GHWASIILDEANGA 13 - Bibliyeeda Ghaydit

¹ Jeepta mideawa weaghuumeeda gaygooleeysiit iita ghwaan, nea dea fool maygooleeysiit ng'asheega sirgweaksiina.

² Siida miy gayghwanyas gea miyaasiin aba ng'asheega ghuutaanyi, nea siida reengani fih gaygoobiida nea gaba ghwarjeeda.

³ Siida miy gayghwanyas gea miyaasiin aba ng'asheega ghuutaanyi, nea siida reengani fih gaygwanuus geaw.

⁴ Saseeda siida ghaleehooda gagasa ak ea mayghwanyas gil, nea saseeda siida gadiiy muuchi gayghwanyas hamita muuchi.

⁵ Siida doabiiwaat ghwasit ng'uyeega, nea siida muy gwasin ng'asheesu nea mabwaspwasa.

⁶ Doobiiwnata gaygafur siida doabiiwaat aba jeeda naweadaanyi, nea riing'eeda gayghwalasta siida muy.

⁷ Gwanda siida inyeesa gwahinda geaw giliwas meanang'ocheanda, nea mandeawana eara gil, ak gwanda dea hinda geaw gil bwarbwar, nea ea meanang'ocheanda gil.

⁸ Leendeeda siida meanang'oocheanduumeadaanyi gil, nea siida bwarbwar ea manda gida jea ghang'uda muuwda.

⁹ Weeshinda siida doabiiw ghoabwaay muuchi, nea gheaboong'nyeanda siida muy gaygamis.

¹⁰ Ghwarjeeda gaygweadu jaliida ak ghwahit, nea gea mideawa weaghuumeeda gayghamwas girgweaksiinda.

¹¹ Haleanjeeda sinyasa giirabeakshooda gaygoosha, nea dea awaam nea goojiileesa gajeeheasa.

¹² Gidida sirariin iishing'da ghwahidu gwasawana guroorooda, nea iinyagaan gidagasa siida abeeda ea geeta eaweega gil.

¹³ Siida fool ng'asheega sirgweaksiina ghwalas uhuudaanyi nea gabwageaw, nea damwas diigheanda gayghwanyas giimearda.

¹⁴ Giinealshooda siida mideawa weaghuumeeda gawuurji gheang'deenda mideawa eaweega, gayghwanung' gamulsa siida ghuduumbwaadeeda miyeeda.

¹⁵ Fughareeda miy gaygweadu alooheeda, nea naweeda siida muy ea sawanadeeda gil.

¹⁶ Siida mideawa weaghuumeeda gwasin haleanjeeda sean aba fughareeda, nea siida dasha gooneayi leendeadaanyi.

¹⁷ Giijasoocheanda muy gayghoabuuta buuneeda jeeda sawanadeeda, ak giijasoocheanda doabiiwaat gaygweadu ng'wanooda.

¹⁸ Barbaranda ea baspaseega gayghoang'waay siida maduupa girgweaksiinda, nea dea aleeysiit girgweaksiinda gajeataw mureeda.

¹⁹ Gwanda hooseaneega inyasi gidida igasayiin, ak fuga dasheahi ghwasit gideaba gaygamulsa ng'asheega munyas.

²⁰ Adeaydooscheewana siida mideawa weaghuumeeda, gayghwanyas weaghuumeeda, nea dea adeaydooschi fuga dasheahi gayghwanyas sawanadeeda

²¹ Fuga riing'eega gayghwanyas ng'asheega munyas, nea fuga doobiiweadi gayghwanyas gea miyaas.

²² Siida miy gayghwanung'wa hearaniischooda diibigeaba gaaschi, nea meanang'oocheanduumeeda siida riing'eeda geetiiwsa siida doabiiwaat.

²³ Madamnyeanda siida bwarbwar ghwaheas booga muuchi, ak geegeanda nea mii aba doobiiwnata gil.

²⁴ Siida magadiyeata bileangidaanyi ghwasit orjeedaanyi, nea dea bwariiy orjeedaanyi gaygabean goowoowsa.

²⁵ Siida doabiiwaat gwandeawa hamita deayeat, nea siida miy seara gaygwanya jalooda.