GHWASIILDEANGA 25 - Bibliyeeda Ghaydit

Ghwasiildeanga suuk bea Sulemani

¹ Suh ghwasiildeanga Sulemani gil, ghayi ng'oar fuga Hesekiya was sugoocheanda Yuda.

² ASEETA geakghaambiit aba gideaba ghafuy haleanjeeda, ak sugoocheanda geakghaambiit aba giika ruguuni.

³ Gawuurji gidasheakta humng'eeda ea gidasheakta apeega ng'eanyiida, ea gidamwoamu usta eesikteawa fughareeda sugoocheanda gil.

⁴ Geanda ririnnyeanda aba heeda lapiya, ak gaygwasineey siida deang'shachi dabicheanda miy.

⁵ Geanda fuga munyas seara aba madeeda sugoocheanda, ak gaygamajeegiit gheambalmeadaanyi aba doobiiwnata.

⁶ Adiidu giihiimu geaw aba madeeda sugoocheanda, nea adihindi geaw siida haw.

⁷ Aba gideaba ghang'wana geeyeeshiineey, “Beeni hiji bea mwadiini” Mwasamwa gideaba geayiinyi mwadi aba madeeda siida haw. Giika idaahi aba gheanyangaaguun

⁸ Adilamwaji aada gheeda girgweageeda, aba gideaba iidu gajiidu ghwaroat gichea sina, inyas ghwayam muushoocheanda ng'asheesu iriguun.

⁹ Aduulni jaliideang'wa sea giischeewoocheandaang'u nea goobea geat, ak adagaba siisi rukuta ng'asheegeaba nuut.

¹⁰ Adagoong'eaweey siida iing'shi, ak ea maygoosha baspaseegaagu.

¹¹ Ng'asheanda sirugu damanda hidaat, gawuurji suulga dahaabu simwaara lagheanga sisina lapiya.

¹² Siida weaghoot iimiin gheang'da siida iing'shi, ghang'wana, mwasamwa ghuniida ghana ngoofajeanda dahaabooda miy.

¹³ Gawuurji gooroogeeda gapkeanda bea damanda lajita booga, ea giduurji giijasoocheanda doabiiwaat gil aba heeda fuga ajeakta, aba gideaba ghwanung' ghahawda saseenuuka fugaaschi hees.

¹⁴ Gawuurji shamooghuutka ea jeameeda manda roopta, ea giduurji siida ghwara geaw giimuusta ng'uyeega.

¹⁵ Aba milikghteayda haw siida ambaliischi gajeanung' ghamwas, ak ng'ushapta ng'arng'ar gaygwahirja geapkeeda.

¹⁶ Iinyasi maleeda giyaagi ea gwadeayi, adiidu ghwarikghnyi ak gikeesi.

¹⁷ Adibadiinayi gheeda giischeewoocheandaang'u galeagasean; adaghang'wastaneey ak ghwasinyi.

¹⁸ Siida muuwiisa giischeewoocheandaanyi ng'asheega ng'uyeega niny washta gil, ea gawuurji gulupta, ghana ng'uta ghana geacheeda ng'waan.

¹⁹ Siida ghus siida mii doabiiwaat damanda sawanadeeda, gawuurji geeshadeeda giinya ghana geeshta liy.

²⁰ Siida sarmasa duumda siida bearji gurmeahiida, gawuurji siida fwakta hang'weaka damanda gooroogeeda ghana gidang'weanda siyiin badayda giyeayooda.

²¹ Adawa hamita weajoocheandaang'u iibearji jalooda, iibearji muwooshta giidawi beega jea ghwali.

²² Aba gideaba gaynung' ghabwaspwas muuchi, gawuurji rarayga beasta aba uhuudaanyi, ak gaygabadiischooweey NG'UTAMIIDA.

²³ Jeameeda wiilooda ng'eanyiida biyeara gaygweadu roopta, ak eara agita badayda siida gaygweadu jaliida.

²⁴ Ghang'wana giibinda ghwanadeeda uhuuda gheeda, mwasamwa giibinda gheeda haw sea gatmooda jaleadayi.

²⁵ Gawuurji beega garbapi aba siida bearji muwooshta, ak ea giduurji giijasta miy gil leabu ng'eanyiida sheagi.

²⁶ Siida doabiiwaat iimwas ghwaat geeshta siida muy seara, gawuurji beega gheang'deenda sidatas.

²⁷ Mwahida gideaba gajaga maleeda muuchi, ea gideaba siida gagasa goodiing'u geaw niny.

²⁸ Siida moobala gurooroadaanyi nea gabwageaw, gawuurji mujiineeda sinyarja ak ea manda ghamarda.