Ebraniya 11 - Bibliyeeda Ghaydit

Masaweega

¹ Asi ghamneawa masaweega goomajeek haleanjeeda sirar, ak gwarugu iita haleanjeeda meadaaha.

² Aba badaydeaba nih ea ninyas gweargwa ghaydidanda huumwa.

³ Aba masaweega geanali gideaba ng'eanyiida geesin aba ng'asheanda ASEETA, ak eara haleanjeeda sidaah ea meesinana haleanjeeda meadaaha.

⁴ Aba masaweega Abeli ghoadaw ASEETA lukghumeeda ea ghang'al Gayni, ak aba nih geataw doobiiwnata, hean ghoah ASEETA muushoocheanda iimwas haleanjeadaanyi bea giimearda; ak ghami, ak aba masaweagaaschi ea gudugabalool.

⁵ Nea aba masaweega geetiing'da Enoki humng'eeda ak abeeda ea mwadaaha miyeeda; ak ea meanyasa, aba gideaba niyaat ASEETA. Asi heeda miyeeyaada abeeda ea sirukuna badayda gideaba niihoosan ASEETA.

⁶ Nea iimanda masaweega ahang'waay gideaba gajahoosana niny. Aba gideaba siida wassean jea gwaneekiisa ASEETA gagasa ghwanal gideaba niny gwanda ak goomeari fugiga gaseadayi ninyiin.

⁷ Nea aba masaweega Nuhu damanda reekusiina ASEETA aba iita ng'asheega meadaaha, ghwayiiy ak gwasin maleambooda haw jea ghaweada fugeaba gheanyi; ak aba nih goorgweaksa ng'eanyiida ak ghoah siida jea gwahearan doobiiwnata sinyasa masaweega.

⁸ Aba masaweega gwasin mureeda Abrahamu damanda siguursiina ak gawa ng'eanyiida jea ghwanyasa hearaniischooda; ak gawa, nea mwanala eara heeda gal.

⁹ Aba masaweega goobiida ng'eanyiida heeleesiinda, aba jeeda ng'eanyiida buuneeda, ak goobiida jeesinga maheemajeega sea Isaka ea Yakobo, gwahearaniischi sea niny aba heeleesiindida.

¹⁰ Aba gideaba gang'ula mwadi ghwadaah mujiineeda mideawa sindeeta, nea siida deas ea dea sin ea ASEETA gil.

¹¹ Aba masaweega eara Sara ghwanyas uurda jea gagweayiida, earapeadi ninaawda gweanyeakaaschiin, nea ghwanung' ghoah niny siida doabiiwaat mideawa heeleesiinda.

¹² Iidu aba hichpa siyagi miy nea gawuurji gilinimi, ak geeji jeata saang'a deena miinga humng'eeda ak gwadeena iseaskweanda ghuuta basooda.

¹³ Fiisu seaniin gameewiisa jeeda masaweega, ak ea miighwanyas gidaghayi siheeleesa, ak geaghus gideaba ghwadaah nea sheagi ak ghwadeapta, ak ghwanal gideaba saawa rabasta gil ea fuga mang'aw aba badayda ng'eanyiida.

¹⁴ Aba gideaba fuga ruku ng'asheesu ghoahiimu muuchi gideaba saawa gagaseadayi ng'eanyiida jea goobiida.

¹⁵ Nea abeeda iyapkaat ng'eanyiita leabuun, ghwanyawa gwandeawa seawadeeda biikteayda.

¹⁶ Asi ghamneawa aba giduurji, gagaseadayi ng'eanyiida miy, nea diita bea humng'eedean. Hean ASEETA ea moamu ghabwaspwas aba gideaba geeguura ASEETA nyaawa, aba gideaba nisissa saawa mujiini.

¹⁷ Abrahamu aba masaweega, eaweeda sisimsima, ghoadayda Isaka, nea ninyeeda ghayi nyas heeleesiinda hean gagasa ghoadayda orjeedaanyi was haghasheeda,

¹⁸ nea abeeda geeyi aba badaydeaba niny, “Aba Isaka gajeeguurdeaweey diibiga jeacheengaagu.”

¹⁹ Ak ghwanal gideaba ASEETA ghoamu gooduuna buuneeda jeeda miyeeda; hean gwarugu nea ghoawaaghan, ak iidu gabiikta ghwanyas.

