AYUBU 21 - Bibliyeeda Ghaydit

¹ Ng'ata ghwasha Ayubu nea gwayeesha:

² “Ooleeysiina iita muuchi ng'asheegeasu, ak ghoah ng'asheanji gichea gageanda salgheang'deang'wa.

³ Amilikghtanaan, ak gaydabalool, nea iing'ata balooldeanyu, abeeda gooshikean.

⁴ Nea aniini, neada geaniiksi siida? Ghwasaan aniini inyas maydamilikghta?

⁵ Ang'ulean aniini, ak ghahameegwa ng'eanyi, ak gidukuti ghuutaang'u aba geatinda.

⁶ Iyaapkaachi ng'asheega nyasan ghaabeali, ak ghoang'waay saseedeanyu muuwda.

⁷ Ghwasaan anda fuga munyas goobiida ng'eanyiida, ea gawoosiidi, nea ghoahaada uurjeenga nyaawa bea gheambalmeeda?

⁸ Diibiga nyaawa ghwanyagaada aba madeanyaawa, ea jeacheenga nyaawa aba madeeda gheanyanga nyaawa.

⁹ Nea gealga nyaawa gaba seayu manda muuwda, ak bileangida ASEETA ea mayghwalas saawa.

¹⁰ Ak jiirgwa nyaawa gwaji muuchi nea ghoahaada; ak gwaji dugwa nyaawa muhooga, ak ea mahoosuuna.

¹¹ Ak gooruudu muhooga naawa gawuurji hawanda, nea ghwadaanghan diibiga nyaawa.

¹² Ak gwasarmana gureayeeka ea gidoondooriida, nea gahoosasa ghuuta furiimbu.

¹³ Ak goobiitpiit giibinda miyeenooda, ak gabean gwararang'eesa gheeda maloonghajeega.

¹⁴ Ak gwayeesha ASEETA, ‘Ng'amwana heedeanya! Aseasa meegasi eanala naweadingaagu.

¹⁵ ASEETA hoauur, neada ea naaha gil inyas gajeegadiyeesiina niny? ak gajeanyasa naaha iisimwaashchi niny?’

¹⁶ Ng'ula, miyeenooda nyaawa manda geatinga nyaawa? Girgweaguutka fuga munyas ea sheageewanean.

¹⁷ “Heapi, gheaboonyanga fuga munyas siimiis niba hada? Ak ghwahidu munyasnacheeka nyaawa badahuuka nyaawa? Ak gwalakiisa ASEETA sawanadeeda aba nyarastaanyi.

¹⁸ Ak gawuurji saawa mbarariida gajeami mida madeeda jeameeda, ak gawuurji looyda aat shaarara?

¹⁹ Gooyeenyi, ‘ASEETA goodiiwsa diibiga siida munyinda’. Ghwasaan inyas mawalda aba heanyaawa, ak abeeda ghwanal.

²⁰ Dadaaha saawa aba gheanyanga nyaawa nyariida nyaawa, ak ghwadaah saawa nyarasta ASEETA hoauur.

²¹ Neada gaygwandeawa hooseaneega naaha iing'ata miyeeda jeacheenga nyaawa, iisilach bugusta sheega nyaawa?

²² Heapi siida ghoamu ghoanaal ASEETA fughareeda, was dea argweaksa fuga mida humng'eeda?

²³ Siyagi ghami nea gwandeawa uurdaanyi, ak goopteada gamnyeeni nea gaba seayu,

²⁴ ak saseadaanyi ghwanyiit ghashneeda nea gudadeeda geakaaschi ea gudu gwandeawa uurda.

²⁵ Nuut ghami nea gagiisan gurooroadaanyi muuchi, nea mang'wa gwasamu gidinya earahay.

²⁶ Ng'ata gameewa sean ak geebuy, ak gwadukuta ghuughuutka saawa.

²⁷ “Ng'ula, aniini ghaanali fughareengeagwa, ea ng'asheega munyas oobadayi sinooda aba badaydeanyu.

²⁸ Aba gideaba gooyeenyi, ‘Gwanda yeenu gheeda siida haw? Gwandeenu maheemajeanda abiita fuga munyas?’

²⁹ Neada ea miyoanyaasha bareanoodiga aat naweeda, ak ghoamwaschi ng'asheega rugu,

³⁰ gideaba fuga munyas geesiksa eaweeda sawanadeeda, ak geelealu eaweeda nyarasta?

³¹ Gajea ng'eaha siida jea gwareekusa siida muy ghana siida jea ghawalda aba ng'asheega sean sin?

³² Nea iisiyaat eebuy, bung'eadaanyi geayiin furiischoodiga.

³³ Nea sigeeda mwaangwaachi gajea miy aba headaanyi; ak gayghwaat geeshtaanyi buuneesean, nea fuga asheedeawa ea mwoamu eeyiida.

³⁴ Abeeda gajoamuustaan ageanda salgheang'deanyu aba ng'asheega ak ghwahit? Ng'asheegeagwa marachi gil geaghus ng'uyeega.”