ISAYA 61 - Bibliyeeda Ghaydit

Iita miy bea lealeanooda

¹ Guroorooda NG'UTAMIIDA was ASEETA gwanda badaydeanyu, aba gideaba NG'UTAMIIDA nimwaaran dawa darukwiisa fuga garbapi giijasta miy, ak goojeaknean daahaap gea nibur gurooruunatka nyaawa, nea gearukwiisi fuga mida ghealooniga siksiinda nyaawa, nea fuga ng'uta ghwanyas giibaldeaba geat.

² Nea gearukuti gweayda simwas bea NG'UTAMIIDA, ea eaweeda waldeayda mureandooda bea ASEETEANYA nea ghaahawdi fuga sean ayeawda.

³ Ak ghaadawji fugiga ayeawdean aba Sayuniin– shiipka deakghweeda gawa hoorgeeda deareeda, ea nagheeda ghweelmeeda aba hoorgeeda giinyahuushooda, eaghwada gwarsiinda gawa hoorgeeda guroorooda durumwana ak saawa gajeeguura sawacheeka doobiiweadi ghayi ng'aapta NG'UTAMIIDA aba gideaba eakghaambiit.

⁴ Abeeda saawa gayghwadeas heeda ghayi sinyarja, ak gajeegatkat heeda ghayi sinung' ghoah raghoonyeanda, ak gajeadeas mujiinajeega ghayi sinyarja garayi ak ghang'ata jeacheenga saang'a.

⁵ Ak gayghapka rabasta ghoahaaghwa noogeagwa, nea eemoojiga suurja gabarneegwa madameega nea gang'ula sabiibajeegeagwa.

⁶ Nea agooga gajeeguureewaneegwa ashoohoodiga NG'UTAMIIDA, ak gaygaguureewaneegwa buuneeda fuga gadiyeesa ASEETEANYA, ak gajayaaga meanang'oocheanduumeeda eemoojiga, ak gajaghwara geat aba giigheambiita nyaawa.

⁷ Hoorgeeda baspaseegeagwa gajanyasa nibiyeenya, nea gidasifooldaneegwa, gaygahoosan aba heanyaawa. Asi aba ng'eanyiida nyaawa gaygoombal nibiyeenya ak hooseaneega nyaawa gaygaba damanda manda muudeanooda.

⁸ Aba gideaba aniini NG'UTAMIIDA ghaabwariinyi girgweageeda doabiiwaat, ak ghaasichi lachng'eanyiida ea ng'asheega munyas. Ak gaydawalu waldeayda huumwa, ak gaydaneaji sea saawa neajeeda manda muudeanooda.

⁹ Ak jeacheenga nyaawa gajeanal aba jeeda eemoojiga, nea jeata nyaawa geanal aba bugusta buuneeda, nea fuga sean jea ghwadaah saawa gayghamwas gideaba suh jeacheenga adaw NG'UTAMIIDA ghadooweeda gil.

¹⁰ Gaydahoosan muuchi aba heeda NG'UTAMIIDA saseadeanyu gaygang'weela aba heeda ASEETEANYU, aba gideaba niikwealnean hang'da lealeanooda, ak ea nidukuteawean hang'da doobiiwnata, gawuurji siida geeshi iisissa geaw suulga aba shiipka deakghweeda, nea gawuurji sibeeda sissa geaw haleanjeeda miyaasiin bea suulga.

¹¹ Aba gidarukuteayda ng'eanyiida seengaaschi, ea gidarukuteayda madamnyeanda haleanjeeda sihisa jeeda, ea gichea gooruuteayda NG'UTAMIIDA was ASEETA, doobiiwnata ea giigheambiita aba madeeda eemoojiga sean.