ISAYA 7 - Bibliyeeda GhayditGiijasta weesa sugoocheanda siguura Ahasi 1 Damanda sugoocheanduumeeda Ahasi, was orjeeda Yotam, orjeeda Usiya was sugoocheanda Yuda. 2 Hean nea geerukusa fuga gheeh Dawdi gideaba “Shaamu nineaji sea Efraimu,” ghang'ut muuwda gurooroadaanyi sea dea fugaaschi ea gawuurji geediga dimda ayuuk jeameeda. 3 Ak gwayeesha NG'UTAMIIDA Isaya, “Una roonyeewana Ahasi, ang'iing'i ea Shear-yashubu was orjeedang'u, aba muudeanooda mapariida beega dabascheanda mida heetiyeada, mida naweeda bareanda was heeda siihuuna hang'weaka. 4 Ak giyeeshi niny, ‘Asi aleaydiit, siinda nea adibeali, ak ea adaghami gurooroadaang'u aba nyarasta Resini was sugoocheanda Shaamu ea orjeeda Remaliya, aba gideaba suh asiyeenyean gawuurji aroosta ghweenga nimis beasta. 5 Aba gideaba Shaamu ea Efraimu ea orjeeda Remaliya, gabada ng'asheega munyas aba badaydaang'u nea geeyi, 6 “Asi eascheang'da eeng'ucheena sea fuga Yuda ak geeteawiichi nea geenyarjeaweadi ak geeweayi jeeda amwahit geayiinyi orjeeda Dabeli ghoah sugoocheanda nyaawa.” 7 Gwayi NG'UTAMIIDA was ASEETA: Ng'asheanji mayghamiinaada, nea mayghoaw. 8 Aba gideaba Shaamu goombal Dameski, nea Dameski goombal Resini. (Nea aba gweanyeew laadam ea muut Efraimu gaygagiishachi ea ghoah basanga, aba gideaba adaghoah dooshta buuneeda). 9 Ak Efraimu goombal Samariya, nea Samariya goombal orjeeda Remaliya. Inyas ea moamwasi, aba huumwa mwajanyasa majeeknata.’” Gwadeagooda Imanueli 10 Ng'ata goobalool NG'UTAMIIDA Ahasi gicha ak gwayeesha, 11 “Musa NG'UTAMIIDA was ASEATAANG'U gagoonyi giirooraneeda leabu ng'eanyi heeda maloonghajeega ghana humng'eeda.” 12 Ghwalamda Ahasi ak gwayeesha, “Maydamus nea, maydasimsim NG'UTAMIIDA.” 13 Hean ghwalamda Isaya gicha ak gwayeesha, “Oaleaydiit, Ea fuga gheeda Dawdi! Aba heedeang'wa ng'asheanda mwanang' gideaba gajanung' gabur buuneeda ak googasayi oopuura eara ASEETEANYU? 14 Asi NG'UTAMIIDA ninyeesean gaygagooneegwa giirooraneeda. Ng'ula, huda miyeasat gaygagweayiit ak gwaji baleanda was baleanda, ak gaygaguura gheawungaaschi Imanueli. 15 Gayghwaak nagheeda ea maleeda, bwak ea ghwanal ghaheawa ng'asheega munyas, nea ghwaloat gea miyaas. 16 Aba gideaba damanda miighwanal jeebi ghaheawa ng'asheega munyas nea ghwaloat gea miyaas, ng'eanyiita iiwali sugoodigiga asiyeenyean, gajeanung' ghoah eemeega. 17 NG'UTAMIIDA gaygweadu badaydaang'u ea fugaagu ea badayda ea fuga gheeh sugoocheanda sean, sawanadeeda ng'al dea ghayi nung' ghaghwal geat fuga Efraimu ea Yuda. Ak gayghwanung' gang'eeseegwa sugoocheanda Ashuru.” 18 Eaweedida NG'UTAMIIDA gaygaguursa buuneeda aba seawiirjeanda ng'eanyiida Misri, ak ghapkaanda uudiga ghang'eada eenda Nayli, ak eara fuga Ashuru ghapkaanda uudiga aba ng'eang'da nyaawa. 19 Ak gayghapka ak ghwasiinda aba jeeda moangoachihajeega niiw eemeega ea jeesinga gwaleadinga lagheanga ea iheenga halaghweenga sean ea iheenga nyeega sean. 20 Eaweedida NG'UTAMIIDA gayghamwaghaada janawajeanda aba giigheawda eenda. Aba heeda sugoocheanda Ashuru, ak ghwareakghu buudeegeagwa ea deamuuka, ea buudeega mida geeshanga. 21 Ak eaweedida siida gayghoahaaghwa haghweanda ea gisil iyeenya; 22 aba gideaba haleanjeeni gaygwandeawa eanooga saang'a, abeeda gayghwaak nagheeda; aba gideaba siida boos aba jeedeaba ng'eanyiini gayghwaak nagheeda ea maleeda. 23 Nea eaweedida hiji was sean nyooh gwanda sabiibaji sagalama, ak ghwanyas lapiyaji sagalama, abeeda gayghoah heeda ng'eamga ea halaghweenga ak ghwahit. 24 Buuneeda gaygaweay hoowa nea ghwaat ghuweang'da ea geatka, aba gideaba ng'eanyiisean ghwanyiit ng'eamga ea halaghweenga. 25 Ak heayeeniga ghayi sibara, ea manda siida jea gawa hoowa, aba gideaba nirina ng'eamga ea halaghweenga, ak gayghoah heechea gweaga dugwa ea gisilga. |
The Bible in Datooga © Bible Society of Tanzania, 2015.
Bible Society of Tanzania