ISAYA 51 - Bibliyeeda Ghaydit

Ng'asheega jea ghoahaawda Yerusalemu

¹ “Ooleeysean iit agoogeeda oogaseadayi doobiiwnata, agoogeeda oogaseadayi NG'UTAMIIDA, ang'ula lagheaneeda ghayi siiruunaneegwa nea geataay, ea seawadeeda shoomanda ghayi siiruunaneegwa nea abeeda geaghurghur.

² Ang'ula Abrahamu was ghweandeang'wa ea Sara ghayi jiilneegwa; aba gideaba ghayi nea gabwageaw geaguursi, ak ghaadawji ghawooda ak ghaanung' ghwasaang'ayiit.

³ Aba gideaba NG'UTAMIIDA gayghoahaawda Sayuni; gayghoahaawda ng'eanyoojiga was raghoonyeanda, ak dareapcheadaanyi gayghwanung' gawuurji Edeni, nea eeshtearajeandaanyi gawuurji boostaaneeda NG'UTAMIIDA; hooseaneega ea ng'weelooda gaygwanda jeadaanyi, badiischeesiinda ea ghuuta duumda.

⁴ “Ooleeysean iit fugeasu, ooleeysean iit eemeedeanyu; aba gideaba deaweeda gwaleabu heedeanyu, ak doobiiwnata gayghoah weeshinda buuneeda.

⁵ Doobiiwnateanyu nineekiit, lealeanoodeanyu nidaajiit ak geatingeasu gaygoorgweaksa buuneeda; ng'eanyiida ghuuta basooda gayghoamuukghunaan, ak gayghaghus geatindeanyu.

⁶ Agatgada gheanyangeagwa ookeala humng'eeda, ak goong'uliisi ng'eanyiida ng'eanyi, aba gideaba humng'eeda gayghang'ata gawuurji aroosta, ak ng'eanyiida gayghawaasiit ea gawuurji hang'da, nea fuga mida jeedida eara ada gaygameewa, nea lealeanoodeanyu ea manda muudeanooda, ak doobiiwnateanyu ea mayghwashiy.

⁷ “Ooleeysean iit agoogeeda oanali doobiiwnata, fuga jeesinga nyaawa mida deaweedeedeanyu; adaghang'udeagwa muuwda aba giing'weaka ang'eaweegwa buuneeda, nea adoohirbabanyi aba gideaba geemachidaneegwa.

⁸ Aba gideaba saawa gayghwaak muguyga gawuurji eaghwada, ak gayghwaak ghuughuutka gawuurji eaghwada mideawa buudeega; Nea lealeanoodeanyu ea manda muudeanooda, ak lealeanoodeanyu gaygaba jeacheenga sean.”

⁹ Ng'eada, ng'eada, akweala uurda, ea geatinda NG'UTAMIIDA; Ng'eada gawuurji gidaghayi bea garayi, gawuurji jeacheenga ghayi bea garayi. Mii ang'iing'i dea ghayi lajaada Rahabu, ak ging'udi ichiboodida?

¹⁰ Mii ang'iing'i dea ghayi nung' ghaghajaamiit basooda, ea eeniga sheagachi jeesin; ak ginung' ghoah eeniga sheagachi jih naweadinga ak gwasik fuga silealu?

¹¹ Nea gea atin NG'UTAMIIDA gaygabiigu, ak gayghapka Sayuni nea gwasarman; gaygaba hooseaneega manda muudeanooda; gayghwanyas ghweelmeeda ea hooseaneega, ak ea maygwanda gurmeahiida ea geeyooda.

¹² “Aniini, asaha aniini dea aheawiida buuneeda gil; ang'iing'i guwoosi ng'eaha ea awala siida jea ghami, ea siida jea eenung' gawuurji nyeega?

¹³ Nea ginung'usi heeda NG'UTAMIIDAANG'U ghayi bwanyi, ninyeeda ghayi bwat humng'eeda ak ghwayiin sindeecheeka ng'eanyiida, ak ang'iing'i giiwali galeagasean ea askwearda sean aba nyarastaanyi dea inyeesa ghaghabwasnyi, nea gagasa ghwalas uhuudaang'u ak gwanda yeenu nyarasta dea sawanyi.

¹⁴ Dea ghayi siipaleak ak geejaksa ghealooniga gajeesiksa nea gealamwach; ak ea mayghami ak gawa jeeda shoomanda, nea hamitaanyi mayghwasuunya.

¹⁵ Aba gideaba aniini geawooschi NG'UTAMIIDA was ASEATAANG'U, inyeesa ghaang'waali basooda ea gwajaku laweajajeagaaschi– NG'UTAMIIDA bea lugweega gheawungaaschi gil,

¹⁶ ak ea naayiinyi ng'asheegeasu ghuutaang'u, ak ea neadukutaneey aba jirooneeda geatindeanyu, aniini geasini humng'eeda ak ghayiinyi sindeecheeka ng'eanyiida, amahit geayeeshi Sayuni, ‘agooga goowooschi fugeasu.’”

Muudeanooda sawanadeeda Yerusalemu

¹⁷ Ng'eada, ng'eada, miinaada ea Yerusalemu, ang'iing'eeda ileaydi geatinda NG'UTAMIIDA bea gikoombeeyda nyarastaanyi gweeriida ea gikoombe booktuumeeda nileaydi ea goosha.

¹⁸ Manda eara akaleala aba jeeda orjoagaagu sean ijiili dea jea ghoadoabiiwnyi; ak ea manda eara akaleala dea jea ghoang'waay geatinda aba jeeda orjooga arear.

¹⁹ Nibuseey ng'asheesu asiyeenyean – gayghwaak ng'eaha gurmeahiida aba badaydaang'u?– inyas ginyasi mitagheasta ea geejeeda, ea ng'uta; abeeda gaydaamuustaan daahaawdaneey?

²⁰ Orjoagaagu niihiili, ak ea niibeedeay aba ghuusiga naweadinga bareanda sean nea gawuurji ndoopkeeda ang'waay mareamarooda; nea gaba nyarasta NG'UTAMIIDA, ea giiwoowsiinda ASEATAANG'U.

²¹ Asi aba badaydeaba suh aleaydiit ng'asheanji, ang'iing'eeda sisawanyi, ea boogida, nea mii aba difaayi gil.

²² Gwayi Ng'utamiida, NG'UTAMIIDAANG'U, was ASEATAANG'U dea inyeesa gawa meatkweeda fugaaschi: “Ng'ula neageandeawi geatindaang'u gharajeanda booktuumeeda; ea gweeriida ea gharajeanda nyarasteanyu, maygudu leayda gicha.

²³ Bayoogi gaydanung' ghwaleayda giika sawanyiin, giika eeshiineey, ‘Hiinya geaw ak geesikchi badaydaang'u’; ak ghwanung' ghoah badaydaang'u ng'eanyiida, gawuurji naweeda nyaawa jea gwasik.”