²⁰ Nea aba masaweega gamus Isaka ghawooda jea ghwahidu aba badayda Yakobo ea Esawu.

²¹ Nea aba masaweega damanda meawa Yakobo, gabadiischeesa giliwas balean bea Yosefu, ak gabuy uhuuda damanda moasha ghawooda nea gwadiiwa geaw bileangidaanyi.

²² Aba masaweega Yosefu, aba muudeanooda eaweagaaschi gwarugu ng'eayda fuga Israeli ak ghoadayda iita gichea eebuyda.

²³ Aba masaweega, Musa damanda sijiila, ghafuy ghwaan ea ghaamwat sheeh samwagu, aba gideaba ghwadaah saawa gideaba aamiy; ak ea moawala diigheanda sugoocheanda.

²⁴ Aba masaweega Musa, damanda hisiina heeda, ghaheawa eeguura orjeeda hudeaba Farao,

²⁵ ak ghwaloat gideaba gaygaweechi sawanadeeda sea fuga ASEETA ak ea mwasamwa hooseaneega jeeda riing'eeda.

²⁶ Ak ghwanung' ghoah giing'weaka ea sawanadeeda Gristo meanang'oocheanduumeeda haw mawuurji maghasuuka siitiing'da bea ng'eanyiida Misri, aba gideaba ghoamuughu giimearda.

²⁷ Aba masaweega ghabeawa ng'eanyiida Misri, nea moawala nyarasta sugoocheanda; ak ghwarjeang'da nea gawuurji siida dea ASEETA meadaaha.

²⁸ Aba masaweega ghoang'waay Basaaka ak geepuuna foojeanda, ak abeeda iihidu Gidida nuusa duweachajeega ea moamu ghwasat saawa.

²⁹ Aba masaweega ghoaghaawa buuneeda basooda Shaamu gawuurji gili sik ng'eanyiida ghajaam; nea fuga Misri, iigala sinooda gawuurji gida sinda saawa, ghwaak beega.

³⁰ Aba masaweega ghoabeada ghamarda Yeriko damanda neaweesiina saawa eawooji ispwa.

³¹ Aba masaweega Rahabooda aweaksheada ghanyea mameewuudayi fuga ghayi manda mureeda, aba gideaba ghwadeapta fuga buwa gheang'da.

³² Abeeda gaydargu naaha? Aba gideaba madeayi damanda aba rukunooda iita Gideoni, Baraka, Samsoni, Yefta, ea dea Dawdi ea dea Samweli ea sibanga–

³³ nea aba naweeda masaweega ghwajoar darooraka, ak ghwanung' eesin gitoabiiw, ak ghwanyas heeleesiinda, ak ghwarat ghuusiga ng'anyeeka,

³⁴ ak gwanuus beasta ng'waan, ak gamng'awa madeeda ng'uta, nea ghwanyas uurda aba jeeda ng'arng'aranda, ak gwandeawa uurda aba jeeda ng'ucheeda, ak ghwanung' gamng'aw lugooda eemoojiga.

³⁵ Ghwanyas gadeemga fuga nyaawa duuna miyeeda. Mwaatkwa geesawan, nea ghaheawa ghamwas siksiinda, ak abeeda gwaduutu gicha ak ghwanyas eaweega miyaas.

³⁶ Mwaatkwa gwasawana aba shikooda ea bayiiga, nea ghabwada geerata munyaloalajeega aba ghealooniga.

³⁷ Geefuta lagheanga, ak geabwaash nibiyeenya, ak geenuuseada aba ng'uta; ak gwaneayi nea gookwa eagweega gisilga ea gea nooga, ak ea barbari, nea geesawan, nea geesima ng'asheega munyas–

³⁸ nea ng'eanyiida ea magassa fiisu, ak gwaneayeewa eeshtearajeega ea giijeega, ea jeesinga bearuutka ea gwaleadinga jeeda ng'eanyiida.

³⁹ Nea suh seaniin, earapeadi sisim aba masaweega nyaawaan, ghanyea mwanyasa gidaghayi siheeleesa,

⁴⁰ iidu nea nibada ASEETA gidamiy aba badahuukaasa, iidu iisiheeleewi ghanyea maygamajeekcheewiidi.