AYUBU 28 - Bibliyeeda Ghaydit

Duumsheesiinda weaghuumeeda

¹ “Aba huumwa gwanda heeda sigurguruuna lapiya, ea heeda nyasa dahaabooda ahuuni.

² Gharinyeanda geegurguruuna jeeda sigeeda, nea lagheanga oomng'i iissa geayaaw aba jeesinga lagheanga.

³ Siida iissa gwareekusa misaneeda, ak gagasiischi ea ghwahita moonghooda sheagi, ak ghaghurghur lagheanga haw sheayeat aba heeda misana.

⁴ Ng'ata ghaghurghur shoomanda aba moangoachi heeda sheageewa heeda abiida buuneeda; ak gwaroosa bareanoodiga ng'ata iita nyaawa, ak ghabwardaghaat nea sheageewa buuneeda, ak gwateemban nea gagal hiji ea hoowa.

⁵ Nea jeeda sigeeda, ea heeda rituuna hamita; ak hing'eadaydaanyi ghoang'waal beasta haleanjeeda sean.

⁶ Lagheangaaschi ea heeda mida lagheanga oomng'i bea sheayeeda hawi nea sigeadaanyi gwanda birjeanda dahaabu.

⁷ “Nea naweedida ea manda rabearda ng'waan nal, ak eara gheang'da madooyda ea mii ghwadaa.

⁸ Diyeanga ng'weani bea ghwarjeeda mii ghwaala; nea eara ng'adiida ng'waan ea mii gwasik.

⁹ “Iissa ghwayiin buuneeda geatinga nyaawa badayda lagheaneeda hang'waay, ak goobiimbiin giijeega ghoang'eada hawunga.

¹⁰ Ak ghabwaashaada maparoojiga aba dageascheeda lagheanga, nea gheang'daanyi ghwadaah gili wasean miy.

¹¹ Ak ghwarat ghealooniga ea magulda, nea gidida funyaadiin ghwanung' ghwadaajiit.

¹² “Ak abeeda weaghuumeeda gajeanyasa yeenu? Ak heeda mida fughareeda ea eenu?

¹³ Nea buuneeda ea mwanala alooheeda weaghuumeeda, nea meanyasa aba jeeda ng'eanyiida fuga majeekcheewi.

¹⁴ Ak gwayi beega sheagi jih, ‘Manda jeedeanyu’, ak gwayi basooda, ‘Manda jeedeanyu’.

¹⁵ Ak ea mwoamu eanyasa jeeda dahaabu, ak ea mwoamu eegala lapiya sheayeadaanyi.

¹⁶ Meamu eeteena sheayeadaanyi dahaabooda Ofiri, ghana lagheanga oomng'i bea sheayeeda haw ghana dea duw.

¹⁷ Ak ea mwoamu eegala geat sea dahaabu ea giyo, nea mwoamu eeyamuuji sea haleanjeeda gharinga miyaasiin bea dahaabu.

¹⁸ Nea weaghuumeeda aahaw ea ghang'al lagheanga miyaas; ak sheayeeda weaghuumeeda ghang'al dea sageeka.

¹⁹ Nea lagheanga oar booreega bea Gushi ea majeegala saawa, ghana eeteenyi sheayeadaanyi sea dea dahaabooda miy.

²⁰ “Asi weaghuumeeda gwarina eenu? Ak hoorgeeda fughareeda ea eenu?

²¹ Ada sifunya gheanyanga buuneesean mideawa eaweega, ak ea moamu ghwadaah dariidaka humng'eeda.

²² Ak gwayi munyinda ea miyeeda, ‘Siyiinyi meanyaweagaaschi aba iidigaasa.’

²³ “ASEETA niny dea nal naweadaanyi, ak ghwanal hoorgeadaanyi.

²⁴ Aba gideaba niny gang'ula muudeanooda ng'eanyiida, ak ghwadaah haleanjeeda sean mida hing'eadayda humng'eeda.

²⁵ Damanda nung' ghwanyasa jeameeda uurdaanyi, ak goodeen beega aba gida adeeniida;

²⁶ damanda adawa roopta diigheanda, nea gwasissa naweeda dadamandeeda giighweandandeeda;

²⁷ ng'ata ghwadaah ak gwarukwiida; hean ghoang'eat, ak gwasikteawa.

²⁸ Ng'ata gwayeesha siida, ‘Ng'ula, badita NG'UTAMIIDA, fughareeda gil; nea giiheeleedeaba geat sea munyinda ea fughareeda gil.’”