AYUBU 11 - Bibliyeeda Ghaydit

Sofari

¹ Hean ghwalamda Sofari bea eemeeda Naamati ak gwayeesha.

² “Heapi ng'asheesu saang'aan gajeanung'waada ea measha ghuuta? Ak siida mideawa ng'asheega saang'a gajeeyiitiisa gideaba ea doabiiwaati?

³ Ak ghwarjeadaang'u gayghwanung' ghwasiinda buuneeda gwayi saw, nea ang'iing'i inyas gibwari budeayda ak ea manda siida jea ghoabwaaspwaasnyi.

⁴ Aba gideaba ang'iing'i giyeeni, ‘giinealshoodeanyu ea miy, ak aniini geawooschi miy aba madeadaang'u.’

⁵ Gidabal gwachi gabalool ASEETA ak ghwajaat ghuutaanyi aba badaydaang'u.

⁶ Gwachi gaygwarukuneey makcheameeda weaghuumeeda, aba gideaba niny gwandeawa fughareeda haw, nala gideaba ASEETA mii gwayiida giidiinyeanyeekaagu sean.

⁷ “Heapi ang'iing'i gajamuusa nala hawunda ASEETA? Ak gajamuusa nala heeda jea gabiikna ASEETA hoauur?

⁸ Hawundaanyi ghwasuut humng'eeda, ang'iing'i gajamuusa naaha? Geawundaanyi ghwasuut gheeda maloonghajeega, ang'iing'i gajamuusa nala naaha?

⁹ Hawundaanyi ea geaw ea ghwasuut eara ng'eanyiida, eabwara ea ghwanaawa basooda.

¹⁰ Niny iing'ata ak gwajaksa buuneeda ghealooniga, ak gaguursa ghapka heeda girgweageeda, abeeda gayghoamu ng'eaha ghoadeal niny.

¹¹ Aba gideaba niny ghwanal fuga munyas ak ghwadaah eara ng'asheega munyas nea eara ea mooteemsheesiina.

¹² Ak siida dasha gayghoamu ghwanyas fughareeda, earapeadi siida geejiilda gureenda digeeda.

¹³ “Ayubu inyas ginung' ghwadoabiiw gurooroadaang'u, abeeda gaygatgada geatingaagu mwaasha ASEETA.

¹⁴ Nea inyas gindeawi ng'asheega munyas, gijakti asheagiida, adumwasi goobiida ng'asheega munyas jeedeaba gheang'u.

¹⁵ Abeeda gajiina madeeda buuneeda nea meeyeateewaneey ghuut, ak gaywoosa majeek nea mandaneey muuwda.

¹⁶ Ak gaygwarooseey sawanaduutkaagu sean, ak gajapkaata guldeayda beega ning'ata.

¹⁷ Nea eaweagaagu gaygaweeriidi ea ghang'al weeshindeaba askweari, earapeadi misaneeda gil, gaygawuurji sakteayda.

¹⁸ Ak gaybeaha seayu aba gideaba gwanda rarooda, gajeefurnyi ak gayfuufa nea gibea seayu.

¹⁹ Ak gaylila nea manda siida jea goomuuwnyi, nea gaygagaseey fuga saang'a.

²⁰ Nea gheanyanga fuga munyas ea mayghoang'wearda, ak naweadinga sean jea gamng'awsa gay ghwaroat aba heeda nyaawa, nea aba huuydeanda rarooda nyaawa gajea bureanda iheenga gil.”