Golosaayi 3 - Bibliyeeda Ghaydit

¹ Asi agooga iisiituuneegwa sea Gristo, asi agassa haleanjeeda mida humng'eeda hooweani mida Gristohiin, niny niipteada aba geatinda dugwa bea ASEETA.

² Oopkeata haleanjeeda mida humng'eeda galeagasean, mii gea mida ng'eanyiida gil.

³ Aba gideaba agooga goomeeway ak eaweegeagwa ea sifuy sea Gristo aba heeda ASEETA.

⁴ Iidu iisiitaajiit Gristoyda was eaweagaasa, abeeda eara agooga gajeetaajiideagwa sea niny aba jeeda giigheambiita.

Giibindeaba garayi ea giibindeesh

⁵ Asi anung'waada ng'asheega munyas bea muunda ng'eanyiida mida saseenuukeagwa: was hiseadayeanduumeeda, ririnnyeanda, geawunda gheang'da muy, giiteemshooda muy, ea shidoodeaba ghaang', ea ghadoowanda sanaamu.

⁶ Aba badaydeaba ng'asheesu gayghwahidu ng'weaninda ASEETA.

⁷ Ak eara agooga ghayi gooneayeewi jeedeaba ng'asheesu nea goopiidi jeeda.

⁸ Ak ghamneawa ghoanung'waadi ng'asheesu seaniin; nyarasta, ea ng'weaninda, munyinda, ea beeshta, ea giing'weaka aba ghuusigeagwa.

⁹ Adoonapiisi geat ng'uyeega, nea gooyeeshi geat noasuuchi searoojigeaba garayi, ea gisisiniida

¹⁰ ak gookweali searoojiga eashish, sinung' gaweeriidi ak ghoanali nea geegala ninyeeda ghayi bwaat.

¹¹ Ak aba sareani ea maheeli siida Yunani ghana dea Yahudi, dea siyaat ghasmeahooda ea dea miyeayaat ghasmeahooda, buunyeanda, ghana siida mwanala gil, giing'oonyaneeda, ghana dea abal geaw, nea Gristo ea sean gil aba jeeda haleanjeeda sean.

¹² Asi ookwealsheata fuga niloat ASEETA, ghaydidi sibwariiy, bea jeesinga bayiida buuneeda, ea ng'eeninda, eatoodeaba geat bea ng'eanyi, miyinda ea milikghteayda,

¹³ daba siisi sar sareemba nuut, nea goosamiisi geat, iimida siida niidiiysa nuut, gawuurji gidaghayi samsiindaneegwa Ng'utamiida, ak gwasunu eara agooga asindunu.

¹⁴ Iing'ata suh seaniin gamiiseegwa andeawana bariinyeega, aba gideaba gaygooroonyi haleanjeeda sean ghoah gilagi hidaat.

¹⁵ Ak ghoanung' goombaliischi hoyyooyda Gristo aba jeesingeagwa, aba gideaba agooga geeguurneegwa awasa saseanagi. Nea ghoahuuyi fuga badiischooda.

¹⁶ Anung' goobiida ng'asheanda Gristo jeedeang'wa nea gwaheedu, anaala nea gaba siisi reekusa nuut aba weaghuumeeda sean, nea goosarmanyi nyiigheega ea sarmoojiga guroorooda nea goobadiischeesi ASEETA aba gurooruunatkeagwa.

¹⁷ Nea gili wasean oosinyi, aba ng'asheanda ghana sinooda, asina sean aba gheawunga Ng'utamiida was Yesu, nea goobadiischeesi ASEETA was Ghweanda aba naweedeaba niny.

Giibinda nyasita eaweega eashish

¹⁸ Gadeemga, asisiina siyeenndigeagwa mureeda, nih gidahaguuwsa Ng'utamiida.

¹⁹ Siyeenatka abwariinya gadeemgeagwa nea adoonyareekiisi.

²⁰ Diibiga, asisiina ghweanigeagwa ea gheamadigeagwa mureeda aba haleanjeeda sean, aba gideaba ng'asheanji gidagasiida Ng'utamiida.

²¹ Ghweaniga, adoonyareesayi diibigeagwa, aba gideaba gajiidu ghwalagaan.

²² Giing'oonyanga, amwasa ng'asheega sean bea meanang'oodigeagwa bea ng'eanyiida, nea mii aba gheanyanga gil, gawuurji fuga sin alooheeda aba heeda buuneeda, asi gamiiseegwa agadiyeena nea eashish gurooruunatkeagwa, nea ghoawali Ng'utamiida.

²³ Gili wasean oosinyi, asina nea goobeayi jeesinga miyaas, gawuurji giloosisi Ng'utamiida,

²⁴ Nea ghoanali gideaba gaygagooneegwa Ng'utamiida gidageatindeang'wa bea hearaniischooda, ak googadiyeesi Ng'utamiida was Gristo.

²⁵ Aba gideaba siida wassean sina ng'asheega munyas gayghwanyas gidageatindaanyi uurji dea sina nea maygwanda shiitmeeda.