GIING'EETA 12 - Bibliyeeda Ghaydit

ASEETA gaguursa Abramu

¹ Ng'ata gwayeesha NG'UTAMIIDA Abramu, “Beawana ng'eanyiidaang'u ak giriteawi ghaheang'wa ea jeeda buweadeagaagu ea hita ng'eanyiida jea daahiimneey.

² Ak gaydanung' huwa eemeeda haw, ak gaydagoonyi ghawooda, ak gaydanung' gwaheedu gheawungaagu, ak abeeda geegoonyi ghawooda.

³ Gaydaadaw ghawooda fuga goonyi ghawooda, nea siida mwaashtaneey gaydamwaashta; nea aba badaydaang'u gayghoadaw ghawooda eemoojiga sean bea muunda ng'eanyiida.”

⁴ Iimuchu gawa Abramu, gawuurji gidarukusiinda NG'UTAMIIDA; hean goodeayi Lutu. Abeeda Abramu gaba gweanyeew laadam ea damanamuut damanda balaga Harani.

⁵ Ng'ata ghwaat Abramu gatmoadaanyi was Sara, ea Lutuheeda was orjeeda baleanda ghaamwat, ea haleanjeeda nyaawa sean mideawa, sea fuga nyasa hoowa bea Haraniin; hean gwasimsa beata gaweay ng'eanyiida Ganaani. Hita ng'eanyiida Ganaani,

⁶ gwasik Abramu jeeda ng'eanyiida ea ghwahita Shekemu mida sawacheanda More. Abeeda damandida gwanda ng'eanyiida eemeeda Ganaani.

⁷ Hean gabussa NG'UTAMIIDA Abramu ak gwayeesha, “Ng'eanyiini gaydagoonyi ea jeacheangaagu.” Ng'ata gwasissa NG'UTAMIIDA heeda wagiida aba hoowa, nea dea busiinyi sea niny.

⁸ Iimuchu goosiipta ea ghwahita heeda giijeeda mida gayeewda Beteli, ak ghamiinda maheemajeandaanyi aba dageascheeda Beteli aba heeda biyeara ea Ayi aba heeda ghayeawa; ak gwasissa NG'UTAMIIDA heeda wagiida ak ghabwat gheawunga NG'UTAMIIDA.

⁹ Hean gwaneayeewa Abramu jeeda ng'eanyiida, nea gagal Negebu.

Abrahamu aba ng'eanyiida Misri

¹⁰ Muchu ghang'eat geejeeda aba jeeda ng'eanyiida. Hean ghang'eat Abramu gwararang'eesa ng'eanyiida Misri ak ghoah rabascheanda aba ng'eanyiita gili nuwaas aba gideaba ghwaraanya geejeeda aba jeeda ng'eanyiida.

¹¹ Geeyi bwak ama riikghta ghoaghaawa moonghooda Misri, gwayeesha Sarayiheeda was gatmoadaanyi, “Ghaanali gideaba guwoosi miyaasiin lean;

¹² asi iidaanyi fuga Misri gaygwayi, ‘Nih gatmoadaanyi’; ak abeeda gaygwanuusan, ak ghwanung'waadaneey ang'iing'i.

¹³ Eeshiina guwoosi hudiya, ak abeeda gayghwanung'waadanaan aba badaydaang'u, ak abeeda gayghaghu eaweegeasu aba badaydaang'u.”

¹⁴ Iimuchu nea ghwahita Abramu ng'eanyiida Misri ghwadaah fuga Misri gideaba gatmoodida aamiy muuchi.

¹⁵ Daah orjooga Farao gatmooni, ghaghwar aba madeeda Farao. Ak geayaat gatmooda gheeh Farao.

¹⁶ Iidu aba badaydeaba niny geesissa Abramu ng'asheega miyaas; ak geataw gisilga, ea heewga, ea jiirgwa digeeniga, ea fuga gadiyeeda was headiga, ea haweega gadiyeeda, ea gheamadiga digeeniga ea ngamiya.

¹⁷ Hean ghwalas NG'UTAMIIDA Farao ea gheanyi aba dawneeda haw aba badayda Sarayiheeda was gatmooda Abramu.

¹⁸ Ng'ata gaguursa Farao Abramu ak gwayeesha, “Ang'iing'i nihindanaaniin? Ghwasaan anda mii rukunean gideaba nih gatmoadaang'u?

¹⁹ Ghwasaan anda giyeeni, ‘Nih huda geamadu gil’, ak geageandi ghoah gatmoodeanyu? Asi nukwa gatmoadaang'u, ak guwi.”

²⁰ Iidu ghoadayda Farao iitaanyi; eahoana jeeda ng'eanyiida sea gatmoadaanyi ea buuneadaanyi ea haleanjeeda sean mideawa.