Galattiya 4 - Bibliyeeda Ghaydit

¹ Ak ng'asheanda jea darukuneegwa ea nihi, siida jea gwahearaniischi iidu ea baleanda gil, ea mwang'ala giing'oonyaneeda, earapeadi haleanjeeda sean gaaschi gil;

² niny aba damani gwanda geatinga fuga siiteaga gadiyeeda ea fuga furiischi ea ghwahita damandida ghayi rugu ghwaaniin.

³ Eara aseasa; ghayi nea geawooschi diibiga geewooschi giing'oonyanga ak geegadiyeesi meang'nyeandeenda ambaliischi aba ng'eanyiida.

⁴ Iidu nea ghwahita damanda, hean goojeagu ASEETA Orjeedaanyi, jiilu gatmooda, aba jeeda deaweeda,

⁵ ak gootin fugiga mida jeeda naweeda deaweedean, ak geenung' eewoosa orjooga.

⁶ Iidu iinoowooschi orjoagaaschi hean goojeagu ASEETA Guroorooda Orjeedaanyi jeesingaasa, ayeawda nea gwayeena, “Aba! Nea Bwaabwa gil!”

⁷ Asi aba heeda ASEETA mudu woosa giing'oonyaneeda muwoosi baleanda, ama muwoosi orjeeda abeeda ea muwoosi siida jea gwahearaniischi.

Gidagasa Bawlo aba badayda fuga Galatiya

⁸ Ak aba damandida ghayi mii analana ASEETEAN, abeeda googadiyeesi fuga mawoosa aseecheeka;

⁹ nea ghamneawa iinoanali ASEETA, ghana ghwanaleagwa ASEETA, gajabiikteaydaan bwadaw gicha jeeda haleanjeeda ng'arng'ari was meangeenda, ak googasayi abiikta jeeda giing'oonyaneanduumeeda gicha?

¹⁰ Agooga goong'oonyayi eawoojiga ea sheega ea damanda ea gweanyeeka!

¹¹ Aniini ghaabeali aba agooga ghaaghanyi gideaba gadiyeeda easinyi aba badahuukeagwa niiw mwadaagha.

¹² Orjoogiyya, geamuscheegwa awuurjeewanean, aba gideaba aniini geawuurjeewaneegwa. Ea manda gilimuy noosinnean;

¹³ Ak ghamneawa ghoanali gideaba aba munyinda saseeda gearukuneegwa giijasta miy dea madeeda;

¹⁴ ak earapeadi aamnyaanyi ea mii afoolean ghana aheawaan ak ghoadeaptaaydanaan malaykajeanda ASEETA, gawuurji Gristo Yesu.

¹⁵ Gwandeenu abeeda ng'wanaweega ooyeeniisi geat geendeawi? Aba gideaba geamuuwuneegwa gideaba aba damandida inyeeda ea gil jea ghamwas gil gajaloota gheanyangeagwa ak googoonyean.

¹⁶ Heapi! Ghamneawa ea neawooschi weajoocheandeang'wa aba gideaba gearukuneegwa huumeanda?

¹⁷ Fiisu gagaseegwa, ak ea magaseewaneegwa naweeda miy, saawa gagasa gwajapseegwa jarooda, ak abeeda agooga googasayi saawa.

¹⁸ Galeagasean aamiy gideaba geedeawiisa buuneeda suurja aba ng'asheega miyaas, ea mii gideaba damanda sindeayi gil gabeachi.

¹⁹ Ea diibigeasu manang'i, geasawani muuchi aba badahuukeagwa, ea eeyi bwak ea ghwadaajiit Gristo aba jeesingeagwa!

²⁰ Gideabali gwachi geendeayi sea agooga ghamneawa ak ghwayamwa seareedeanyu, aba gideaba ning'udan muuwda aba badahuukeagwa.

Gida sigala Hagari ea Sara

²¹ Asi rukunean, ang'iing'eeda gasa gawa jeeda deaweeda, neada ea niyiinyi deaweeda?

²² Ghayi geang'waar gideaba Abrahamu gwandeawa orju iyeenya, agi gaba gatmooda was giing'oonyaneeda, niirja gaba gatmooda abal geaw.

²³ Nea orjeeda giing'oonyaneeda geejiilda gideajusu bea saseeda, ak orjeeda gatmooda abal geaw geejiila heeleesiinda.

²⁴ Asi nih giiweaghanda gil: gadeemsu neajuut iyeenya. Akaleala gwaleabu Giijeeda Sinayi, ak gwaji diibiga was giing'oonyanga; nea Hagari.

²⁵ Aba gideaba Hagari gawuurji giijeeda Sinayi mida ng'eanyiida Arabiya; ak gwandeawa iiteaba geat sea Yerusalemooni bea ghamneawean, aba gideaba gwanda jeeda ging'ooyda sea diibigaaschi.

²⁶ Ak mujiineeda Yerusalemooda mida humng'eeda goobal geaw, ak niny ea iyya gil.

²⁷ Geeng'oar aba jeeda ng'ooruut gideaba, “Hoosana ang'iing'eeda was soonooda nyaajeat majiila; ajuura muuchi nea giiyeawdi ang'iing'eeda ghayi mii nyasa sawanadeeda jeata; aba gideaba diibiga gatmooda mandeawana siyeeda aasaang'a ea ghang'al gatmooda mideawa siyeeda.”

²⁸ Ak ghamneawa orjoogiyya geewuurjeewi Isaka aba gideaba goowooschi diibiga heeleeda.

²⁹ Ak aba damandida ghayi sijiilda gea eawoojisu bea gealaaniin, inyeessa goodeawiit diita ghayi sijiila Guroorooda, ak eara ghamneawa ea giduurji gil.

³⁰ Ak gwayiin ng'ooruut? “Gwayi hoana giing'oonyaneeda ea orjeedaanyi; aba gideaba orjeeda giing'oonyaneeda maygwahearaniischi sea orjeeda gatmooda abal geaw.”

³¹ Asi orjoogiyya, aba sareani aseasa meawasi diibiga giing'oonyaneeda, geawooschi diibiga gatmooda abal geaw.