ISAYA 49 - Bibliyeeda GhayditIsraeli gheaboong'nyeanda eemoojiga gil 1 Ooleeysean iit, Ea ng'eanyiida mida ghuuta basooda, ak ghoaleaydiit agooga fuga leabu deasheagi. NG'UTAMIIDA ghayi gaguurnean nea miyeejiilan, ak ghang'at gheawungeasu nea miyeejiilan. 2 Ak ghwanung' gang'weaniidi ng'asheega ghuuteanyu ea gawuurji ng'uta ng'waan ghuut, ak ghafunyan aba jirooneeda geatindaanyi; nea ghwanung' doaw geacheeda sishit, ak ghafunyan aba jeeda rookghtaanyi. 3 Ak gwayeeshiinean, “Ang'iing'i guwoosi siideanyu bea gadiyeeda, was Israeli nea aba ang'iing'i gajeakghaambiidan.” 4 Hean geayeenyi, “Geasawanyi geaw mwadaagha, geagadiyeati uurdeanyu mwadaagha, nea manda nyageadayda; ak aba huumwa girgweaksiindeanyu gwanda heeda NG'UTAMIIDA, ak giimeardeanyu gwanda heeda ASEETEANYU.” 5 Ak ghamneawa gwayi NG'UTAMIIDA, ghayi bwadan nea miyeejilan doaw siidaanyi bea gadiyeeda, ak geayeasi niny gicha Yakobo, ak ghabwatgeat Israeli gicha aba madeadaanyi, aba gideaba aniini naanyaschi mureeda aba heeda NG'UTAMIIDA, ak ASEETEANYU ea uurdeanyu gil– 6 hean ak gwayi: “Ng'asheanda mwanang' muuchi gil gideaba gayhuuwa siideanyu bea gadiyeeda, ak giidiing'u eemeeda Yakobo, nea giighuumu fuga Israeli ghayi was boosteanga; ak gaydanung' huwa gheaboong'nyeanda eemoojiga ak gayhuuwa lealnoocheandeanyu ea ghwahita muudeanooda ng'eanyiida.” 7 Gwayi NG'UTAMIIDA, was lealnoocheanda Israeli, ea siidaanyi ghaydit asagi, gwayeesha diita fool buuneedean ninyeeda fool eemeeni, was siida gadiyeeda fuga ambaliischi: “Sugoodiga gayghwadaah ak ghamiinaada; ak eara fuga hees gayghaghadoawan; aba gideaba NG'UTAMIIDA ea doabiiwaat, was dea Ghaydit bea Israeli ghayi loanyi.” Yerusalemu geebiikta eadeas 8 Gwayi NG'UTAMIIDA: “Damanda hidaat ghaashaayi ghuutaang'u, nea eaweeda lealeanooda ghaaweacheeyi; ak gaydaghamwanyi ak ghaanung' huwa neajeeda aba heedeaba fiisu, nea ginung' gawa mwadi ng'eanyiida, nea giidawi hearaniischooda ng'eanyiida ghayi nidatasa. 9 Ak gajeeshiina giika mida ghealoonigean, ‘Arini jarooda,’ nea gea mida jeeda misaneeda giyeeshi, ‘Apkaana jarooda heedeesh.’ Nea heechea gaweay sean gayghwanyas gichea ghwaak, nea eara aba iheenga giijeega gayghwanyas gichea ghwaak. 10 Ak ea mayghwaak jalooda, nea mayghwaak muwooshta, ak saawa ea mayghwaak jeameeda geayda ghana daknooda, aba gideaba dea ghayi bwayda saawa gaygwanda madeanyaawa, ak gayghwaat googeal gheang'deenda. 11 Nea gaydanung' ghoah giijeegeasu sean naweeda, nea geasinyi naweadingeasu bea bareanda. 12 Ng'ula suh gayghapka nea gwaleabu dea sheagi, nea suh gaygwaleabu wiilooda ng'eanyiida ghayeawa ea wiilooda ng'eanyiida biyeara, nea suh gaygwaleabu ng'eanyiida Sinimu.” 