2 SAMWELI 21 - Bibliyeeda Ghaydit

Geenuuseada jeacheenga Sawli

¹ Iimuchu ghang'eat geejeeda gweanyeew samwagu aba damanda Dawdi, iing'ata gweanyi ak ghwahidu gweanyi; ak ghamwaash Dawdi NG'UTAMIIDA, “Sawli ea fugeaba gheanyi gaba riing'a niihiida foojeanda, aba gideaba nibwar fuga Gibeoni.”

² Hean gaguursa sugoocheanda fuga Gibeoni. Asi fuga Gibeoni maba jeeda fuga Israeli, saawa gaba boosteanga fuga Amori; earapeadi niyaak habeawooda fuga Israeli gideaba gayghoaghu saawa, aba gideaba gagasa Sawli ghabwar aba fughareadaanyi aba badayda fuga Israeli sea dea fuga Yuda.

³ Gwayeesha Dawdi fuga Gibeoni, “Googasayi dasinneegwa naaha? Ak gaydasin naaha? Iijea dasin giiduupcheeda ak abeeda ghoatawji ghawooda hearaniischooda NG'UTAMIIDA?”

⁴ Ghwalamda fuga Gibeoni ak gwayeesha niny, “Gidamida dageascheedeanya aseasa ea Sawli ghana gheanyi mii ng'asheega lapiya gil ea dahaabu; ak ea mwoamu usi eenuusa siida wassean aba Israeli.” Ak gwayeesha, “Gidoorukunean agooga mii gichea dasineegwea?”

⁵ Gwayeesha saawa sugoocheanda, “Siidida gagasa ghwalas uhuudeanya ak ea moabuuda eara sih aba jeedeanya aba ng'eanyiida Israeli,

⁶ asi agoaneasa orju ispwa ikaaschi, ak geerati aba madeeda NG'UTAMIIDA aba Gibeoni aba uhuuda giijeeda NG'UTAMIIDA.” Ak gwayi sugoocheanda, “Gaydaadayda.”

⁷ Ak ghoaghu sugoocheanda Mefibosheti orjeeda Yonatan was orjeeda Sawli, aba habeawooda NG'UTAMIIDA mida dageascheeda nyaawa, dageascheeda Dawdi ea dea Yonatan orjeeda Sawli.

⁸ Ak gageanu sugoocheanda orju iyeenya bea Rispa was hudeaba Aiya, ghayi jiilsa Sawli, was Armoni ea Mefibosheti; ea orju muut bea Merabu was hudeaba Sawli, jiilsa Adrieli orjeeda Barsilayi bea eemeeda Meholati;

⁹ ak ghwayiin saawa geatinga eemeeda Gibeoni, ak gearata saawa aba uhuuda giijeeda aba madeeda NG'UTAMIIDA, ak aba jeenyaawa gameewuudayi ispwa. Geenuuseada eawoojiga madeeda bea lajita booga, damanda siing'eada lajooda ngaano.

¹⁰ Muchu gageanu Rispa was hudeaba Aiya hang'weaka guniyajeega, ak ghoabwargiit aba badayda lagheaneeda, ghang'eada damanda lajita booga ea ghwaroabwan; ak ea mamwasa gideaba gaygoobitpisa badahuuka nyaawa dariidaka humng'eeda askweari, ghana diyeanga jarooda eawa.

¹¹ Iidu nea geerukusa Dawdi gidasin Rispa was hudeaba Aiya, was gatmooda Sawli,

¹² gawa Dawdi ak gageanu geaka Sawli ea geaka orjeedaanyi siguura Yonatan aba heeda fuga Yabesh-gileyadi, ghayi jagwat aba naweeda Bet-shani, was heeda ghayi rateaysa saawa fuga Filisti, eaweedida ghabwar fuga Filisti Sawli aba Gilbowa;

¹³ ak gweana hoowa geaka Sawli sea geaka orjeedaanyi was Yonatan; ak ghoamughuush geakeaba fugiga ghayi sirataan.

¹⁴ Ak gabuy geaka Sawli sea gea orjeedaanyi was Yonatan aba ng'eanyiida Benjamini mida Sela, jeeda bung'eeda Gishi was ghwaan; ak gwasin ng'asheega sean rukusa sugoocheanda. Ng'ata ng'asheesu ghamwas ASEETA ng'eanyiida.

Fuga meanyi bea Filisti gang'uchi

¹⁵ Muchu gabiikta gang'uchi fuga Filisti sea Israeli, ak ghwararang'aada Dawdi nea goodeayi fugaaschi bea gadiyeeda, ak gang'uchi sea fuga Filisti; ak goosha uurda Dawdi.

¹⁶ Ak gwanda siisi mwaay siguura Ishibenobu bea jeacheenga fuga meanyi, nea gwandeawa ng'uta hita durumanataanyi giloohaji samwagu ea gilimwanang', nea gwarasa mananda ng'uteesh, nea gagasa ghabwar Dawdi.

¹⁷ Hean ghwahidu Abishayi was orjeeda Seruya ak ghaweat, ak gang'uchi siida Filisti ak ghabwar ghami. Ak ghwaak habeawooda fuga Dawdi nea gwayeesha, “Maygudu rita eeteayeena ng'ucheeda, gajiidu ginuusi gheaboong'nyeanda Israeli.”

¹⁸ Ghang'ata hiji ak gabiikta gicha ghwahidu ng'ucheeda sea fuga Filisti aba Gobu; ak ghabwar Sibekayi bea eemeeda Hushati siida siguura Safu, was siyagi bea jeacheenga fuga meanyi.

¹⁹ Ak gabiikta ghwahidu ng'ucheeda sea fuga Filisti aba Gobu; ak ghabwar Elhanani was orjeeda Yairi, bea eemeeda Betlehemu, Goliyati bea eemeeda Giti, nea murguuda ng'utaanyi gwadeena darearjeanda.

²⁰ Muchu gwanda ng'ucheeda gicha aba Gati, nea abeeda gwanda siida geaw muuchi, mideawa moorin lah aba giliwas geadi, nea gwandeawa moorin lah aba gilak geeshta, nea mooringa sean ea diktam ea ang'wan; nea eara niny gaba jeacheenga fuga meanyi.

²¹ Hean goong'eawi siisi fuga Israeli, ghabwar Yonatan was orjeeda Shama was orjeeda geenyea Dawdi.

²² Fiisu asang'waniin gaba jeacheenga fuga meanyi mida Gati; ak ghabwar Dawdi sea fugaaschi bea gadiyeeda.