Ebraniya 9 - Bibliyeeda Ghaydit

Ghadoowanda ASEETA aba ng'eanyiida ea humng'eeda

¹ Asi ghamneawa eara neajeeda madeeda gwandeawa diigheanda gichea eabwata ASEETA ea heeda ghaydit aba hiji bea ng'eanyiidean.

² Aba gideaba iissa geesin maheemajeanda dea madeeda nea dea siyiina gheaboonyaneeda ea measa ea mukaateeydida bea giihiimnoodean; geeguura Heeda Ghaydit.

³ Badaydeaba hang'deaba iyeenya bea beashooda gwanda maheemajeanda was heeda Ghaydit muuchi,

⁴ nea gwandeawa heeda wagiida sisina dahaabu mideawa shearooda ng'andit ea sandakwajeanda mida jeeda neajeeda nea siikwealsa meadajeega sean aba dahaabu nea gwandeawa giihearmooda meeng'meeng'i mida hamita siguura maana, ea bileangida Haruni aruudu damealga, ea measeeda neajeeda;

⁵ nea uhuuda gwanda malaykajeega mideawa giigheambiita nea goojiroon hoorgeeda ng'eeninda. Nea aba badahuukeaba haleanjeeni ea mwoamu usi eerukuna muuchi nea geekingiinayi.

⁶ Hean giidiing'diing'deaydeaba ng'asheesu ea sisin, iissa gaweay ashoohoodiga galeagasean jeeda maheemajeanda madeeda ak gwasin gadiyoojiga nyaawa bea mooshta ghawooda;

⁷ nea deaba iyeenya iissa gawa ashoohoocheanda haw nea gaba geaw, iissa gawa nibwagi aba jeeda gweayda, nea ghwaat foojeanda adayda aba badaydaanyi ea dea giidiinyeanyeeka buuneeda.

⁸ Nea aba nih ghoahiimu Guroorooda Ghaydit gideaba naweeda jea ghoahiita fih heeda ghaydit miyeejaat aba hiji duu ghamiinaadawa maheemajeanda madeedean

⁹ (nea geanung' gawuurji sea damani bea ghamneawean.) Nea aba badiini, haleanjeeda siitayda ea gea lukghumajeega iissa geatayda moamu goomajeek fughareeda siida mwaash ASEETA,

¹⁰ ak iissa gabeachi hamita ea leeshooda sea giihuushooda, was deaweedajeega saseeda ghayi sigu ea ghwahita damanda jea eebiikta eesina gicha.

¹¹ Iimuchu nea ghwahidu Gristoyda was ashoohoocheanda haw bea haleanjeeda miyaasiin jea ghwahidu, hean aba naweeda udahabeascheanda haw majeek (meesinana geatinga, nea maba badaydeaba ng'eanyiini)

¹² iissa gawa nibwagi Heeda Ghaydit, nea mwaada foojeanda nooga ea gea muhooga niny ghwaat foojeandaanyi, ak gwasin lealeanooda manda muudeanooda.

¹³ Aba gideaba siida mideawa riing'eeda iisiipuuna foojeanda nooga ea gea heewga ea deareeda haghweanda iyamiidu nea ghoamu goohuun saseeda,

¹⁴ abeeda gayghwaraanyaataan muuchi foojeanda Gristo, dea aba Guroorooda manda muudeanooda ghoadaw geaw ASEETA nea meerukunana badaydaanyi gidamuy, gayghoamiidu fughareengeagwa aba gadiyoojiga nimeewa ak gagadiiyeesa ASEETA majeek.

¹⁵ Asi niny dea aduuptooschi buuneeda aba neajeedeesh gil, ak abeeda fugiga siguursean ghwanyas heeleesiinda hearaniischooda manda muudeanooda, hean gapnu miyeeda jea gwalealna saawa jeeda ramaseanyeeka aba neajeeda ghayi bea madeeda.

¹⁶ Nea heeda mida hearaniischooda, abeeda miyeeda siida ghayi sin gayghang'eat ghuuta.

¹⁷ Aba gideaba hearaniischooda iissa gamajeegiit iihidu miyeeda, amadu ea manda uurda aba damanda duu eamajeek dea ghayi sin.

¹⁸ Hean eara neajeeda madeeda ea mamajeegiida iimanda foojeanda.

¹⁹ Nea gilinyoo ea diigheanda gil mida jeeda deaweedeeda nirukusa Musa buuneeda, gageanu foojeanda muhooga ea gea nooga, ea beega ea buudeega areeri bea gisilga ea hisoopo, ak geapuuna sean gitaabu ea buuneesean,

²⁰ nea gwayeesha, “Suh foojeanda neajeeda gil ghayi rukuneey ASEETA.”

²¹ Ak aba naweani ghoabuuna foojeanda maheemajeanda sea haleanjeeda sean sigadiydooscheata damanda badita ASEETA.

²² Aba huumwa, aba jeeda deaweeda gwaramagu eamiina haleanjeeda sean foojeanda, ak iimeahiida foojeanda ea manda samsiinda riing'eega.

Lukghumeeda Gristo gageanda riing'eega

²³ Ak ghwadoabiiw gideaba haleanjeeda uurji gea humng'eeda gideaba geamiidu aba naweani, nea haleanjeeda humng'eeda geamiina lukghumajeega miyaasiin mawuurji suh.

²⁴ Aba gideaba Gristo nuwa jeeda, mii gideaba gawa heeda ghaydit sisna geatinga gil, niny gawuurji sea diita bea huumwaan, niny gawa humng'eeda huumwa, ak ghamneawa ghwahidu nea gawuurji ASEETA aba badahuukaasa.

²⁵ Ak ea mii gideaba iissa gayghoadayda geaw galeagasean, gawuurji ashoohoocheanda haw iissa gawa Heeda Ghaydit nibwagi aba jeeda gweayda nea mwaada foojeandaanyi;

²⁶ aba sareani gwachi gaygabiikiida jeeda sawanadeeda ghang'eada dea ghayi sisna sindeeta ng'eanyiida. Ak aba nih, ghwahidu nibwagi aba muudeanooda damanda ak gageanda riing'eeda aba giidaydeaydeaba geaw ghoah lukghumeadaanyi.

²⁷ Hean gawuurji gidaghayi siitawuda siida miyeeda nibwagi, amang'ata ghwahidu girgweaksiinda,

²⁸ gwasunu eara Gristo, niny ghayi geatayda nibwagi ak gageanda riing'eega fuga saang'a, gayghwahidu deaba iyeenya, ak ea mayghwahidu aba badayda riing'eeda niny gayghoan gwalealu fugiga amuuku niny muuchiin.