Ebraniya 3 - Bibliyeeda Ghaydit

Yesu eahaweewa Musa

¹ Asi fuga eaduupcheewi ghaydidi, siguuyeesi guurnooda humng'eeda, asikteawana Yesu, was giijasoocheanda ea ashoohoocheanda haw masaweagaasa.

² Niny ea doabiiwaat aba heeda dea ghayi ajeagu niny, gawuurji gidawooseata Musa doabiiwaat aba jeeda gheeda ASEETA.

³ Eara Yesu ea sinung' ghoah dea doabiiwaat muuchi biissa ea ghaambiidaat ea ghang'al Musa ak gawuurji siida deas gheeda gwandeawa mureeda ea ghang'al gheeda.

⁴ (Aba gideaba giliwas gheeda gwanda siida deas, nea dea deas haleanjeeda sean ea ASEETA.)

⁵ Nea Musa ea doabiiwaat aba haleanjeeda sean mida jeeda gheeda ASEETA nea gawuurji soomjeanda, ak gamuuwu haleanjeeda jea eergu galanya,

⁶ nea Gristo ea doabiiwaat aba jeeda gheeda ASEETA nea gawuurji baleanda. Ak geewooschi gheanyi iisiing'waanyi muuchi gidida sisikteawiin nea geaghwarji gidida sirarjiin.

Fuufta fuga ASEETA

⁷ Asi, gawuurji gidida rugu Guroorooda Ghaydidiin, nea gwayi, “Askweareani, iyoayiinyi ghuutaanyi,

⁸ ea adoahang'waanyi gurooruunatkeagwa awuurjeewana fuga nitambiilan, aba eaweeda simsimda aba jeeda dareapcheeda,

⁹ damanda simanean ghweanigeagwa ak ghwadaah gadiyoojigeasu aba gweanyeew haradam.

¹⁰ Asi iidu ghoanyareasan seaygeedida, nea gwayi, ‘Iissa gwarooda galeagasean aba jeesinga gurooruunatka nyaawa; ak ghanyea mwanala naweadingeasu.’

¹¹ Gawuurji gidaayaakti habeawooda aba nyarasteanyu, ‘Ghanyea maygaweay heeda jea dafuufa.’”

¹² Ang'ula, fuga eaduupcheewi, adiidu goobiida jeedeang'wa munyinda ea guroorooda mandeawana masaweega, jea ghwanung' oopeada ea asheagiidana ASEETA mideawa eaweega.

¹³ Daba siisi amajeek nuut galeagasean, aba hiji duu eeguura “ghamneawean,” ak ea manda jeedeang'wa siida jea ghoahang'waay aba reengaweega riing'eeda.

¹⁴ Aba gideaba geeguuyeesi Gristo, iisibeacheewi gideaba geang'waanyi muuchi gidida sisikteawi amwadiin ea gagul muudeanooda,

¹⁵ Iidu ea siyi, “Askweareani, iyoayiinyi, ea adoahang'waanyi gurooruunatkeagwa awuurjeewana fuga nitambiilan.”

¹⁶ Geabeang'a gil fuga iiy ak ghwadaambiilan? Neada ea mii fuga ghayi leabu Misri nea ghoahaaghwiidaan Musahi?

¹⁷ Ak ea akeega gil fuga anyareas gweanyeew haradam? Neada ea moanyareasa fuga ghayi sin riing'eeda, abeedeaysa muscheeka nyaawa dareapcheeda?

¹⁸ Ak ea akeega gil fuga aksa habeawooda gideaba maygaweay heeda fuuftaanyi, neada ea mii fugiga ghayi masisiina mureedean?

¹⁹ Hean geadaayi gideaba mayghoamu gaweay jeeda aba nyoota masaweega.