ISAYA 53 - Bibliyeeda Ghaydit

¹ Ghamwas ng'eaha iita ng'asheega ghayi siyiinyi? Ak geatinda NG'UTAMIIDA geeteajisa ng'eaha?

² Aba gideaba aba madeadaanyi gwaheeteayda geeta duu ghaftu, nea gawuurji hawunyeanda mida ng'eanyiida ghajaam; ak ea mandeawana leanga ghana ratooda miy, nea mandeawana leanga was sean jea eabwariinya.

³ Geefool ak ghaheawa buuneeda; siida mideawa gurmeahiida haw nal gagiisan; ak gawuurji siida magasa buuneeda eara giing'weersiinda geefool ak ea meanung' ghoah gil.

⁴ Aba huumwa nigeanda giisandeanya ak ea nisar gurmeahiideanya, ak geaghanyi gideaba sibwar, gideaba nibwar ASEETA nea geesawan.

⁵ Geakghur aba giidiinyeanyeekaasa, ak geesawan aba ng'asheagaasa munyas; ghoorjooda hoyyooydeanya gwanda badaydaanyi, aba bayiiga sibwar niny geanyaschi aseasa heapta.

⁶ Aseasa geewuurjeewi gisilga ak ea siroodayi; gaba siisi aat naweadaanyi nea gabwageaw; ak ea niyiin NG'UTAMIIDA badaydaanyi munyasnacheakaasa sean.

⁷ Geaghabwas, ak ghwaat geaw ng'eanyi, ak ea miighwajaat ghuutaanyi; gawuurji dayeenda gisilleanda siyaat ealach gheata, ak gawuurji gidasiiniideayda gisilleanda aba damanda silaja buudeagaaschi, asi miighwajaat ghuutaanyi.

⁸ Geaghabwas, ak geergweaksa ak geayaat eenuus ak ea manda siida duupa gil ng'asheega nyas ak geahoana ng'eanyiida fuga majeekcheew, aba giidiinyeanyeeka fugeasu.

⁹ Ak geebung'siinyi sea fuga munyas sea meanang'oodiga aba damanda miyeadaanyi, earapeadi miigwasin ghwarjeeda, ak ea manda ghuutaanyi milmilanda.

¹⁰ Ak NG'UTAMIIDA gagasa gideaba gaygwasawan, ak ghwanung' gagiisan; ak saseadaanyi ghwanung' ghoah lukghumeeda aba badayda riing'eeda, ak gayghwadaah jeataanyi ak gayghwanyas giibinda geaw; ak gidagasiida NG'UTAMIIDA gaygwasa aba geatingaaschi;

¹¹ ak gayghwadaah haghweega sawanadeeda saseadaanyi, ak ghamwas; aba fughareeda siideanyu bea gadiyeeda doabiiwaat, gayghwanung' ghoah gea saang'a gea doobiiweadi, nea ghwasar giidiinyeanyeeka nyaawa.

¹² Asi gaydayiin meatkweeda fuga hees, gaygwalaja easanga sea gea mideawa uurjeenga; aba gideaba niny gagu eaweagaaschi, nea gabwageaw gawa miyeeda, ak gawa jeeda meatkweeda fuga mideawa giidiinyeanyeeka; ak ghwasar riing'eega fuga saang'a, ak gamus eabwayda fuga mideawa giidiinyeanyeeka.