GHWASIILDEANGA 30 - Bibliyeeda Ghaydit

Ng'asheega Aguri

¹ Ng'asheega Aguri orjeeda Yake, ng'asheesu gwarukusa niny Itieli, asaha, Itieli ea Ukali.

² Aba huumwa aniini geawooschi dasha ea dawuurji diyeayda nea mii siida gil, ak ea meandeawani fughareeda uurji dea siida.

³ Mii daanaal geaw weaghuumeeda, ak ea mwaanali gil aba badayda dea ghaydit assagi.

⁴ Nidiyeada ng'eaha humng'eeda ak ghwararang'aan ghwahidu ng'eanyi? Niing'waay ng'eaha jeameeda aba geatindaanyi? Nirassa ng'eaha beega jeeda hang'daanyi? Gwasin ng'eaha muudeanooda ng'eanyiida? Gheawungaaschi ng'eaha? Gheawunga orjeedaanyi ng'eaha, heapi ginali?

⁵ Gili nyooh ea ng'asheanda ASEETA gil sisikteawa, niny igeambooda gil aba giika mwasiin.

⁶ Adiihaadi ng'asheanda aba jeeda ng'asheagaaschi, adagoowoowseey ak geadaah gideaba gibeahi ng'uya.

Ghwasiildeanga suuk

⁷ Geamuscheey ng'asheesu asiyeenyean, adiheawi damanda mii dameawa.

⁸ Geandeawanean ng'uyeega ea reengaweega, adigoonyean barbaranda ea meanang'oocheanduumeeda, goonean daghwardeanyu ak ghwahit.

⁹ Adiidu gealang'uuchi ak ghaanung'waneey heeda, nea geayeenyi, “Ng'utamiida ng'eaha?” Ak ea adeawooschi bwarbwar muuchi ak geajagwadiischi, nea gearugu mwadaagha gheawunga ASEETEANYU.

¹⁰ Adiing'uchi siida gadiyeeda ea siidaanyi haw, adiidu ghamwaashtaneey ak geadaah gideaba gindeawi giidiinyeanda.

¹¹ Gwanda seaygeeda iissa ghamwaashta ghweaniga nyaawa, nea moadawa ghawooda gheamadiga nyaawa.

¹² Gwanda seaygeeda iissa gwadeaksa geat gideaba aamiyaas nea gabwageat, ak ea miyeehuun ririnnyeanda nyaawa.

¹³ Gwanda seaygoojiga suuk mideawa ghwarjeeda muuchi, iissa gafool haleanjeeda sean nyooh ghwadaa.

¹⁴ Ak gwanda seaygeeda iissa geeshatka nyaawa ea ng'utkeaka gil, nea geeshatka nyaawa ea bargweaka, ak saawa gaganyeadi fuga barbari eegeandeawa badayda ng'eanyiida, ea fuga mandeawana gil aba bugusta buuneeda.

¹⁵ Mitka gwandeawa hawi iyeenya, iissa gooyeawda nea gwayi, “Goona, Goona!” Ak gwanda haleanji samwagu malang'u eara heeda ghayi, asaha, ang'wan mayeena “Nideay.”

¹⁶ Gheeda maloonghajeega, ea jeeda nyeah jeat, ea ng'eanyiida malang'u aba beega, ea beasta mayi “Nideay.”

¹⁷ Siida juuga ghwaan ak gafool nea mooleeysiiniit ghaamwat, gaygang'alu gheang'daanyi udaghuuyda jeeda moangoachi, ak ghwaak diibiga murgheata.

¹⁸ Gwanda haleanji samwagu deamdeameadi aba heedeanyu, asaha gwanda ang'wan mwaanali.

¹⁹ Naweeda rabearda aba humng'eeda, naweeda ichibooda aba badayda lagheaneeda, naweeda maleambooda haw aba badayda basooda, ea naweeda siida sea huda.

²⁰ Nih naweeda hiseadayeanduumeeda, iissa gweagiischi ak goobuus ghuutaanyi, ak gwayi, “Mii dasin ramaseanda.”

²¹ Gayghabwadan ng'eanyiida aba ng'asha samwagu, asaha aba ng'asha ang'wan mayghoamu ghamilikghta.

²² Soomjeanda ii huuw sugoocheanda, ea siida bearji leendeeda iilang'uut.

²³ Gatmooda meabwariinya inyas gawa gheenda, ak gwahearan huda gadiyeeda gheamata bea gheeda.

²⁴ Gwanda diyean ang'wan manang'i badayda ng'eanyiida, ak ea weaghoodi muuchi.

²⁵ Ulugootuwas diyeanga mandeawana uurjeenga gil, nea iissa geayda goodiiwsa geat hamita.

²⁶ Gwaleang'walajeega diyeanga mandeawana uurjeenga gil, ak iissa gwadeeksa gealga nyaawa iheenga lagheanga.

²⁷ Deashamga mandeawana sugoocheanda, ak iissa gaweay nea gwasin gharmucheeka.

²⁸ Gharbeasheeda gajamuusa ang'waanya aba geatingaagu, ak iissa gawa jeeda gealga sugoodiga.

²⁹ Gwanda diyean samwagu iissa beacheenga nyaawa gaba leanga, asaha, gwanda diyean ang'wan ak beacheenga nyaawa aamiyaas.

³⁰ Ng'adiida gwandeawa uurda ea gaburdeawa diyeanga suurja, ak ea mayghoawal diyeayda wassean.

³¹ Jurukuta nghaghwajeega iissa gawa aba weashweashta, sea ghwarayda, nea sugoocheanda gwanda madeeda fugaaschi.

³² Iinung'unyi leendeeda ak gighwari geaw ghana iinibadayi sinooda ng'asheega munyas, asi dukuta ghuutaang'u aba geatindaang'u.

³³ Inyas gisaji eanooga gaygwardu nagheeda, nea inyas gikuli sareeda siida gaygwardu foojeanda, nea dea gwarsa nyarasta gaygweadu jaliida.