IITOODA 5 - Bibliyeeda Ghaydit

Fuga mii miyaas

¹ Ng'ata goobalool NG'UTAMIIDA Musa ak gwayeesha,

² “Rukusiina fuga Israeli gideaba dearuuta giliwas sih bearji udamusuura aba jeeda museasooda, ea giliwas sih bearji mananda, ea gilinyoo gaba ririnnyaan aba ging'ooyda musta;

³ gajooruuta sean, headiga ea gadeemga, gajooruuteawana jeeda museasooda, ak ea mabwarana ririnnyeanda museasooda nyaawa, was heeda eabiiti aniini bugusta.”

⁴ Hean gwasin fuga Israeli ng'asheanji, ak gooruuta ak gaweay badayda museasooda; gawuurji gidarukusiinda NG'UTAMIIDA Musa, nih gidasin fuga Israeli.

Duukuunooda iing'ata sinooda ng'asheega munyas

⁵ Ng'ata goobalool NG'UTAMIIDA Musa, ak gwayeesha,

⁶ “Eeshiina fuga Israeli, siida was ng'eedeeda ghana ea gatmooda isin riing'eeda wassean, sina buuneeda, ak gwanung'usa heeda NG'UTAMIIDA, ak ghwanyas siisi giidiinyeanda;

⁷ abeeda iiduukuuna riing'eega nyaawa sin; gayghoadayda leadeeda muuchi aba giidiinyeandaanyi sin, ak gayghwayiin uhuuda gideaba muut, ak ghoadaw siidida adiiysean.

⁸ Nea siida iimandeawana buweacheanda neeki jea ghoadaw haleanjeeda haleanjeeni bea leadeedean; gidida jea eeteelsa NG'UTAMIIDA aba giidiinyeanjiin gaygaba ashoohoocheanda, ea gisilleanda giirooroocheeda, ak gaysinana giirooroocheeda aba riing'eadaanyi.

⁹ Nea giliwas haleanjeeda ghadooweeda siikeal humng'eeda, was haleanjeeda ghaydidi bea fuga Israeli, gayghoadaw ashoohoocheanda, ghoah daanyi.

¹⁰ Ak haleanjeeda wassean ghaydidi bea siida gaygaba ashoohoocheanda; gida wassean adaw siida ashoohoocheanda gayghoah daanyi.”

Girgweageeda headiga beala gadeemga nyaawa

¹¹ Ng'ata goobalool NG'UTAMIIDA Musa ak gwayeesha,

¹² “Abaloola fuga Israeli, ak giyeeshi, Iideepa goodiiysa gatmooda siida wassean was siyeadaanyi,

¹³ ak gwaluudayi sea siinuut nea mwanala siyeadaanyi ghana siida wassean; nibwara geaw ririnnyeanda ak ea manda siida nidaah gidasin aba gideaba miyeebwarda ng'eanyi;

¹⁴ ak ghang'ut muuwda guroorooda siyeadaanyi, ak ghabeala gatmoadaanyi, ak ghwanyas guroorooda beelda, ak ghabeala gatmoadaanyi, nea miighabwara geaw gatmoodida ririnnyeanda;

¹⁵ abeeda gaygageanda ng'eedeedida gatmoadaanyi, ak gaweay heeda ashoohoocheanda, ak gaygweadu haleanjeadaanyi bea ghadooweeda aba badaydaanyi, was gideaba damanamughuush was gilooheanagi bea dearanga shayiiri; nea mwayiina nagheeda badayda, nea mwayiina hideeda badayda; aba gideaba dearanga ghadooweeda gil bea beelda, ak ea haleanjeeda ghadooweeda was dearanga giipkeata jea eapkaada gidamuyi.

