ISAYA 62 - Bibliyeeda Ghaydit

¹ Aba badayda Sayuni maydasiinda, aba badayda Yerusalemu maydaabit ng'eanyi, bwak ea gwardu gitoobiiwsa nea gawuurji weeshinda, nea lealeanoadaanyi gawuurji gheaboong'nyeanda yeat.

² Ak eemoojiga gayghwadaah doobiiwnataang'u, nea sugoodiga sean ghwadaah giigheambiitaang'u. Ak gajeeng'aneey gheawunga eeshish, gheawunga jea gang'aneey NG'UTAMIIDA.

³ Ak gayhuuwa shiipcheanda miy aba geatinda NG'UTAMIIDA, ea shiipcheanda sugoocheanduumeeda aba geatinda ASEATAANG'U.

⁴ Nea maygudeeguureeweey dea sinung', nea ng'eanyiidaang'u maygudeeguura raghoonyeanda, ak gajeeguureeweey “Dea eahoosasi.” Ak ng'eanyiidaang'u gajeeguura “Dea sigeena.” Aba gideaba NG'UTAMIIDA gahoosan aba badaydaang'u, nea ng'eanyiidaang'u gajeaghi.

⁵ Aba gidageeniida gheareemaneeda huda miyeegeanu, asi ea gichea ghagheandaneey orjoagaagu gil, gidahoosanda siida geeshi aba badayda sibeeda, ea gichea gahoosanda ASEATAANG'U gil aba badaydaang'u.

⁶ Naayiinyi furiischoodiga uhuuda ghamardaang'u, Ea Yerusalemu ak ea mayghwasiinda eawa ghana askweari. Agoogeeni oopkeasi NG'UTAMIIDEAN adoasiindi.

⁷ Ak ea adoanung'waadi ghwasiinda bwak ea goomajeek Yerusalemu nea ghwanung' eakghaambiit aba badayda ng'eanyiida.

⁸ NG'UTAMIIDA niyaak habeawooda aba geatindaanyi bea dugwa, ea aba geatindaanyi hoauur nea gwayi, “Aba huumwa maygutaadaw weajoodigaagu boagaagu ghoah hamita nyaawa, nea rabasta ea mayghwali difaayeadaang'u ghayi iisini.

⁹ Ak fuga lach booga ea gea jea ghwaak gil, ak geakghambiit NG'UTAMIIDA, nea gea bidu ea gea jea ghwali gil aba jeeda doodoodeanyu ghaydit.”

¹⁰ Ang'ata, ang'ata asiga dooshinga, asina naweeda buuneeda, adeasa, asina naweeda bareanda oopuusa nea googeandi lagheanga, amiinda giirooraneeda aba badahuuka buuneeda.

¹¹ Ng'ula, NG'UTAMIIDA nirukwiida giijasta ea ghwahita muudeanooda ng'eanyiida. Ayeeshiina hudeaba Sayuni, “Ng'ula lealeanoadaang'u ghwahidu, ng'ula giimeardaanyi gwandeayi sea niny, nea waldeaydaanyi gwanda madeadaanyi.”

¹² Ak saawa gajeeguura fuga ghaydidi ghayi lealu NG'UTAMIIDA; ak gajeeguureeweey dea ghayi sigasa mujiineeda miyeenung'wa heeda.