Ebraniya 4 - Bibliyeeda Ghaydit

¹ Asi heeleesiinda beata jeeda giibindaanyi gwanda heeda, ak gidabal geabeali ak ea mwaramwasa sih aba jeedeang'wa ak geergweaksiina gideaba mwanyasa.

² Aba gideaba giijasta miy ghwahitaayda heedeanya gidahitaayda heanyaawa; nea iita nyas ghanyea maloosiina gil, aba gideaba mwanyasa masaweega aba jeeda fuga iiy.

³ Aba gideaba aseaseeda ghayi nimwas gaygaweay jeedeaba fuuftida, gawuurji gidanyaashta niny, “Gawuurji gidaayaakti habeawooda aba nyarasteanyu, ‘Ghanyea maygaweay jeeda fuufteanyu,’” earapeadi niisha gadiyoojigaaschi ghang'eada dea ghayi sibwada sindeeta ng'eanyiida.

⁴ Aba gideaba gwanda heeda rugu iita eaweeteaba ispwa nea gwayi, “Ak gafuuf ASEETA eaweeteaba ispwa aba gadiyoojigaaschi sean.”

⁵ Nea gabiikta gwayi aba hiji, “Maygaweay jeeda fuufteanyu.”

⁶ Asi eara gwasa gideaba gwanda fuga jea gaweay jeeda, nea fugiga ghayi asheeda ghoang'waay giijasta miyiin ghwaraay gaweay jeeda aba nyoota mureeda,

⁷ gicha gagasa eaweecha nuut, “Askweareani” nea gwarukuna ghuuta Dawdi iimuchu nea ning'ata damanda haw, aba ng'asheega ning'ata giideascheeda, “Askweareani, iyoayiinyi ghuutaanyi, ea adoahang'waanyi gurooruunatkeagwa.”

⁸ Inyeeda ghayi Yoshuwa ea niidaw saawa fuufta, abeeda gwachi ASEETA ea maygabaloola eaweecha nuut.

⁹ Asi, sighus fuufta eaweeda sabaato aba heeda fuga ASEETA;

¹⁰ aba gideaba siida weah jeeda fuufta ASEETA earada gayghwanung'waada gadiyeadaanyi gawuurji gidanung'waadayda ASEETA gadiyeadaanyi.

¹¹ Asi gagasa giimiriikta beata jeedeaba fuufidi, ak abeeda ea manda siida jea ghoabeadaayda gidida aba nyoota mureeda.

¹² Aba gideaba ng'asheanda ASEETA ea majeek ak gagadiiy ak gwandeawa eaweega, ak gwandeawa uurda, ak ea ng'aniip ea ghang'al ng'uta ng'aniip meadajeega sean, iissa ghang'ut ak gooheeli fughareeda ea guroorooda, ea roobuutka ea gudadeeda, ak ghoamu gwasikteawa fughareenga ea gidabwariiy guroorooda.

¹³ Ak aba madeadaanyi ea manda gidaghayi sisin jea ea funyaat, amadu aadaach haleanjeeda sean ea dawiiri nea daachi aba madeeda gheanyangaaschi nea dea jea goorgweakseasa.

Yesu Ashoohoocheanda haweewa seani

¹⁴ Ghang'eada damandida geendeawi ashoohoocheanda haw ambal sean ghayi sik bugusta humng'eeda, nea Yesu, Orjeeda ASEETA, asi eang'waanya muuchi gidida simwaschiin.

¹⁵ Aba gideaba meendeawani ashoohoocheanda haw moamu ghabwayda ng'arng'aranyeakaasa, geandeawi dea sisissa mureeda sean ak geesimsimda gidaghayi sisimsimdaneasa, amadu ea miigwasin riing'eeda.

¹⁶ Asi gagasa eeneekiida aba gidasirarji eapkaana heeda hoorgeeda ghaambiidaat bea dagheerjeanduumeeda, ak abeeda geanyaschi baydeayda ak geanyaschi dagheerjeanduumeeda jea ghaweat fih damanda sigasseewa.