AYUBU 40 - Bibliyeeda Ghaydit

¹ Hean ghwalamda NG'UTAMIIDA ak gwayeesha Ayubu:

² “Ang'iing'eeda isikiideawi giidiinyeanyeeka gaygaleada sea ASEETA haw uuri? Ang'iing'eeda isheang'nyi sea ASEETA, asi shaaha ng'asheesu.”

Ayubu

³ Hean ghwasha Ayubu ghuuta NG'UTAMIIDA nea gwayeesha:

⁴ “Ng'ula, aniini geawooschi gidamwadaagha muuchi, gaydarukuneey naaha, ghaayiinyi geatindeanyu ghuuteanyu.

⁵ Neargu nibwagi, ak ea maydasha, asaha, neargu nibiyeenya, ak ea maygut dabalool dawa mwadi.”

Ng'utamiida

⁶ Ng'ata ghwasha NG'UTAMIIDA ghuuta Ayubu aba shaarara nea gwayeesha:

⁷ “Asi amajeega geaw uurjeewana ng'eedeeda, gaydaanyaashnyi ng'asheanda ak gayshaaha.

⁸ Aba huumwa gigasayi yamwa girgweageedeanyu gayng'udanaan giidiinyeanda ak ginyasi doobiiwnata?

⁹ Gindeawi geatinda uurji dea ASEETA, giimuusi nung' ghwanya nyeashta uurji daanyi?

¹⁰ “Asi ahiimda geaw gideaba gindeawi miyeenooda ea hawunda, adaamdaamwa geaw aba giigheambiita ea hawunda.

¹¹ Nung' goobissa buuneeda nyarastaang'u, ng'ula, gilinyoo gwandeawa ghwarjeeda ginung' ghoabeada.

¹² Ng'ula, gilinyoo gwandeawa ghwarjeeda giihiing'u nea giilaabi fuga munyas aba hiji midean.

¹³ Funya sean duwaawi aba jeeda sigeeda, dukuta gheamamuunatka nyaawa aba heeda funyaat.

¹⁴ Ak abeeda gaydanal gideaba gijooriischi aba uurdaang'u.

¹⁵ “Ng'ula udoomu geasindi gideasindaneey, niny ghwaakta nyeega deeda.

¹⁶ Ng'ula niny gwandeawa uurda haw muuchi, nea mayiishka jeadaanyi ea majeekcheewi.

¹⁷ Niny gooyuuk shoomng'eandaanyi gawuurji gubooyeanda mayiishka rirjeakaaschi ghwanoas geat.

¹⁸ Geakaaschi gawuurji boombeeda oomu, gisheajeagaaschi gawuurji banajanga gharinyeanda.

¹⁹ “Nih dea madeeda gil aba gadiyoojiga ASEETA, ak ninyeeda sin niny ghwayiin murdeeda ng'utaanyi.

²⁰ Giijeega gooruudu hamita diyeanga sean bea jarooda ghwaheas boagaaschi.

²¹ Ak gwalil aba guumda geeta mideawa jirooneeda, nea ghafuy geaw aba heeda mida muudayga ea sheang'weeda.

²² Geedigiga mideawa jiroongean inyeesa gooheen aba jiroonga nyaawa, ea gea geediga rinna ghuuteenda.

²³ Ng'ula, iigulda ghealooda niny ea mabwaadana, niny ghwadaah gaba seayu, earapeadi Yordani gulda ea ghwahita ghuutaanyi.

²⁴ Ghoamu ng'eaha gwadukuta gheanyanga ak ghwasareanda? ghoamu ng'eaha ghwasaaw sareandaanyi aba ghuduumbwaada?