13 Asarmana aba hooseaneega, Ea humng'eeda, ng'weela, Ea ng'eanyiida; Oochuura aba sarmeeda Ea giijeega, aba gideaba NG'UTAMIIDA ninung' ghahawda fugaaschi, nea ghabwayda fugaaschi ghayi sisawan. 14 Ak gwayi Sayuni, “NG'UTAMIIDA ninung'wanaan heeda, NG'UTAMIIDA mudu ghoapkaadan.” 15 “Heapi gatmooda ghoamu gwaroosa jeaptaanyi duu gwareeri? Ak ea mayghabwayda dea jihi? Asaha, saawa gayghoamu gwaroosa, ak aniini ea maygwaroosean. 16 Ng'ula naang'oarjeey aba jeeda baneaguuka geatingeasu; ghamardaang'u gwanda madeedeanyu galeagasean. 17 Gea jea gwadeekneey ghapka nea ghwalamwajaan, ak gea jea ghwalas uhuudaang'u gaygaweay. 18 Gatgada gheanyangaagu ak giing'weardi meadajeega sean, suh seaniin ghabwatgeat ak ghapka headaang'u. Aba gideabideati gwarugu NG'UTAMIIDA aba huumwa gajiina jeedeaba suh seaniin nea aba miyinda ang'iing'i gayrasiina geaw saawa gawuurji sibeeda. 19 “Nea aba iita heeda iibiiti sinung' ghoah raghoonyeanda ak ea manda buuneeda nea ng'eanyiidaang'u ghayi sidatas– aba huumwa ghamneawa gayghamwanang'iit ak ea maygageanda fugaagu, nea giika ghayi nukghtaneey gajea sheagi. 20 Ak diibigaagu ghayi sijiilsa ng'eanyiida ghayi siipaleakseey, gaygooniikseey nea gwayi, ‘Ng'eanyiini aamwanang' muuchi gakuuneasa heeda bwara jea eepiidana.’ 21 Ak gajeena aba jeeda gurooroadaang'u: ‘Diibisu gwajiilnean ng'eaha? Nea aniini diibigeasu ea nimeewa ak aniini gabwageaw, ak ea siipaleagan ak aniini geaneaydooschi, ak suh ghoarear ng'eaha? Ng'ula siipuudan nea gabwageaw heapi, suh abeeda ghayi gwanda yeenu?’” 22 Gwayi NG'UTAMIIDA was ASEETA: “Ng'ula gaydamiinda geatindeanyu aba badayda eemoojiga, ak gaydaadaw buuneeda gwadeagooda, ak gaygwasareena orjoagaagu daghanuunatka nyaawa, nea geesareena haweagaagu hamarjoojiga nyaawa. 23 Sugoodiga gaygawuurji ghweaniga aba headaang'u, nea gadeemga was sugoodiga gaygawuurji gheamadiga, gaygwatkuy aba madeadaang'u ak gagoonyi mureeda, saawa gayghwaat geat ng'eanyi gwasineey mureeda. Ak gaynala gideaba aniini geawooschi NG'UTAMIIDA; nea gea amuukghunaan ea mwajeapwaaspwaas.” 24 Heapi siida daruus gajeamu eareat easangaaschi, ghana lugoanyaawa ghayi weay ghealooniga aba huumeanda gayghwalaalaani? 25 Hean ghwasha NG'UTAMIIDA nea gwayi, “Eara eegeanda easanga siida daruus, easanga siida muy seara gayghwalaalaan, weajoodigaagu gaydang'uchi aniini, diibigaagu gaydalealu. 26 Ak fugiga ghabwasnyi gaydanung' ghwaak banyeega nyaawa ak gaygaboogidi aba gideaba ghwali foojeanyeeka nyaawa gawuurji gililea difaayeeda heeseadi ak fuga sean majeekcheew gayghwanal gideaba aniini NG'UTAMIIDA gil, was lealnoocheandaang'u ea lealuuneey was dea hoauur asagi bea Yakobo.” |
The Bible in Datooga © Bible Society of Tanzania, 2015.
Bible Society of Tanzania