Biblia Todo Logo
線上聖經

- 廣告 -

Ebraniya 7 - Bibliyeeda Ghaydit


Ashoohoocheanda was Melkisedeki

1 Nea abeeda Melkisedeki, was sugoocheanda Salemu, was ashoohoocheanda ASEETA haw bea humng'eeda, gwaroonyi sea Abrahamu nea gwaleabu nuuseadayda sugoodiga ak ghoadaw niny ghawooda;

2 nea Abrahamu ghoadaw niny gida aba gilatamanamughuush aba jeeda haleanjeeda sean. Niny duweacheeda, aba iisiroobu gheawungaaschi, sugoocheanda doobiiwnata, ak gabiissa ea sugoocheanda Salemu, ak ea sugoocheanda hoyyoo.

3 Niny manda ghwaan ghana ghaamwat ghana rooproobanga, ak ea manda giing'eeta askwearjoojigaaschi ghana huuydeanda eaweagaaschi, gawuurji sea Orjeeda ASEETA nea ashoohoocheanda manda muudeanooda.

4 Asi daaha hawundaanyi giteena! Abrahamuheeda was gheamba ghweanigaasa ghoadaw niny gilagi aba jeeda gilatamanamughuush bea easanga.

5 Nea eara diibiga Lawi ghayi nyas ashoohoocheanduumeedean, gwandeawa diigheanda aba deaweeda jea gageandeawa heeda buuneeda haleanjeeda aba gilatamanamughuush, nea heeda fuga siduupcheewi, nea eara suh ea jeata Abrahamu.

6 Nea siisi maba rooproobang'suun ghoawaam haleanjeeda aba gilatamanamughuush aba heeda Abrahamu ak ghoadaw ghawooda ninyeeda mideawa heeleesiinda.

7 Ak ghanyea meesheang'nyeesiina gideaba dea mwanang' nibadiischeesa dea haw.

8 Aba hiji gageanda haleanjeeda aba gilatamanamughuush aba heeda fuga jea gameewa; nea aba hiji gwanda dea simuuwu gideaba eamajeek.

9 Nea ghoamu sih gwayi Lawi ninyeeda ghayi awaam haleanjeeda aba gilatamanamughuush, ghoadayda haleanjeeda aba gilatamanamughuush aba naweeda Abrahamu,

10 aba gideaba abeeda niny miyeeji damanda roonyeewa niny sea Melkisedeki.

11 Asi doobiiwnata iisinyas aba heeda ashoohoocheanduumeeda Lawi (hean aba nih ghwanyas buuneeda deaweeda,) abeeda gudeegasa ashoohoocheanda nuut jea ghang'eat uurji Melkisedeki, ea ghang'al dea sirugu uurji Haruni?

12 Aba gideaba iimida yamita aba ashoohoocheanduumeeda, abeeda ghwahit gideaba gajeayam eara deaweeda.

13 Nea siida was dea sirukuna ng'asheesuun gaba eamwa nuut, manda dea nisin gadiyeeda aba heeda wagiida.

14 Hean aadaach gideaba Ng'utamiideanya gwaleabu jeata Yuda, iidu aba gidaguuyeata sea eemeedida ghanyea marukuna gil Musa aba badayda ashoohoodiga.


Ashoohoocheanda nuut, uurji Melkisedeki

15 Iidu ghwadaajiit muuchi ng'asheesu aba iiridu ashoohoocheanda nuut nea gawuurji sea Melkisedeki,

16 amadu ghoah ashoohoocheanda, nea mii aba naweeda deaweedeeda gasa saseeda gil aba jeata geaghus aba uurda eaweega mayghwadatasa.

17 Aba gideaba geemuuwuuna badaydaanyi nea geeyi, “Ang'iing'i guwoosi ashoohoocheanda manda muudeanooda, nea gawuurji Melkisedeki.”

18 Aba meatkweenagi, diigheanda ghayi bea madeeda sisach aba ng'arng'arandaanyi ak ea marachi gil

19 (aba gideaba deaweeda manda gissin ak gamajeegiit); aba meatkweenagi, ea sigu gidamiy sirarji, aba nih ea sineekiisi ASEETA.

20 Ak ea masa nea manda habeawooda.

21 Nea fugiga ghayi bea mwadi was ashoohoodigean ghwanyas hoorgajeega nyaawa nea mwaaga habeawooda, ama duuku nih geetawa habeawooda, “Ng'utamiida niyaak habeawooda ak ea mayghwayam fughareadaanyi, ‘Ang'iing'i guwoosi ashoohoocheanda manda muudeanooda.”

22 Ng'asheanji aba huumwa ghwanung' ghoah Yesu neajeeda adareamshi.

23 Ashoohoodiga madeeda ghayi aasaang'a iisiyiida, aba gideaba ghayi ghaweada miyeeda giibinda hoorgajeega nyaawa;

24 nea niny ghoang'waay ashoohoocheanduumeadaanyi nea goomajeek, aba gideaba niny gayghwashng'u damanda mamuudeana.

25 Nea giduurji sean ghoamu aba damanyoojiga sean gwalealu fugiga neekiissa ASEETA aba ninyiin, nea niny gwanda galeagasean nea gooduupchi saawa.

26 Asi ghwahit gideaba gajeendeawana ashoohoocheanda haw uurji nih, ghaydit, meerukunana badayda ng'asheega munyas nyaah siirja, siheeli sea fuga riing'eega, siitiing'da ea ghwalaabwa hoowa humng'eeda.

27 Niny manda gidagasa, mawuurji ashoohoodigiga heesiin, iissa ghoadayda lukghumajeega galeagasean, iissa ghanyi ghoadayda aba badayda riing'eagaaschi niny amadu ghoadayda geaw.

28 Aba huumwa deaweeda iissa gageanu fuga ng'arng'ari ak ghwanung' ghoah ashoohoodiga hees, nea ng'asheanda habeawooda, eadu geeshta deaweeda, ghwaloat Orjeeda ghayi bean ea hidaat damanda manda muudeanooda.

The Bible in Datooga © Bible Society of Tanzania, 2015.

Bible Society of Tanzania
跟著我們:



廣告