AYUBU 36 - Bibliyeeda Ghaydit

¹ Hean gabalool gicha Elihu nea gwayi:

² “Riyeang'da gilimwanang' ak gaydaahiimneey, aba gideaba gwanda ng'asheega jea dargu aba hoorgeeda ASEETA.

³ Gaydeana fughareedeanyu dea sheagi, ak ghaadawji doobiiwnata dea sinan.

⁴ Aba huumwa ng'asheegeasu mii ng'uyeega gil, dea hidaat aba fughareeda gwanda headaang'u.

⁵ “Ng'ula ASEETA ea hoauur nea mafoola siida was sean, ak ea hoauur ea nalooda ng'asheega.

⁶ Ak ea mayghwanung' goobiida ng'eanyiida fuga munyas, nea ghoadaw fuga sighabwas gitoobiiwsa.

⁷ Nea mwanung'waada furita fuga doobiiweadi, ak goombiit goombaliischi nea ghwanyas hawunda.

⁸ Nea saawa iisirat aba biingu, ak geayaat aba ghealooniga sawanadeeda.

⁹ ASEETA goohiimsa saawa riing'eega nyaawa ea ghwarjeeda nyaawa.

¹⁰ Niny ghwajaat iidiga nyaawa ghwayiiy ng'asheega sireekusiina, ak gwarukusa gabiigu nea ghwanung'waada ng'asheega munyas.

¹¹ Inyas ghamwas ng'asheega ASEETA nea gagadiiyeesa, gayghwanyagaada aba jeeda eemoojiga nyaawa sean, gweanyeeka nyaawa sean gaygaba hooseaneega.

¹² Nea ii mayiing'shi gaygoosha aba ng'uta, ak saawa gaygameewa aba gideaba mandeawana fughareenga.

¹³ “Fuga moawala gheang'da ASEETA inyeesa ghabwariiy gwanyareesi, nea inyeesa ea magasa weeta ii siminighis.

¹⁴ Inyeesa saawa gameewa nea gudea gheareemanga gil, nea eaweega nyaawa goosha aba bugusta fuga munyas.

¹⁵ Niny ghoahaap dea sawana aba sawanaduutkaaschi, nea ghwajaat iidiga nyaawa aba ghabasta.

¹⁶ ASEETA gagisneey ak gooruunaneey jeeda sawanadeeda ak ghwayiinyi heeda bwara, manda sawanadeeda, nea damanda agiischoadaang'u gwasineey gea riisheadi.

¹⁷ “Ak ghamneawa ea siirgweaksiindaneey siida muy, nea niing'waanyi girgweaksiinda doabiiwaat.

¹⁸ Asi fura geaw adaghwahidu nyarasta ak ghwaadaneey ghaat ea bwarana budeayda, nea adumwasi hawunda giitinooda ghwayamnyi.

¹⁹ Heapi shookaagu ghoamu gooruunaneey jeeda sawanadeeda, ghana uurdaang'u sean gayghaweanyi?

²⁰ Adigasayi ghwahidu eaweeda nea buuneeda inyeesa geenung' goosha aba heeda mida.

²¹ Fura geaw ading'ulayi ng'asheega munyas, aba gideaba giloadi nih ea ghang'al sawanadeeda.

²² Ng'ula ASEETA gwasin gea hees aba uurdaanyi, ng'eaha gil dea anealsheata niny?

²³ Naweadaanyi gwarukusa ng'eaha ak ghoamu gwayeesha ng'eaha gideaba ‘ang'iing'i gisini gea mwadoabiiwa’?

²⁴ “Apkaada ak giighaambiidi gadiyeadaanyi, ghayi sarmasa buuneeda.

²⁵ Buuneesean gang'ula niny, buuneesean gang'ula niny nea sheagi.

²⁶ Ng'ula ASEETA aahaw nea aseasa ea meanali niny mooneeda gweanyeakaaschi majeamu eesikteawa.

²⁷ Niny inyeesa gagis beega basooda gaweay humng'eeda, nea ghwanung' gwarina beega roopta jeeda dung'usta.

²⁸ Ak ghwanung' ghwaroabwan shamooghuutka, nea gwaroobassa buuneeda muuchi.

²⁹ Ghwanal ng'eaha gida dukusiinda shamooghuutka, ghana gida agweendandiida humng'eeda aba heeda mida bea humng'eeda.

³⁰ Ng'ula niny ghoabwarghaan weeshindaanyi gwaneaweesa, ak niny gwadukuta uuteenda basooda.

³¹ Aba gideaba nih gidargweakiisiinda buuneeda gil, inyeesa gagu hamita aba inyeanda jeeda.

³² Niny inyeesa gwadukuta geatingaaschi aba weeshinda ak googeal heeda jea ghwalas.

³³ Giighweandandeeda gwarugu hinnooda ASEETA, nea eara diyeanga ghwanal gideaba ghwahidu.”