ISAYA 23 - Bibliyeeda Ghaydit

Fuga Diro ea Sidoni gajeenung' goosha

¹ Giijasta weesa ng'eanyiida Diro. Ooyeawda Ea maleambajeega Darshishi, aba gideaba Diro silas uhuuda, ak ea mudugwanda gheeda ghana heeda miineadayeewa maleambajeega! Ghang'eada ng'eanyiida Gupro ng'asheesu gajeehiimsa saawa.

² Asiinda agoogeeda oopiiti ghuuta basooda, asiinda agoogeeda ageakshachi bea Sidoni, giijasoodigaagu ghwalach bugusta basooda

³ haleanjeeda sihista bea Shihori, was booga leabu Nayli, siisiigu bugusta baskweega ea gidanyas gil, ak niny googeakshi sea eemoojiga.

⁴ Abwaspwasa, Ea Sidoni, aba gideaba gabalool basooda, gwayi ghamardida majeek bea basoodean, “Miighwanyasan lajooda jeata nea miidaji, nea miidaarear orjooga ghana haweega.”

⁵ Inyas ghwanyas fuga Misri iita gideaba sinung' goosha fuga Diro, abeeda gaygwahirbaban muuchi fuga Misri.

⁶ Aweayeena ea ahita Darshishi, Ea agoogeeda oopiiti ghuuta basooda, oochuura aba sawanadeeda.

⁷ Heapi nih mujiineeda hooseaneega bea Dirohi mujiineeda ghayi sideas garayi, nea fugaaschi gaweay goombal darooraka sheagi?

⁸ Ng'asheesu bea badayda Dirohiin gwasin ng'eaha mujiineeda ashuup buuneeda shiipka, nea fugaaschi ageakshachi ea orjooga sugoodiga gil, ak geataw mureeda aba ng'eanyiisean?

⁹ Ng'asheesu gwasin NG'UTAMIIDA lugweega nea gabaysiina gideaba gageanda ghwarjeeda nyaawa sean, nea ghoabwaaspwaas fuga sean bea ng'eanyiida.

¹⁰ Laabwa jeeda ng'eanyiidaang'u gawuurji Nayli, Ea fuga Darshishi; aba gideaba manda gida jea ghoadealnyi.

¹¹ Ng'utamiida ghamiinda geatindaanyi googeal badayda basooda, ak ghabwaay darooraka; ak ea niidayda NG'UTAMIIDA bea diigheanda gideaba eegul uhuuda hoorgeeda Ganaani.

¹² Ak gwayi, “Ea haweega Sidoni, maygut sina ghweelmeeda gicha, eara mang'awsiina Gupro, eara aba hoowa mwanyasa fuufta.”

¹³ Fuga Galdayo gil, mii fuga Ashuru, gea siksa diyeanga jarooda ghapka jeeda mujiineeda Diro. Saawa gooneaweesa mujiineedida madoolgweaka ng'ucheeda, ak gwanyarja gealga nyaawa nea ghwanung' ghoah eemeega.

¹⁴ Ookuula agooga maleambajeega hees bea Darshishi, aba gideaba sinyarja hoorgeedeang'wa oomng'awsi.

¹⁵ Eaweedida abeeda mujiineeda Diro gajeanung'waada gweanyeew laadam ea damanamughuush, gawuurji giibinda sugoocheanjagi. Ama ng'ata gweanyeew laadam ea damanamughuush, abeeda mujiineeda Diro gaygawuurji salaneeda hiseadayda.

¹⁶ “Geani gidoondooriida, ak guwi jeeda mujiini, Ea hiseadayda sinung'waada! Sarmana sarmeeda inya, sarmana sarmoojiga saang'a, ak gajeapkaanyi.”

¹⁷ Iing'ata gweanyeew laadam ea damanamughuush, abeeda gayghwaaga NG'UTAMIIDA ghoorjooda ng'eanyiida Diro, ak gaygabiiksa hiseadayeanduumeadaanyi aba darooraka sean bea ng'eanyiida.

¹⁸ Ak giigeakshoadaanyi ea lapiyeeda jea ghwanyasiin, gajeasach gaba NG'UTAMIIDA majeetiiw nea majeaghamwat, lapiyeadaanyi gaygaba fuga gadiyeesa NG'UTAMIIDA ak ghwasha hamichoojiga saang'a ea hang'weaka miyaas.