geadi bea ghadooweeda bea jih; abeeda gayghamiidu haleanjeeda sean aba heedeang'wa.

⁴² “Asi Farisaayajeega ashageada! Agooga aba gideaba ghoataydi aba jeeda gilatamanamughuush bea haleanjeedeang'wa iissa ghoataydi akaleala, aba seenga hamuumayga ea sooktayda ea seenga suuk bea nyeanyiida, nea ghoanung'waadi ng'asheega doobiiweadi ea bariinyeega ASEETA; ng'asheesu gamiiseegwa sinooda, nea maroosseegwa ng'asheega suurja.

⁴³ Farisaayajeega ashageada! aba gideaba ghoabwariinyi oopiitpiidana hoorgajeega madeeda aba jeeda gealga siinealshacheewa nea geekeatooscheeweegwa aba naada.

⁴⁴ Ashageada! Aba gideaba noowuurjeewi bung'eadinga mwadaajiida, sik badahuuka buuneeda nea mwanala.”

⁴⁵ Ghwasha siyagi aba diinagoodiga ak gwayeesha, “Giinealshoocheanda, iininyaashtunu ea niing'eaweasa eara aseasa.”

⁴⁶ Hean gwayeesha, “Eara agooga diinagoodiga ashageada! Aba gideaba goosareenayi buuneeda sareenda mwoamu easar, nea agooga ea moasadi sareeni eara aba mooneanagi.

⁴⁷ Ashageada! Aba gideaba goosinayi bung'eadinga sibanga nea ghweanigeagwa ea fuga ghayi nuus gil.

⁴⁸ Nea agooga goowooschi muushoodiga gideaba ghoamwaschi gadiyeeda ghweanigeagwa, aba gideaba saawa gwanuus, ak goosinyi agooga bung'eadinga nyaawa.

⁴⁹ Ak gwayi Weaghuumeeda ASEETA, ‘Gaydeajeakta sibanga ea giijasoodiga ak gaygwanuuseada mwaatkwa nea geesawan,’

⁵⁰ nea foojeanda sibanga sean, geahiida ghang'eada dea sisna sindeeta ng'eanyiida, ak gajeegasa aba heedeaba jeacheeng'su,

⁵¹ ghang'eada giihiideayda foojeanda Habeli ea gagul foojeanda Sakariya, ghayi sinuuksa dageascheeda heeda wagiida ea heeda Ghaydit. Asi huumwa gil geayeeshiineegwa, gajeegasa aba heedeaba jeacheeng'su.

⁵² Diinagoodiga ashageada! Aba gideaba noogeandi gissiitina gidaghuuta fughareeda, nea agooga ea miyooweayeena gah, nea fuga weay gah ea noakghuumnyi.”

⁵³ Iidu nea ghabeawa hoowa, gwaneaweesa muuchi ng'oorshoodiga ea Farisaayajeega ak geasasat nea geenyeari ng'asheega saang'a,

⁵⁴ geebassa nea geegasa ng'asheanda ramwasaat jea gwaleabu ghuutaanyi.