ISAYA 48 - Bibliyeeda Ghaydit

ASEETA was Ng'utamiida manda muudeanooda gil

¹ Oaleaydiit fuga gheeh Yakobo, ghayi siguushteawa gheawunga Israeli, nea goobea dooshta Yuda, ghayi ghoayaaji habeawooda aba gheawunga NG'UTAMIIDA ak goohindi geat gili oakghadawanyi ASEETA Israeli, ak ea mii huumwa gil nea mwadoabiiwa.

² Aba gideaba gaguura geat fuga ng'eanyiida ghaydit, nea gwahinda geat gilibwata ASEETA Israeli; gheawungaaschi NG'UTAMIIDA lugweega gil.

³ “Aniini ghayi nearukwiidi ng'asheegeaba garayi, asaha, nea gearina ghuuteanyu gil, ak ghaanung' ghwanal saawa, geasinyi aba geeshangiga ak gwasa.

⁴ Aba gideaba ghaanali gideaba ang'iing'i guwoosi hang'waay uhu, ak ghahang'waayda uhuudaang'u dea gharinyeanda, nea gheamamdaang'u ea ghaghajaamiit ea gawuurji lagheanga oomng'i.

⁵ Asi ghayi neabean darukuneey, damanda mii gapnu nearukuneey, iidu adiyeeshi geaw gideaba ‘Haleanjeeni gwasin gideanyu was sanaamu, was sanaamooda sisiin, ea sanaamoodeanya siitaayi.’

⁶ “Asi niyiinyi ng'asheesu, ng'ula suh seaniin, heapi majarukwiida? Naahiimneey ng'asheega bunu, ghang'eada ghamneawa asaha ng'asheega funyeadi minali.

⁷ Haleanjeeni geabwat ghamneawa, nea mii garayi gil; damanda miighoah ghamneawean mii iinya iitaanyi, adiidu giyeeni ‘ng'ula geabean danal.’

⁸ Earahay mii iinnya, ak earahay ea mii nala, ghang'eada garayi iitaang'u miighwajaada. Ghaanali gideaba ng'asheesu gisini milmilanda muuchi ak ea siguureewaneey siida mideawa giidiinyeanda ghang'eada dea ghayi sijiilaneey.

⁹ “Aba mureeda gheawungeasu, gaydanung'waada nyarasteanyu, nea aba mureedeanyu, gaydaadeal aba gideaba adiidu ghaalaschi uhuudaang'u.

¹⁰ Ng'ula, naadaanyeey, ak ea majuurjeewana lapiya; naaloacheey aba jeeda duwayda beasta.

¹¹ Geasinyi ng'asheanji nea gabwageaw, ghwasaan iijea eefool gheawungeasu? Giigheambiiteanyu maydaadaw siinuut.

Goreshi ghwaloat Ng'utamiida

¹² “Aleeysean iit Ea Yakobo, Ea Israeli, ghayi geaguurneey! Aniini ASEETA gil, aniini geawooschi dea madeeda, ak geawooschi dea huuydean.

¹³ Sindeeta ng'eanyiida ghayiinyi aniini aba geatingeasu, ak ghaabwachi humng'eeda aba geatindeanyu bea dugwa, inyeesa geaguursi saawa ak hean ghamiinaada duwaawi.

¹⁴ “Abwada geat oogasean ak ghoaleaydiit, ng'eaha gil aba jeenyaawa ghayi rukwiida ng'asheesu? NG'UTAMIIDA ghabwariiy niny; ak gaygwasin gidagasiida aba badayda Babeli, Ak geatindaanyi niny gayghwalas uhuuda fuga Galdayo.

¹⁵ Aniini gil, asaha aniini neargu ak ea neaguursi niny, ak ea neayeadu niny, ak gayghwanyagaada aba naweadaanyi.

¹⁶ Aneekiisean ak ghoaleaydiit ng'asheesu: ghang'eada ghayi mwadi miidabalool aba makcheameeda ghang'eada damanda ng'eada ghuuteaba ng'asheesu aniini geandi hoowa.” Ak ghamneawa goojeakneani NG'UTAMIIDA was ASEETA, ea gurooroadaanyi.

Gidamwaal Ng'utamiida aba badayda fugaaschi

¹⁷ Gwayi NG'UTAMIIDA, was lealnoocheandaang'u Ghaydit asagi bea Israeli: “Aniini geawooschi NG'UTAMIIDA was ASEATAANG'U, was dea anealeey gideaba nyasa nyageadayda, was dea adoobiiweey aba naweeda miiseey eadita.

¹⁸ Gidabal gwachi giileeysiit diigheanyeekeasu. Abeeda hoyyooydaang'u gaygawuurji eenda guldeawa beega, nea doobiiwnataang'u gawuurji laweajajeega basooda.

¹⁹ Ak Jeataang'u gwachi gaygawuurji iseaskweanda, nea jeacheengaagu gawuurji gheanyanga iseaskweanda; gheawunga nyaawa gwachi mayghang'at, nea mwajealas uhuuda aba madeedeanyu.”

²⁰ Asi ariteawana Babeli, asalda anung'usiina heeda fuga Galdayo, arukwiida aba sarmeeda arukwiida ng'asheesu arukwiida ea ghwahita muudeanooda ng'eanyiida nea gooyeenyi, “NG'UTAMIIDA nilealu siidaanyi bea gadiyeeda was Yakobo.”

²¹ Ak ea miighwaak muwoash damanda adoabiiwa saawa aba jeeda eeshtearajeega. Ghwanung' gwardu beega aba jeeda lagheaneeda, ghabwaash lagheaneeda ak gwardu beega saang'a.

²² Gwayi NG'UTAMIIDA, “Manda hoyyoo aba heeda fuga munyas.”