Galattiya 5 - Bibliyeeda Ghaydit

Oofura giibaldeang'wa bea geat

¹ Aba giibaldeaba geat ninung' Gristo eepala geat; asi amiinaada nea goomilmiliidayi, ak ea adagudoomwaschi gicha gideaba gajeerassa gheatkweakeagwa yookeeda soomjeandumeeda.

² Aniini Bawlo gil, ak geayeeshiineegwa iisiyaadeagwa ghasmeahooda abeeda Gristo ea maygwalooseegwa gil.

³ Ak geamuuwiisi ng'asheanji gicha gili was sih eayaat ghasmeahooda gammiisa gideaba gayghoang'waay deaweedajeega sean.

⁴ Asi silealneegwa aba Gristo, agoogeeda jea eegooneegwa doobiiwnata aba deaweeda; noapeadi ak gooriteawi jeeda dagheerjeanduumeeda.

⁵ Aba gideaba aba guroorooda aba naweeda masaweega geamuughu gidasirarji aba doobiiwnata.

⁶ Aba gideaba siida iimida jeeda Gristo Yesu gawa ghasmeahooda ghana ea mawa ghasmeahooda aba headaanyi mii gili, gidahaw masaweega mideawa bariinyeega gil.

⁷ Asi agaleada muuchi; ak ea ng'eaha weadaneegwa gideaba gajasisiina mureeda huumeanda?

⁸ Ghurghuri maleapna heeda siida ghayi guurneegwa.

⁹ Hamiireeda mwanang' gayghwanung' ghaghuut geaw murmurjeanda sean.

¹⁰ Aniini ghaaghuschi Ng'utamiida ea gideaba mwajayamwana mwajadaakta ng'asheega gididaakti aniini; nea siida adeawiideegwa agooga gayghwanyas girgweaksiindaanyi, siida wassean.

¹¹ Ak eara aniini orjoogiyya iyearukwiidi ng'asheega ghasmeahooda, abeeda ghwasaan anda gudeesawanan? Abeeda aba hiji rusooda beehiida ea sigeanda.

¹² Aniini gideabali fugiga nung' ea moopidi ng'eanyiini ghwalajaada geat!

¹³ Aba gideaba geeguurneegwa anyasa giibaldeaba geat, orjoogiyya; ak ea adoanung' ghoah giibaldeang'wa bea geat nyasita gheata ng'asheega gasa saseeda, nea aba bariinyeega ea daba siisi was soomjeamba nuut.

¹⁴ Aba gideaba deaweedajeega sean geemajeek aba jeemba ng'asheanjagi, Nea nih gil, bea gideaba, “Bwariiyda giischeewoocheandaang'u gidibwariiydi geaw.”

¹⁵ Asi iighanyaadi nea ghoanyeanyeahaadi geat gooshageachi adagaba siisi ak nuut.

Guroorooda ea saseeda

¹⁶ Asi geayeeshiineegwa, Aweayeena aba guroorooda nea ghanyea majaduulni haleanjeeda gasa saseeda.

¹⁷ Aba gideaba saseeda gagasa gidida magassa Gurooroodean, ak eara Guroorooda gagasa gidida magassa saseedean; aba gideaba suh gwasheang'nyi ak ea majoamuusa asina gidoogasayi.

¹⁸ Ak iyoonung' goobaleegwa Guroorooda maygoobaleegwa deaweeda.

¹⁹ Ak ng'asheega munyas sina saseeda aadaach nea suh; hiseadayeanduumeeda, ririnnyeanda, ng'asheega munyas,

²⁰ mealuuleega, beeneetkweanduumeeda, furjeeda, jaliida, geawunda gheang'da, nyarasta, shidoodeaba ghaang', dardeayda, nabita ng'uyyeega,

²¹ ng'ulooda siida aba gheang'da muy, booktuumeeda, leeshooda, ea ng'asheega uurji suh. Neabean damiin gheang'deang'wa gawuurji gidaghayi eareekusiindi gideaba fuga sina ng'asheega sunu maygaweay jeeda Gheambalmeeda ASEETA.

²² Ak haghweega Guroorooda ea bariinyeega, hooseaneega, hoyyoo, milikghteayda, inyeanda jeeda, miyinda, ea doobiiwnata,

²³ Garbabanda, giing'ooydeaba geaw, aba badaydeaba ng'asheesu manda deaweeda.

²⁴ Fugiga was gea Yesu Gristohiin niingoorda saseeda ea ng'asheagaaschi munyas bwariiy nea gagasa.

²⁵ Iisipideewi guroorooda gagasa eeweaya nea geandeawi guroorooda.

²⁶ Adeegwaray geat mwadaagha, ak ea adeesadayi geat, nea adeeng'uli geat gheanyanga munyas.