AYUBU 16 - Bibliyeeda Ghaydit

Ayubu

¹ Hean ng'ata ghwasha Ayubu nea gwayeesha.

² “Naayiinyi ng'asheega saang'a uurji suh, agooga goowooschi fuga aheawiida buuneeda manda uurjeenga.

³ Heapi ng'asheega mwadaagha gwanda muudeanoadaanyi? Ghana ghoanyareasnyi naaha bwak ea shaaha ghuuta?

⁴ Ak eara aniini ghaamuuschi dabalooldaneegwa, gwachi gurooruunatkeagwa inyeeda gwanda heeda mida gurooroodeanyu, gaydaamu dasin ng'asheega aba badahuukeagwa, nea geadiindiili uhuudeanyu aba badahuukeagwa.

⁵ Gwachi gaydeamajeegeegwa aba ng'asheegeasu, nea ghoahaawdaneegwa ng'asheega ghuuteanyu.

⁶ “Eara dabalool sawanadeedeanyu meahawda, nea eara dasiinda gayghoashoanyanaan naaha?

⁷ Ak ghamneawa ea niibuuran, nea fugeasu sean ghwanung' goosha.

⁸ Ak ea ninung' dasis, ak nih ea joorda gil aba badaydeanyu, nea niing'waanyan ribooda nea gamuuwu aba badaydeanyu.

⁹ Nibwaashaadanaan aba geeshatkaachi nea ghaghabwasan, nea goowiiri geeshatka aba badaydeanyu, nea weajoocheandeanyu goomuruutiisean gheanyanga.

¹⁰ Inyeesa buuneeda gamachiidanean nea gabareawean reari, nea gwaneaweesean gharmucheeka buuneeda, nea ghabwar madeang'akeasu nea goong'eawean.

¹¹ ASEETA niyiinan heeda fuga roodeadi, nea gwajaksean geatinga fuga munyas.

¹² Damanda eandeewi jeeda miyeenooda, hean gwahirjeaweadanaan, asaha, ghoang'waay gheateanyu ak ghwalajaadanaan, nea ghwanung' damiinaada ak ghaahuuyi gidaanyi jea gafta.

¹³ Ak gafuteewean geatka aba meadajeega sean, ak gwanyarja manyiideanyu nea mabwaydanaan, nea ghwanung' gaweay ng'eanyi gidang'weanda.

¹⁴ Ak gwahirjeaweadanaan nea ghabwaran muuchi, ak ghabwardanaan shirikarajeanda.

¹⁵ Neakweali hang'weaka guniya, ak geajaksi geaw ng'eanyi deapteada.

¹⁶ Gheamamdeanyu nihareariit aba shooka, nea jiiweega gheanyangeasu ea nituwasiidi muuchi.

¹⁷ Ak ea manda gidamuy neasinyi, nea mooshteanyu aba heeda ASEETA aamiy.

¹⁸ “Ea ng'eanyiida adidukuti foojeandeanyu weay ng'eanyi, ak geayiiy shookeasu aba ng'eanyiisean.

¹⁹ Eara ghamneawa, ng'ula muwshoocheandeanyu gwanda humng'eeda, nea dea jea ghaweadan gwanda heetiyeada.

²⁰ Gafoolan fugeasu earooroocheewi nea aniini geabutpuusi ASEETA dabeaka nea ghaamwaschi.

²¹ Gidabal gwachi ghaweadan siida aba madeeda ASEETA, gawuurji gideaba eawoojisu bea gealaan siida ea giischeewoocheandaanyi.

²² Aba gideaba gweanyeekeasu ning'ayiit, abeeda gaydawa bareanyeeka maydabiigu.”