ISAYA 52 - Bibliyeeda Ghaydit

ASEETA gaygwalealu Yerusalemu

¹ Ng'eada, ng'eada, nyasa uurda, Ea Sayuni, akweala hang'weakaagu miyaas, Ea Yerusalemu, mujiineeda ghaydit; aba gideaba ghang'eada ghamneawa maygawa jeeni siida meeyiila ghana siida mideawa ririnnyeanda.

² Bwarda birjeanda ak guwi, apteada Ea Yerusalemu; atina ghealooda mida gheataang'u, Ea hudeaba Sayuni ghayi siyaat ghealooniga.

³ Aba gideaba gwayi NG'UTAMIIDA: “Geeshaaydaneegwa mwadaagha, ak gajeetineegwa mwadaagha nea manda lapiyeeda jea oatayda.

⁴ Aba gideaba gwayi NG'UTAMIIDA was ASEETA: Fugeasu ghayi aba mwadi ghwararang'aada gaweay Misri goobiida hoowa nea rabasta gil. Ak ghaghabwas fuga Ashuru saawa mwadaagha.

⁵ Asi ghamneawa geasinyi naaha aba hiji gwarugu NG'UTAMIIDA, nea fugeasu ea siyaat mwadaagha? Ak fuga ambal saawa googuul gwarugu NG'UTAMIIDA nea gheawungeasu geeng'eawi galeagasean ea askwearda sean.

⁶ Asi fugeasu gayghwanal gheawungeasu asi eaweedida gayghwanal gideaba siida balool aniini gil, ng'ula aniini gil.”

⁷ Aamiyaastaan aba iheenga giijeega geeshanga siida eatu giijasta miy, was dea rukwiida hoyyoo, eatu giijasta miy bea ng'asheega miyaas, niny gwarukwiida lealeanooda, nea gwayeenniisa Sayuni, “ASEATAANG'U goombaliischi.”

⁸ Aleaydiit, ghuuta furiischoodigaagu; gwasarman sean aba hooseaneega; aba gideaba ghwadaah saawa aba gheanyanga nyaawa gidabiikteayda Ng'utamiida Sayuni.

⁹ Oochuura nyeashta hooseaneega asarmana sean, agooga heeda was raghoonyeanda bea Yerusalemu; aba gideaba NG'UTAMIIDA niihaawda fugaaschi, ak ea nilealu Yerusalemu.

¹⁰ NG'UTAMIIDA niidaajiit geatindaanyi ghaydit aba madeeda eemoojiga sean; ak gayghwadaah meadajeega sean bea ng'eanyiida lealeanooda ASEETEANYA.

¹¹ Aweayeena, aweayeena, ariteawana hoowa, adoasachi gidamideawa ririnnyeanda, ariteawana bugustaanyi awasa miyaas, agoogeeni oasareanyi haleanjeeda NG'UTAMIIDEAN.

¹² Aba gideaba majarita nea ghoalamwajaadi, nea majaweayeena nea goosaldi, aba gideaba gaygoosheedeawaneegwa NG'UTAMIIDA, nea gwaduubu geeshteang'wa ASEETA Israeli gafureegwa.

Sawanadeeda siida gadiyeeda

¹³ Ng'ula, siideanyu bea gadiyeeda gaygwasin nea ghwanyagaada, gajeakghaambiit nea geegatgat eekeal humng'eeda, ak gaygwanda humng'eeda muuchi.

¹⁴ Iidaah fuga saang'a niny, hean ghahamng'eanyi– aba gideaba gheamamdaanyi sidatas muuchi, eara deaktaanyi ea mudeeheamnyi sea dea siida–

¹⁵ Ak gayghwanung' ghahamng'eanyi eemoojiga saang'a; ak gayghwarat ghuusiga nyaawa sugoodiga aba badaydaanyi; aba gideaba ng'asheega miyeerukusa saawa gajeadaah, nea ng'asheega miyeeyiiy gajeanal.