AYUBU 39 - Bibliyeeda Ghaydit

¹ “Heapi damanda jiila nabiyoonga mida iheenga lagheanga ginali? ak gajamuusa rukuni damanda jea gwajiila ndoopkeeda?

² ak gajamuusa iita sheega nyaawa bea gweayuumeeda, ak ginali damanda jea gwajiila.

³ Ginali damanda jea gaweaya ng'eanyi ak gwaji, damanda jea gwajiila dayeega nyaawa?

⁴ Dayeega nyaawa ea majeekcheewi, inyeesa gwaheetu aba dareabeeta, ak gaweay heechea gaweay nea mabiikna heeda gheamadiga nyaawa.

⁵ “Ghwanung' ng'eaha gawa digeeda nea goobal geaw? Ghana siida atin digeeda ng'eaha.

⁶ Nea naanung' ghoah dareabeeta ng'eanyi, nea ghoah ng'eanyiida balang'da heachea goobiita.

⁷ Inyeesa ghwasaja geaw muuchi nyeashta mujiini, ak ea mooleeysiiniit nyeashta siida miineadaysa niny.

⁸ Nea inyeesa gwaneay aba iheenga giijeega ghwanyas haghweeda, nea gagaseada giliwas sean nyawiish.

⁹ “Heapi muweasta gayghamwas gagadiyeeseey? Ak gayghamwas gwalla jeeda muhealeadaang'u?

¹⁰ Gajamuusa rada muweasta gawuurji gili bwar ng'eanyi, ghana gagis mageemng'eanda sibariida?

¹¹ Gayrara aba gideaba niny ea haw uuri, ghana gadiyeadaang'u gaynung'usiina niny?

¹² Ak gayrara gideaba gaygweadu boagaagu ghoahi, nea gooweamsa booga heeda jea eelaksa?

¹³ “Shageerooda inyeesa ghoadaarda meang'eagaaschi aba ghwarjeeda, ak ea mayghoamu ghang'eataayda udoombalaliida.

¹⁴ Inyeesa goobuusa burungaaschi ng'eanyi, ak ghwanyas heeda shang'shang' aba jeeda iseaskweanda.

¹⁵ Ak ea mwanala gideaba hich gwadeepa eala, ghana gwanyarja diyeanga jarooda.

¹⁶ Niny inyeesa ghaghabwas dayeagaaschi gawuurji gil mii gaaschi gil, ak niny eara ghwadatas jeataanyi maduupeewana gil.

¹⁷ Aba gideaba ghaanung' gwaroosa weaghuumeadaanyi, ak ea mwaadawi eara fughareani mwanang'.

¹⁸ Nea iyang'eat ghuuta ng'weega ghoadaraam faraasi ea siida mwanmwan.

¹⁹ “Siida adaw faraasi uurda ang'iing'i? Ghana siida iin buudeega geawi gheataanyi ang'iing'i?

²⁰ Siida nung' ghang'eatng'eataayda deashamga ang'iing'i, nyeashtaanyi bea ghwarjeeda ghang'uda buuneeda muuwda.

²¹ Inyeesa ghabwar mwaangwaachi, nea gahoosan aba uurdaanyi, ak gwarita gawa gwaroonyi fuga mideawa dabita ng'ucheeda.

²² Faraasi inyeesa gabara reari muuwda, ak ea mandeawana muuwda, nea maygabiikta bwadaw aba ng'uta.

²³ Dabita ng'ucheeda sar fuga ding'da faraasajeega inyeesa ghwalas geat aba nyeashta nea ghameang'meang' aba daknooda.

²⁴ Faraasi inyeesa gawa mwadi nea ghaboadan aba nyarasta, nea iinyaa ghuuta durumbeati niny ea mwamiinaada.

²⁵ Nea iisighuut durumbeatajeega, niny inyeesa gwayi, ‘Aha!’ Nea inyeesa niny ghwayiiy nyeashta ng'ucheeda nea sheagi.

²⁶ “Heapi geenang'da ng'eeteayda humng'eeda giinaali ang'iing'i, ak goowiida meang'eagaaschi gagal wiilooda ng'eanyiida biyeara?

²⁷ Heapi rabearda ginung' ghang'eata gawa humng'eeda aba diigheandaang'u, ak ghwadeas ghooriidaanyi aba uhuuda geeta?

²⁸ Uhuuda lagheaneeda heeda abiita gil, ak gwadeeksa gheanyi uhuuda lagheaneeda was heeda ng'aniip ghoah gheanyi.

²⁹ Ghang'eada hoowa niny inyeesa gang'ula diyeayda, gheanyangaaschi ghwadaah nea sheagi.

³⁰ Dayeagaaschi inyeesa gwareer foojeanda, ak heeda mida musta ea heeda mida rabearda gil.”