AYUBU 23 - Bibliyeeda Ghaydit

Ng'asheanda shaah Ayubu

¹ Ng'ata ghwasha Ayubu nea gwayeesha:

² “Eara ghamneawa girgweageedeanyu gudu aang'waan, lasoodeanyu ea durumwana muuchi ea ghang'al sawanadeedeanyu.

³ Inyeeda gwachi ghaanali heeda aamuuschi dadaah niny, ea dahita heeda abiita!

⁴ Gwachi gaydayiin girgweageedeanyu madeadaanyi ak ghaanyiichi ghuuteanyu ng'asheega mida jeedeanyu.

⁵ Inyeeda gwachi ghaanali ng'asheega jea gwarukunean, ak ghaanali ng'asheesu jea gwarukuneaniin.

⁶ Heapi gaygang'ucheewean ea giteena hawunda uurdaanyi? Manda; gaygooleeysean iit.

⁷ Gwachi siida doabiiwaat gayghoamu gabalool sea niny, asi gwachi gaygwasiksean siideanyu laja girgweageeda damanda manda muudeanooda.

⁸ “Ng'ula, geawi mwadi, ak ea manda hoowa; ak geabiigu bwadaw, ak ea mwaadaahi;

⁹ ak geagasayi niny aba meatkweeda geatinda dugwa, ak ea mwaadaahi niny ak ghafuy geaw aba meatkweeda geatinda dugwa ak ea mwaadaahi.

¹⁰ Ak niny ghwanal naweeda easikchi; nea iing'ata nea nisiman, gaydariteayda dahaabu.

¹¹ Aniini ghaayaachi geeshtaanyi nea ghaadoabiiwji ak ghaang'waanyi naweadaanyi nea mwaasajaadani.

¹² Mii dabiikta bwadaw ak ghaanung'waadi diigheanda ghuutaanyi; neadiiwji ng'asheega ghuutaanyi aba jeeda gurooroodeanyu.

¹³ Nea niny ea akaleala ak ghoamu ng'eaha ghwayam? Nea iissa gidagasa niny, gwasin.

¹⁴ Ak niny gaygwasin gidida rukuneaniin; ea ng'asheega saang'a uurji suh gwanda jeeda uhuudaanyi.

¹⁵ Asi iissa ghaabeali aba madeadaanyi; nea iyeateemsheesi niny ghwanung' ghang'udan muuwda.

¹⁶ ASEETA ninung' gamis gurooroodeanyu; ASEETA hoauur ninung' ghang'udan muuwda;

¹⁷ aba gideaba ghaabeali aba badayda misaneeda, ak ea nidukuta misaneeda haw gheamamdeanyu.