AYUBU 2 - Bibliyeeda Ghaydit

Shataani gwasim Ayubu gicha

¹ Ghayi eaweecha gicha gaweay malaykajeega ASEETA ghabwatgeat aba madeeda NG'UTAMIIDA. Eara shataani gawa bugusta nyaawa aba madeeda NG'UTAMIIDA.

² Hean ghoanyaash NG'UTAMIIDA shataani nea gwayeesha, “Gileabu yeenu?” Ghwasha shataani ghuuta NG'UTAMIIDA nea gwayeesha, “Gealeabu neayeeda aba badayda ng'eanyiida ea beacheengeaba hiji ea hoowa.”

³ Ak gwayeesha NG'UTAMIIDA shataani, “Siisi iteanyu bea gadiyeeda was Ayubuuni nidaahi giduurji, manda siida uurji niny aba badayda ng'eanyiida, siida doabiiwaat gil, nea goowali gheang'da ASEETA nea ghwasaja geaw ng'asheega munyas? Eara ghamneawa ea majeek aba doobiiwnataanyi, earapeadi giihaajaan dala bwadaw niny nea mandeawana giidiinyeanda.”

⁴ Hean ghwasha shataani ghuuta NG'UTAMIIDA nea gwayeesha, “Muunda ea muunda, siida inyeesa ghoadayda haleanjeeda mideawa sean aba gideaba ghoaghu eaweagaaschi.”

⁵ Asi heapi ahaakta geadi ak gisadi geapkeadaanyi ea banyeagaaschi ak gayghamwaashtaneey aba madeadaang'u.”

⁶ Ak gwayeesha NG'UTAMIIDA shataani, “Ng'ula, niny gwanda geatindaang'u, simana gidigasayi ak ea adinuusi.”

⁷ Hean ghang'amwa shataani madeeda NG'UTAMIIDA, ama ng'ata ghang'uda Ayubu deaneaduutka munyas, ghang'eada baneakta geeshta ea gagul gweenda uhuuda.

⁸ Ak gageanu Ayubu rabagiida gafoora geaw ak goopteada aba jeeda deareeda.

⁹ Hean gwayeesha gatmoadaanyi Ayubu, “Eara ghamneawa gudu ang'waanya doobiiwnataang'u? Ang'eawa ASEETA ak gimeawi.”

¹⁰ Ng'ata ghwasha Ayubu ghuuta gatmoadaanyi nea gwayeesha, “Ang'iing'i gibalooldi gadeemga dasheahi. Iisinyaschi gea miyaasiin gooneasa ASEETA, abeeda ghwasaan iijea eeheawana gea munyas leabu heeda ASEETA?” Aba badaydeaba suh seaniin Ayubu mii gwarukuna ghuutaanyi ng'asheanda muy jea ghoah giidiinyeanda aba heeda ASEETA.

Ghapka fuga duupchi Ayubu

¹¹ Iidu nea ghwanyas iiteaba ng'asheesu munyas seaniin fuga asamwagu duupchi Ayubu. Hean gaba nih wuna heeda abiita ak geeweay eegeandeawa salgheang'da nea saawa ea geaba Elifasi gil leabu Demani, ea Bildadi leabu Shuhi, ea Sofari leabu Naamati.

¹² Hean nea geang'wearda geadaah Ayubu nea sheagi, ak ea meanala. Hean geechuur nea gooyeawda, ak ghabwaashaada hang'weaka nyaawa, nea geesaksa birjeanda humng'eeda ea iheenga nyaawa.

¹³ Ak geepiitpiit aba ng'eanyi sea Ayubu eawooji ispwa. Eawa ea askweari, nea manda siida rukusa ng'ashaan, aba gideaba geadaah sawanadeadaanyi aahaw muuchi.