¹⁶ “Ak gaygweadu ashoohoocheanda gatmooda gwaneekiit, ak ghwayiin madeeda NG'UTAMIIDA;

¹⁷ ng'ata gaygageanu ashoohoocheanda beega ghaydidi aba jeeda dabicheanda sisna sheang'weeda; ng'ata gageanu ashoohoocheanda birjeanda mida jeeda maheemajeanda, ak ghwayiin jeedeaba beesu;

¹⁸ ak gayghwayiin ashoohoocheanda gatmooda madeeda NG'UTAMIIDA, ak gaygootineada buudeega mida uhuuda gatmooda, amang'ata gayghoadaw haleanjeeda ghadooweeda was dearanga giipkeata geatingaaschi, was haleanjeeda ghadooweeda was dearanga beelda, nea gaygwandeawa ashoohoocheanda beegiga ng'weani eatu mooshteaydean aba geatindaanyi;

¹⁹ ak gayghwanung' ashoohoocheanda ghwaak gatmooda habeawooda, ak gay gwayeesha gatmooda, ‘Iimanda ng'eedeeda niluudayeewi nea mii yamwa geaw ak giyaadi geeshta ng'asheega ririnnyeanda, nea goombalnyi siyeadaang'u, nea beesu ng'weani eatu mooshteaydean ea adiidu ghwanyasnyi.

²⁰ Ama inyas giyami geaw nea goombalnyi siyeadaang'u, ak ginyasi ririnnyeanda, ak ea niluudayeewi ng'eedeeda, mawoosa siyeadaang'u;

²¹ abeeda’ (gayghwanung' ashoohoocheanda ghwaak gatmooda habeawooda mooshteayda, ak gaygwarukusa ashoohoocheanda gatmooni ng'asheesu) ‘gidabal ghwanung' NG'UTAMIIDA huwa mooshteayda ea habeawooda aba jeeda buuneadaang'u, gagasa soonana nea ghoapka jeadaang'u.

²² Nea beega eatu mooshteayda gaygaweay jeadaang'u, ak ghwanung' ghoapka jeadaang'u, nea gisoonani;’ ak gayghwasha gatmooda nea gwayi, ‘Amin, Amin.’

²³ “Ng'ata gaygang'oorsa ashoohoocheanda mooshteawi jeeda gitaabu, ak goohuun aba beega ng'weani;

²⁴ Iidu gajeanung' ghwali gatmooda beegiga ng'weani eatu mooshteaydean; ak gaygaweay beega ng'weani jeadaanyi, ak gayghwayamwa ak gang'weaniidi ak ghwanung' ghwanyas sawanadeeda.

²⁵ Ak gaygageanu ashoohoocheanda dearanga ghadooweeda bea beelda, aba geatinda gatmooda, ak gaygagatkat dearanga ghadooweeda aba madeeda NG'UTAMIIDA ak gweadu heeda wagiida;

²⁶ ak gayghoanyiit ashoohoocheanda baneakta dearanga sighadoawanda, ghoah gichea goopkeadi, amang'ata ghaghwarda aba heeda wagiida, amang'ata ghwanung' ghwali gatmooda beega.

²⁷ Hean nea ninung' ghwali beega, abeeda iining'uda geaw ririnnyeanda ak gwasin ng'asheega munyas aba heeda siyeadaanyi, abeeda beegiga eatu mooshteaydean gaygaweay jeadaanyi ak ghwanyas sawanadeeda ng'waan, ak gayghoapka saseeda, ak gayghwadatasa jeadaanyi mwanang'. Ak gayghoah gatmooda mooshteawaneeda aba jeeda fugaaschi.

²⁸ Nea gatmooda iimiighabwara geaw ririnnyeanda ak ea miigoodiiy, abeeda ea manda gida jea gwahisa ak gayghoamu gwaji diibiga.

²⁹ “Asi mii deaweedeeda beelda, aba heeda gatmooda ambal siyeadaanyi, iiyam geaw, ak ghwanyas ririnnyeanda;

³⁰ ghana ghwanyas guroorooda beelda, siida was ng'eedeeda, ak ghabeala gatmoadaanyi; abeeda gayghwayiin gatmooni madeeda NG'UTAMIIDA, ak gaygwasin ashoohoocheanda aba badaydaanyi deaweedajeesu seaniin.

³¹ Ak abeeda siisi was ng'eedeedean ea maygwandeawa munyinda, ak gayghwaat gatmooda munyindaanyi.”