GHWASIILDEANGA 15 - Bibliyeeda Ghaydit

¹ Sheayda ghuuta siida aba garbabanda gayghwanung' ghahawda nyarasta, nea ng'asheanda ng'waan gayghoahaat nyarasta.

² Ng'ushapta siida mideawa weaghuumeeda gabaloola ng'asheega fughareeda, nea ghuusiga fuga dasheahi gabaloola ng'asheega leendeeda.

³ Gheanyanga NG'UTAMIIDA gwanda ng'eanyiisean, ak gwasikteawa siida miy seara ea dea muy seara.

⁴ Ng'ushapta miy gawuurji geeta eaweega, nea munyinda ghuuta gwasawan buuneeda.

⁵ Siida bearji leendeeda inyeesa gafool gidarukusa ghwaan, nea damwas gidasirukusa gayghwanyas weaghuumeeda.

⁶ Gheeda siida doabiiwaat gwanda haleanjeeda saang'a, ak haleanjeeda nyas siida muy gaygooshealsa jeeda sawanadeeda.

⁷ Ghuuta siida doabiiwaat gwarukwiida fughareeda, nea guroorooda siida bearji leendeeda ea masnu.

⁸ NG'UTAMIIDA ghwasit lukghumeeda siida muy seara, ak gahoosan iimwaash ASEETA siida doabiiwaat.

⁹ NG'UTAMIIDA ghwasit naweeda siida muy, ak ghabwariiy siida aat geeshta ng'asheega miyaas.

¹⁰ Girgweaksiinda ng'waan gwanda badayda dea nung'usa heeda naweeda miy, nea dasit gideaba gajeewoowsa gayghami.

¹¹ Gheeda maloonghajeega ea nyariida aadaach aba madeeda NG'UTAMIIDA, abeeda ea mayghwaraanya gurooruunatka buuneeda!

¹² Siida foola fih magasa gideaba gajeewoowsa, ak ea magasa ng'asheega fuga weaghoodi.

¹³ Guroorooda hoosana gayghoamiidu gheamamda, nea gurmeahiida guroorooda gayghwanung' ghwanyar guroorooda.

¹⁴ Guroorooda weaghoocheanda gagaseadayi fughareeda, nea ghuusiga fuga dasheahi ghwaak ng'asheega leendeeda.

¹⁵ Eawoojiga sean bea siida sighabwas eamuy, nea guroorooda hoosaneat ea ghweelmeeda galeagasean gil.

¹⁶ Ghang'wana siida bwarbwar nea ghoawal gheang'da NG'UTAMIIDA, Mwasamwa meanang'oocheanda mida jeeda sawanadeeda.

¹⁷ Hamita ea nyeanyiida nea gwanda bariinyeega, mwasamwa ghweelmeeda banyeega riisheadi nea gwanda sicheeda.

¹⁸ Siida nyarasta ng'waan gaygweadu jaliida, nea siida mii asas nyaras gayghwanung' ghahawda jaliida.

¹⁹ Naweeda siida ghaleehooda gawuurji naweeda nyiit halaghweenga, nea naweeda siida doabiiwaat ea bwara gawuurji naweeda bareanda.

²⁰ Orjeeda mideawa weaghuumeeda gaygoohoosan ghwaan, nea dea dasha gaygafool ghaamwat.

²¹ Leendeeda hooseaneega gil aba heeda siida mandeawana fughareeda; nea siida mideawa weaghuumeeda gayghoadoabiiwa naweadaanyi.

²² Iimanda siida argweaksa buuneeda, gayghwayamwa gidagwachi jea eesin, nea aba seang'ayda fuga argweakiisa buuneeda, gajeesin gidida.

²³ Siida gaygoohoosan sheayda ng'asheanda ghuutaanyi, ak ng'asheanda sirugu aba damandaanyi aamiydaan.

²⁴ Naweeda siida mideawa fughareeda gawa humng'eeda heeda mida eaweega, gideaba gamulsa ea mawa jeeda gheeda maloonghajeega.

²⁵ NG'UTAMIIDA gaygwanyarja gheeda siida mideawa ghwarjeeda, ak gaygafur moonghooda masinung'weanda.

²⁶ Giiteemshooda siida muy sicheeda gil aba heeda NG'UTAMIIDA nea ng'asheega miyaasiin gaygoohoosan niny.

²⁷ Siida gasa haleanjeeda aba naweeda mwadoabiiwa, gayghwanung' ghoabita fugeaba gheanyi jeeda sawanadeeda, nea dea sit haleanjeeda hayapta gayghwanyas eaweega.

²⁸ Guroorooda siida doabiiwaat inyeesa ghanyi gooteemshi damanda miighwashaaha ng'asheanda, nea ghuuta siida muy seara inyeesa gwarina gea munyas.

²⁹ NG'UTAMIIDA ea sheageewa fuga mii doobiiweadi, ak gooleeysiit mooshta ASEETA bea siida doabiiwaat.

³⁰ Weeshinda gheanyanga gaygoohoosan guroorooda, ak giijasta miy gayghwanung' ghahawda geaka.

³¹ Siida aleeysiit girgweaksiinda miy, gaygoobiida bugusta fuga mideawa weaghuumeeda.

³² Nea daaheawa gideaba gajeenaal gafool geaw nea gabwageaw, nea dea mwas giinealshooda gayghwanyas weaghuumeeda.

³³ Gheawalmeeda gheang'da NG'UTAMIIDA giinealshooda weaghuumeeda gil, eatoodeaba geaw bea ng'eanyi gaygooshooyna mureeda.