ISAYA 34 - Bibliyeeda Ghaydit

ASEETA gayghwalas uhuuda weajoodigaaschi

¹ Apkaani, Ea fuga sean bea eemoojiga, ak ghoayiinyi, Oaleaydiit, Ea buuneeda, Oaleaydiit ng'eanyiida, ea haleanjeeda mida jeeda sean, ng'eanyiida ea haleanjeeda sean abiita jeedida.

² Aba gideaba NG'UTAMIIDA ninyareas aba badayda eemoojiga sean, ak gaba nyarasta ng'waan aba badayda lugooda nyaawa sean, ak ea ninung' goosha sean, nea ghoadayda eeweay eenuuseada.

³ Ak fuga nyaawa sinuuseada gajeehisa jarooda, ak shearooda muscheeka nyaawa gaygwadiyeada humng'eeda, ak giijeega gaygaguldeawa foojeanda nyaawa.

⁴ Ak gayghwadatasa lugoosean bea humng'eeda, ak humng'eeda gajeamughuta gardaasajeanda. Ak lugoanyaawa sean bea humng'eeda gayghoabitpitaayda, seenga sabiibu iijaam ak ghoabitpit, ak gawuurji seenga meaghayeanda iighajaamiit ak ghoabitpit.

⁵ Aba gideaba neasisinyi ng'uteanyu aba humng'eeda; ng'ula, gaydararang'aan ak ghaabwarji fuga Edomu, fuga nealaksi ghaat gideaba gaydalas uhuuda.

⁶ Ng'uta NG'UTAMIIDA gayghwanyiit foojeanda, ea nagheeda, foojeanda gisilga, ea gea nooga, ea nagheeda manyiinyaka lagweendiga. Aba gideaba NG'UTAMIIDA gwandeawa lukghumeeda aba mujiineeda Bosra, ak gaygoosha buuneeda muuchi aba ng'eanyiida Edomu.

⁷ Ak digeeniga gajeebaruudayi sea saawa, eara muhooga manang'i ea jiirgwa hees geabwar goodeayi. Ak ng'eanyiida nyaawa gayghwahareariit aba foojeanda, nea sigeadaanyi ghwanyas sururuuda aba nagheeda.

⁸ Aba gideaba NG'UTAMIIDA gwandeawa eaweeda jea ghawaldaawa mureandooda, gweayda jea ghawaldaawa mureandooda aba heeda weajoodiga Sayuni.

⁹ Ak eeniga Edomu gajeenung' ghwayamwa ghoah laami, nea sigeadaanyi ghwayamwa ghoah gharinga sisina beasta, nea ng'eanyiidaanyi ghoah laameeda yeat.

¹⁰ Ak gayghwayeat askweari ea eawa, aroastaanyi gayghamiinaada damanda manda muudeanooda. Ak ng'eanyiida ghang'eada jeacheeng'su ea ghwahita jeacheenga suuk ghoah raghoonyeanda; ak ea manda siida jea gwasik jeedida damanda manda muudeanooda.

¹¹ Abeeda gayghoah hoorgeeda rabearda ea usibicheanda, nea goobiida eara udahiihiida ea udaghuuh. Ak gayghang'uda Ng'utamiida saawa jaliida, nea goong'uchi fuga nyaawa hees.

¹² Ak ea maygwanda sugoocheanda jea goombal ng'eanyiida, aba gideaba fuga hees sean ea mudugwarachi gil.

¹³ Nea gaygwarina halaghweenga uhuuda ghamardida itaanyi majeekiin, nea gwarina eara harbadeeda ea ng'eamga jeeda museasoadaanyi. Ak ghoah hoorgeeda jea goobiita fureayoonga, ea shageerooda.

¹⁴ Hean ghoah heechea gwaroondooscheesa diyeanga jarooda ea habiyoojiga, nea gaguuriisa geat meangeeniga aba hoowa, aba saawa eawa gaygawuurji askweari, ak ghwanyas heechea gafuufa aba hoowa.

¹⁵ Ak aba hoowa gaygwasin udahiihiida gheanyi ak ghoabuut burunga, ak ghabwat ama iidu ghabwada geat dayeagaaschi aba jeeda meang'eagaaschi; ak nea aba hoowa gaygwaroondooscheesa murgheatka, gaba nih roonyi nuut.

¹⁶ Agasa ak ghoasoami aba jeeda gitaabooda NG'UTAMIIDA: Aba jeedeaba suh manda dea jea ghwaroat, gaygaba nih mideawa nuut. Aba gideaba nih gwarukuna NG'UTAMIIDA ghuutaanyi, ak gayghabwadageat gurooroadaanyi saawa.

¹⁷ Ng'utamiida nisisin heeda jea goobiida giliwas, ak goodeena ng'eanyiida mareamarooda, ak gaygoobiida damanda manda muudeanooda, nea goobiida jeeni ghang'eada jeacheeng'su ea ghwahita jeacheenga suuk.